Read Saluan NOMBILANGMO 5 Bible Online

NOMBILANGMO 5 - Saluan bible

NOMBILANGMO 5

¹Tumpu notataemo hi Musa,

²“Bee' na palentah aiya hi aha mian Israel: Iwi-iwi' na mian anu kinonamo nu panyakit kilit anu monsilakai, kabai panyakit anu nongkonamo ka'ambangan, kabai anu nonsala' kanyangmo mian anu sinilakamo, tionyo ahi' osabatakonmo i kemah nu aha mian Israel.

³Aha tionyo ahi' osai da mambamo, da madi' mohumimi'i kemah, anu kajojoongan-Ku hingga-hinggat tiba mian anu pinalesayamo hi beleng-Ku.”

⁴Mian nu Israel nontulutimo palentah aijo' ka' nonsabatakonmo mian iwi-iwi' anu sumo aijo' da boli pe'e jojoong i kemah.

⁵ Tumpu nombee'mo hi Musa

⁶atulan haha aiya kona hi mian Israel: De daagi' ko mian anu madi' montuluti Tumpu kalana nombaumo kasala'an hi mian sangga'at,

⁷mian aijo' tionyo ahi' mongakui dosa'nyo ka' mombayan bau polugi'i sampe tabayan ka' otuangi mule' uampulu' na palasen, hi mian anu pinolugi'nyomo.

⁸Panyo de mian anu pinolugi'nyomo aijo' sinilakamo ka' madi' ko to utu-utusnyo kabai anu daagi' hondo julunyo mae, saba' anu bau polugi'i aijo' tionyo ahi' obee'mo hi Tumpu ka' timbalimo bau bagi nu imam. Bau polugi'i aijo' madi' minsoop na domba lakinyo anu opake pontobus dosa' hi mian anu sinala'mo aijo'.

⁹Maumo pa' apaa na anu nu sombahkon nu aha mian Israel hi Tumpu, palasombahan aijo' memang baumo bagi nu imam anu nontalima apaa na anu sinombahkonmo aijo'.

¹⁰Apaa na anu sinombahkonmo nu mian hi Tumpu, aijo' bau bagi nu mian aijo'. Ola apaa na anu binee'nyomo hi samian na imam, yo aijo' baumo bagi nu imam aijo'.

¹¹Tumpu nompokaumo i Musa

¹²da mombee' atulan haha aiya hi aha mian Israel. De ko samian na mo'ane monginsi-insibi bengkele'nyo. Ia nongkila-kilamo bengkele'nyo aijo' madi'mo montuluti ia ka' nombusikimo butongnyo kalana noduhusmo tiba mo'ane sangga'at. Panyo langkai'nyo aijo' madi' moko ala montantukan bukuti'nyo totu-totu'u, kalana han aijo' binau nu bengkele'nyo naninsuluk; madi' ko anu nonsakisi'i ka' ia madi' i hakop hau-haunyo duhu-duhus kabai de ko samian na langkai' nu mian monginsi-insibimo bengkele'nyo padahan bengkele'nyo aijo' madi' nasala'.

¹⁵Ohu-ohua' na han aijo' langkai'nyo aijo' tionyo ahi' momboa bengkele'nyo hi imam. Ia mule' tionyo ahi' momboa palasombahan apaa na anu palalu osombahkon aijo'mo sa'angu' na kilogram na labu nu gandum. Labu aijo' madi' timbali odudu'i nu lanya' nu zaitun kabai okakambuhi nu kamangian, kalana palasombahan aijo' mongkona i han anu sala'je o insi-insibi ka' salaku bau pontandai kalana langkai'nyo nonginsi-insibimo bengkele'nyo.

¹⁶Imam tionyo ahi' mompokau boune aijo' mamba i ahop nu mezbah ka' tuminjo mo'ahop hi Tumpu.

¹⁷Lantas imam tionyo ahi' mongala sa'angu' na mangko' anu tano' na binau ka' mongisi uee anu susi' sangkiding. Lapas aijo' ia tionyo ahi' mongala sangkiding na abu' i salo nu Kemah nu Tumpu ka' mongisi abu' aijo' i uee aijo'.

¹⁸Lapas aijo' ia tionyo ahi' mompokakambangmo ubak nu boune aijo' ka' monsapuakonmo labu palasombahan kalana i insi-insibimo i limanyo, panyo imam montoongi uee mapakat anu mompotoka mae kutuk.

¹⁹Lapas aijo' imam tionyo ahi' montotoangakonmo sumpa' ka' nusitujui nu boune aijo'. Imam tionyo ahi' motatae, “De beleyum madi' masala' yo beleyum madi' nukona nu kutuk anu nupotoka mae nu uee aiya.

²⁰Panyo de beleyum nasala'mo,

²¹o amalakon hi Tumpu na mompotimbali sanggo nu beleyum timbalimo kutuk na sumpa' nu beleyum hi bansa nu belemiu. O amalakon da Ia mompotimbali jalempakan nu beleyum mingkihu-kihutmo ka' kompong nu beleyum sombakmo.

²²Uee anu mompotoka kutuk aiya minsoop mo i kompong nu beleyum ka' mompotimbalimo sombak ka' mule' mingkihu-kihutmo na jalempakan nu beleyum.” Boune aijo' tionyo ahi' montaami, “Aku situjumo; o amalakon da Tumpu mombaumo sumo aijo'.”

²³Lantas imam tionyo ahi' montulis kutuk, aijo' i kalatas ka' o lulun ka' mombaso'i nu uee anu mapa-mapakat aijo'.

²⁴Imam mompokau boune aijo' monginum uee mapa-mapakat anu pinobasoi aijo ka' anu mompotoka mae kutuk. De o inumo na uee aijo' monsabapimo kompongnyo masakit.

²⁵Imam tionyo ahi' mongala labu palasombahan aijo' ka' montajuakon i ahop nu Tumpu, lantas oboamo i mezbah.

²⁶Lantas ia tionyo ahi' mongala sangkakup na labu salaku tanda saba' iwi-iwi' na labu aijo' sinombahkonmo, lantas opotunumo i mezbah. Ahennyo uee aijo' opo'inumo i boune aijo'.

²⁷De boune aijo' nasala'mo, ueemo aijo' na nonsabapi ia masakitmo hondo; Kompongnyo sombakmo ka' jalempakannyo mingkihu-kihutmo. Sanggonyo timbalimo kutuk aijo' hi aha bansanyo kalana sinumpa'mo.

²⁸Panyo de ia madi' ko kasala'an yo ia madi' ahi' nukona nu kutuk ka' daagi' ahi mohumpak anak.

²⁹Sumo aijo' na atulannyo de samian na langkai' nu mian minsihib ka' monginsi-insibi tukoonyo bengkele'nyo nombaumo anu ma'idek ka' nombusikimo butongnyo. Mo'ane aijo' tionyo ahi' mompohadap bengkele'nyo aijo' hi Tumpu ka' imam tionyo ahi' mompokona atulan aijo' hi boune aijo'.

³¹Mo'ane aijo' madi'mo nukona nu kasala'an, panyo de bengkele'nyo memang ahi' sinala'mo, tionyo ahi' montanggung kasala'annyo.