Read Saluan NOMBILANGMO 6 Bible Online

NOMBILANGMO 6 - Saluan bible

NOMBILANGMO 6

¹Tumpu nompokaumo i Musa

²mombee'i atulan haha aiya hi aha mian Israel. Batu-batu mo'ane kabai boune anu binalaniatmo da tumuu' me samata-mata mombau kapalaluan nu Tumpu salaku mian anu i niatakonmo hi Tumpu,

³ madi' timbali monginum anggur ka' inumon anu molangui. Ia madi' timbali monginum mau mule' pa' apaa na inumon anu molangui anu bua' nu anggur na binau kabai bua' nu kau' sangga'at. Ia madi' timbali mongkaan bua' nu anggur anu mahamo ka' daagi' ma'ima' kabai anu nanggasmo, kabai maumo pa' apaa anu ingala mae i kau' anggur; batunyo kabai pe'e londiknyo madi' timbali ia mongkaan.

⁵De daagi' hau-haunyo ia mompojalan niatnyo, ia madi' timbali monggunting ubaknyo kabai o kis. Hau-haunyo aijo' ubaknyo ka' jangkutnyo opojohokmo da tumuu' mantan. Ia sabole-bole montoongi niatnyo sampe mingkotje na tempo'nyo ia binalaniat mokalaja samata-mata hi Tumpu.

⁶Ubaknyo aijo' bau pontandai saba' ia mian anu ola samata-mata mokalaja hi Tumpu Allah. De daagi' hau-haunyo ia mompojalan niatnyo ia madi' timbali mohumimi'i butongnyo; ia madi' timbali mongohani anu sinilakamo, mau mule' tuumanyo na sinilaka, tinanyo kabai utusnyo.

⁸De daagi' hau-haunyo ia mian anu binalaniatmo ia mian anu ola samata-mata mokalaja hi Tumpu.

⁹De ubaknyo nu mian anu binalaniatmo mokalaja samata-mata hi Tumpu nahumimi'mo kalana ia nati ohanimo hi mian anu monti-montiik ahi' sinilakamo, saba' ia tionyo ahi' montanda'i pitun sinaa na kopinnyo; lapas aijo' ia tionyo ahi' mongkismo ubaknyo ka' jangkutnyo, atina'je ka' ia belesi'mo.

¹⁰I sinaa ko ialunnyo ia tionyo ahi' momboamo ohua' na tomonsi' mapalati' kabai tomonsi' sapatau hi imam i sabatan nu Kemah nu Tumpu.

¹¹Tomonsi' sa'angu' tionyo ahi' osombahkon nu imam bau pongampuni dosa', ka' sa'angu' mule' bau koloban anu opotunu da madi'mo ia mahumimi'. I sinaa aijo' mule' ia tionyo ahi' po'ule' mule' mompotuu' ubaknyo bau samata-mata pongangga'i Tumpu

¹²ka' po'ule' mongkobu'oui niatnyo salaku mian anu binalaniatmo. Tempo' anu i hikuhakonmo madi'mo daagi' olekeng kalana i nahumimi'mo. Salaku koloban bau polugi'i ia tionyo ahi' monsombahkon sa'angu' na anak nu domba anu umunnyo sataunmo.

¹³ De tempo' nu samian anu binalaniatmo ilapasmo, tionyo ahi' obau na atulannyo sumo aiya. Mian aijo' tionyo ahi' oboa i sabatan nu Kemah nu Tumpu

¹⁴ka' momboa hi Tumpu totolu' na potuu'on anu madi' ko panyakitnyo; sa'angu' na anak nu domba lakinyo umunnyo sataunmo anu bau koloban opotunu, sa'angu' na anak nu domba behenyo anu umunnyo sataunmo bau koloban pongampuni dosa', ka' sa'angu' na domba lakinyo bau koloban pompodame.

¹⁵Ia tionyo ahi' suele monsombahkon sa'angu' na kalanjang na roti anu binau madi' ginalo'an nu ragi, aijo'mo roti timpodon anu binau labu ginalo'an nu lanya' zaitun, ka' kukis anu monipis anu sinautan nu lanya' zaitun. Ka' sangga'at mule' tionyo ahi' nu sombahkon koloban kaanon ka' koloban anu o inum.

¹⁶Imam tionyo ahi' mombau iwi-iwi' aijo' i ahop nu Tumpu, lantas monsombahkonmo koloban pongampuni dosa', ka' koloban anu opotunu.

¹⁷Hingga-hinggat tiba roti sangkalanjang aijo', ia tionyo ahi' monsombahkon domba lakinyo aijo' hi Tumpu salaku koloban bau pompodame. Ka' suele koloban kaanon ka' koloban anu o inum aijo' tionyo ahi' osombahkon hi Tumpu.

¹⁸Mian anu binalaniatmo aijo' tionyo ahi' mongkismo ubaknyo i sabatan nu Kemah nu Tumpu, ka' o alin mokiijo' i apu tampat nu koloban bau pompodame aijo' anu hau-haunyo pinotunumo.

¹⁹Lapas aijo', de pa'a nu saha'annyo nu domba lakinyo aijo' ingunjangmo, imam tionyo ahi mongala ka' mompotimpas hingga-hinggat tiba sa'angu' na roti timpodon ka' sa'angu' na kukis monipis anu o ala i lima nu mian anu binalaniatmo aijo'.

²⁰Lantas imam tionyo ahi' montajuakon kaanon aijo' salaku anu obee' samata-mata opadonakon hi Tumpu; aijo' bagian anu susi anu baumo bagi nu imam. Lapas aijo' atina'je ka' mian anu binalaniatmo aijo' timbalimo monginum anggur.

²¹Aijo'mo na atulannyo kona hi mian anu binala niatmo; panyo de mian anu binalaniatmo nonjanji'mo koloban anu molingkuduimo atulan nu niatnyo, ia tionyo ahi' mombau sahondo-hondonyo susumo apaa na anu jinanji'nyomo aijo'.

²²Tumpu nompokaumo i Musa

²³da mompoto'i hi Harun ka' hi to ana-anaknyo tukoonyo aha tionyo ahi' montaloakon potatae aiya de aha mombalakatimo bansa Israel:

²⁴O amalakon da Tumpu mombalakati ka' mompotuu' belemiu.

²⁵O amalakon da Tumpu mongkanonongi ka' ma'ima' na kinyonyoaNyo hi belemiu.

²⁶O amalakon da Tumpu mongkalibosi belemiu ka' mombee'i kadamean hi belemiu.

²⁷Ka' Tumpu notatae mule', “De aha monsanggo sanggong-Ku salaku bau pombalakati bansa nu aha Israel, Ku balakatimo na aha.”