Read Saluan MIKHA 6 Bible Online

MIKHA 6 - Saluan bible

MIKHA 6

¹Potombihing pa' apaa na anu nonsaduakon sahingga Israel tinudumo nu Tumpu. Tinjo o, Tumpu ka' pongkalakmo na Belento! Da bungkutnyo tiba puge'nyo mohongo apaa na kahanda' nu taloakon nu Belento.

²O, to bungku-bungkutnyo, o, to lana-lananyo nu dunia, hongo na Tumpu mongkalakmo! Ia ko palakala hi aha Israel mian-Nyo anu palesayamo ka' montuntutmo aha.

³Tumpu notatae, “O, mian-Ku anu palesayamo apaa na anu binaung-Kumo hi belemiu? I han apaa na Aku nomposusa'mo belemiu? Taami mae na Aku!

⁴ Belemiu binoang-Kumo nosabat nompala'i Mesir ka' pinolapas-Kumo da madi'mo binotuanan; Aku nonsaimo i Musa, i Harun tiba Miryam da molaya' belemiu.

⁵ O, mian-Ku anu palesayamo boli okolilimi apaa na anu tinanga'anmo i Balak tomundo' nu aha Moab kona hi belemiu ka' mosia na i Bileam anak i Beor nontaami hi ia. Boli okolilimi apaa na anu jinadimo i jalan olot nu pinombauan kemah kiijo' i Sitim tiba Gilgal. De madi' okolilimi nu belemiu iwi-iwi' aijo' tantu osumbu'je nu belemiu apaa na anu binaung-Kumo kahanda' momposalamat belemiu.”

⁶Apaa na anu tionyo ahi' osombahkonto hi Tumpu, Tumpu kiita i suluga' de kita tokamo mae monsombah Ia? Pa' tionyo ahi' kita momboa sapi' bata'nyo anu ma'ima' hondo na osombahkon salaku koloban anu opotunu na obee' hi Ia?

⁷Pa' Tumpu sanang ahi' de kita momboa hi Ia momada-madala na domba kabai molabi-labi na lanya' nu zaitun? Pa' tionyo ahi' na kita monsombahkon hi Ia anakto anu tumpenyo salaku bau pontobus iwi-iwi' na dosa'to?

⁸Madi'! Tumpu nompoto'imo hi kita han anu ma'ima'. Anu nu tuntut hi kita aijo'mo: da kita mingkalakuan ahi' adin, ka' saja' ahi' balaniat mompahakali-kalibosi ka' mule' madi' ahi' ko bubun ka' tumuu' ahi' mosa'angu' tiba Tumpunto.

⁹Talalo hondo pande na pikilan de mabuhuk hi Tumpu. Ia notataemo daka-daka' hi mian anu jojoong i kota', “Potombihing mae o, belemiu anu sinihukmo i kota'!

¹⁰I laigan nu to mia-mian anu ma'idek na palabuatannyo daagi' ko halata' anu i humpak kalana lewa' nongakali. Aha mompake takalan anu madi' totu'u, aijo' sa'angu' na palabuatan anu Ku ka'ideki. Mian anu mombau sumo aijo' Ku hukum.

¹¹Te Aku mongampuni mian anu mompake timbangan anu madi' totu'u?

¹²To mia-mian anu kaya i kota nu belemiu mongkabisa'i mian anu kasiasi ka' mule' belemiu iwi-iwi' singkap ahi' baleko'.

¹³Uuka aiya Aku montampu'unimo monsantip ka' mohansuni belemiu kalana dosa' nu belemiu iwi-iwi'.

¹⁴Belemiu mongkaan panyo madi' mobosu, ola mule' ahi' tataap mo'ohop. Belemiu mongato bala-balang panyo madi' opoko ala ojagai. Maumo pa' apaa na anu ojagai nu belemiu Ku hansunimo i uno nu pahampatean.

¹⁵Belemiu montugan gandum panyo madi' ahi' mohumpak hasinnyo. Bua' nu zaitun obau nu belemiu lanya' panyo madi'mo moko ala mompake lanya'nyo. Belemiu mompao' anggur da o'ala na ueenyo panyo madi' jadi na monginum.

¹⁶ Iwi-iwi' aijo' jadimo saidi' mae kalana belemiu nontulutimo palabuatan anu toto ide-idek hi Tomundo' Omri, tiba anaknyo aijo'mo i Tomundo' Ahab. Belemiu nontulutimo sipa-sipat nu aha. Kalana aijo' Ku hansunimo na belemiu, ka' belemiu lewa'mo opobau-bau ka' mule' lewa'mo o'alu nu iwi-iwi na bansa.”