Read Saluan NOMBILANGMO 9 Bible Online

NOMBILANGMO 9 - Saluan bible

NOMBILANGMO 9

¹ I bitu'on sa'angu' taun ko ohua'nyo noko pala'imo mae Mesir na aha bansa Israel, Tumpu notataemo hi Musa i padang bolaa Sinai. Tumpu notataemo,

²“I tanggan sampulu' ka' opat bitu'on aiya, salatan sinaa makakinsapmo, aha mian nu Israel tionyo ahi' molame'akonmo Paskah susumo anu tinantukanmo nu atulan.”

⁴Sahingga i Musa nompokaumo aha bansa Israel da molame'akonmo Paskah.

⁵Aha molame'akon aijo' i tampat anu ewa na bone'nyo kiijo' mae i Sinai mamalom tanggan sampulu' ka' opat bitu'on sa'angu'. Iwi-iwi' aijo' binaumo nu aha madi' sala' susumo anu pinalentahkonmo nu Tumpu hi Musa.

⁶Panyo aijo' hi aha daagi' ko mian pa' aha sangkuka anu nahumimi'mo kalana nonsala' kanyangmo anu sinilakamo, sahingga madi'mo timbali molame'akon Paskah i sinaa aijo'. Aha aijo' nambamo nangadap hi Musa ka' hi Harun

⁷ka' notatae, “Kami aiya nahumimi'mo kalana nonsala' kanyangmo anu sinilakamo. Panyo kadaka' kami otewa'mo' sahingga madi'mo timbali monsombahkon koloban hi Tumpu hingga-hinggat tiba to utu-utus mami?”

⁸Tinaaman i Musa, “Tanda'i pe'e sampe aku mohumpakmo pokinde' lengkat mae hi Tumpu.”

⁹Tumpu nompokaumo i Musa

¹⁰da mompoto'i hi bansa Israel, “De daagi' ko anu hi belemiu kabai hi lee' nu belemiu nahumimi'mo kalana nonsala' kanyangmo anu sinilakamo kabai hau-haunyo i uno nu lumambanan majo'on, ia suele tionyo ahi molame'akon Paskah hi Tumpu.

¹¹Panyo molame'akon aijo' tionyo ahi' obau lapasje sa'angu' na bitu'on, obau pihi tanggan sampulu' ka' opat bitu'on ko ohua'nyo. Lame'akon na sinaa aijo', mongkaan domba anu o kolot i sinaa nu Paskah tiba roti anu madi' ogalo'i nu ragi ka' utan anu to paka-pakat.

¹² Boli opotuha' na kaanon haha aijo' sampe dodop subu, ka' buku nu binatang anu osombahkon hi beleng-Ku sa'angu' pe'e boli opato'. Lame'akon na Paskah aijo' susumo anu i uno nu atulannyo.

¹³Panyo mule' anu madi' mahumimi' ka' anu madi' i uno nu lumambanan padahan madi'mo molame'akon Paskah, madi'mo Ku posoop mian anu pinalesayamo hi beleng-Ku kalana ia madi'mo nonsombahkon koloban hi beleng-Ku i tempo' anu tinantukanmo. Mian aijo' tionyo ahi' montanggungmo dosa'nyo.

¹⁴De daagi' ko anu hi belemiu mian anu i salipu'an mae anu ko kahanda' molame'akon Paskah, ia molame'akon aijo' tionyo ahi' susumo atulan anu tinantukanmo. Atulan aijo' opake kona hi toto samian mau mian nu Israel mau pe'e mian anu lengkat mae i salipu'an.”

¹⁵I sinaa pompotinjoanmo Kemah nu Tumpu, tinokamo na kundom nohohungi Kemah aijo'. Salatan pe'e nalomo sangkutnyo tinoka daagi' subu, kundom aijo' otoa sumo apu.

¹⁷De kundom aijo' moliba'mo, aha mian nu Israel montatakimo kemah nu aha lantas mambamo. Ka' iya na pintatau'anmo nu kundom aijo', i tampatmo aijo' na pombauan mule' nu aha kemah.

¹⁸Tumpu na mompalentah bansa Israel aijo' montatakimo kemah ka' suele Tumpu na mompalentah sahingga aha po'ule' mule' mompotinjo. De kundom aijo' daagi' aita' mohohungi Kemah nu Tumpu, aha daagi' tataap jojoong i tampat aijo'.

¹⁹De kundom aijo' pin na jojoong mohohungi Kemah aijo' aha tataap ahi' montuluti atulan nu Tumpu ka' madi' mamba mompala'i tampat aijo'.

²⁰Panyo toto minsan ola to pia-pian sinaa na kundom aijo' mohohungi Kemah aijo'. Maumo pa' mosia, palentah ahi' nu Tumpu na montantukan aha jojoong i sa'angu' na tampat kabai pa' mambamo.

²¹Toto minsan kundom aijo' ola jojoong lengkat pe'e mamalom sangkutnyo toka subu, ka' salatan kundom aijo' moliba'mo daagi' subu, aha suele mule' mambamo. Yayamo na tempo' kundom aijo' moliba', pa' daagi' sinaa kabai malomo, aha tionyo ahi' mambamo.

²²De kundom aijo' daagi' mohohungi Kemah nu Tumpu, pa' uansinaa, sambitu'on, sataun kabai molabi, tempo'nyo aijo' aha tionyo ahi' jojoong i tampat aijo'. De kundom aijo' moliba'mo, atina'je ka' aha mambamo.

²³Aha jojoong i sa'angu' na tampat ka' mamba i tampat sangga'at tionyo ahi' mohongo palentah nu Tumpu susumo anu binee'mo hi Musa.