Read Saluan MIKHA 5 Bible Online

MIKHA 5 - Saluan bible

MIKHA 5

¹Tumpu notatae, “O, Betlehem Efrata beleyum sala'sa'angu' na kota' anu ise' hondo i daerah Yehuda! Panyo atina' hi beleyum Ku hangkatmo na samian anu mongkuasai Israel anu pinolengkatannyo mae daagi' pe'e naipuan mae.”

² Jadi nu pojohokmo nu Tumpu na mian-Nyo anu palesayamo da nu kuasaimo nu sampobali' nu aha, sampeje boune anu tinantukanmo da timbali tinanyo nu anu mongkuasai aijo' mompohampemo Ia anu mongkuasai Israel. Lapas aijo' to mia-mian anu bubu' bansanyo anu kiijo' mae i tampat pinomboan ka' pinompojoongan aha po ule'mo oposa'angu' tiba bansa nu aha.

³De anu mongkuasai aha aijo' tokamo mae, Ia mompalentahmo mian-Nyo anu palesayamo tiba kahosonan ka' mule' kakuasa'an anu lengkat mae hi Tumpu-Nyo. Mian-Nyo anu palesayamo tumuu'mo sanang madi'mo ko anu mompoposia kalana iwi-iwi' na mian i songko-songko na dunia mompototu'umo katalasanggoan-Nyo,

⁴ka' mule' Nu bee'imo kadamean. De suludadu nu aha Asyur montumbuhimo mae lipu' to ka' mohobo'akonmo bentengto, kita suele montipaha'imo ahi' to pola-polaya'to anu to hoso-hoson da mongewamo aha. To pola-polaya'to mompatundu'mo Asyur nu toongon nu aha ka' momposalamatmo kita da madi'mo nu patei nu aha.

⁶ Aha mian nu Israel anu daagi' tinontuha' timbalimo susumo dondu'ok ka' loop hondo anu lengkat mae hi Tumpu da bau bagi nu to bansa-bansa ka' mule' susumo ujan tudunmo mongujani sosu'anon. Aha palesaya memo ahi' hi Tumpu ka' misa'mo hi manusia.

⁷Aha mian nu Israel anu daagi' jinojoong hi aha to bansa-bansa sumomo singa itotonga' nu to bina-binatang anu i uno nu alas kabai itotonga' nu tompukan nu domba anu i daerah nu padang hemput. Singa aijo' minsoopmo mokiijo' itotonga' nu tompukan nu domba haha aijo' ka' mompahampeja'akonmo ka' mule' mombente-bentekmo; madi' ko anu moko ala molapasakon domba haha aijo'.

⁸Israel mompatundu'mo iwi-iwi' na sampobali'nyo ka' mule' mohansunimo aha iwi-iwi'.

⁹Tumpu notatae, “Toka itempo'nyo aitu Ku hopu'imo na ajahan nu belemiu iwi-iwi' ka' mule' Ku hansunimo na to kare-kareta nu belemiu anu bau pahampate.

¹⁰To kota-kota' anu bau babentengan nu lipu' nu belemiu Ku hansunimo ka' mule' iwi-iwi' na benteng nu belemiu Ku tua'akonmo.

¹¹To aji-ajimat nu belemiu Ku hopu'imo ka' mule' iwi-iwi' na anu topo tahi'i Ku laa'mo.

¹²Ku hansunimo na to pato-patong nu belemiu ka' mule' iwi-iwi' na tugu anu o'anggap nu belemiu ko balakatnyo; Belemiu madi'mo monsombah to bala-balang anu oposi bau nu lima nu belemiu.

¹³Iwi-iwi' na tugu nu Pilogot boune, Asyera i lipu' nu belemiu Ku hobo'akonmo ka' mule' to kota-kota' nu belemiu anu ko bentengnyo Ku hansunimo.

¹⁴Tambuha'-Ku anu tala-talalomo hondo sahingga Ku balosakonmo na palabuatan nu aha anu ma'i-ma'idek aijo' iwi-iwi', kona hi aha bansa anu madi' tulu-tulutan hi beleng-Ku.”