Read Saluan MIKHA 7 Bible Online

MIKHA 7 - Saluan bible

MIKHA 7

¹Silakamo na aku! Aku sumomo mian anu no'ohopmo mamba montipu bua' nu kau' padahan nokolapasmo natempo'nyo nimbua'. Madi'mo daagi' ko bua'nyo na to kau-kau' Bua' nu anggur tiba bua' kau' ara anu toto ima-ima' iwi-iwi' iningkotmo tinipuan.

²Mian anu madi' tageo' na kinyonyoanyo imadi'mo ko anu jinojoong ilipu', mian anu tulu-tulutan hi Tumpu madi'mo daagi' kinabot. Batu-batu mian montanda'imo kasampatan kahanda'mo mompatei. Toto samian nompokonamo so'o da bau pohakop sangko mian.

³Iwi-iwi' aijo' pande hondo na mombau palabuatan anu ma'idek. Mian anu ko pangkatnyo tiba mian kopian momoita doi bau ponsogo' ka' to tu'a-tu'anyo mompakisakon pongka'oho' nu aha, sumo aijo' na aha nombau kasangaja'an hingga-hinggat.

⁴Anu talalomo ma'ima' na kinyonyoa ka' mule' anu talalomo tageo' na kinyonyoanyo aijo' hi aha panyo sumo-sumomo ahi' hemput anu kohii'nyo madi' kokaliangannyo. Tinokamo na tempo'nyo Tumpu mohukumo mian-Nyo anu palesayamo susumo anu toho'mo pinotuka'-Nyo hi aha to nabi-nabi-Nyo ka' to nabi-nabi-Nyo na nompoto'imo hi aha. Uuka aiya tinokanmo nu pahantuda'an hi posi bubu'mo aha.

⁵Boli mompalesaya anu mompaha ohani laigan nu belemiu, boli montaha'imani sangko sangalu nu belemiu. Obala'ingati na belemiu motatae, mau mule' anu mohongo posi bengkele' nu belemiu.

⁶ Kalana de tempo'nyo tokamo mae mian anu sa'a-sa'angu' na laigan mompaha ka'i-ka'idekimo, anak mo'ane mongalumo tuumanyo, anak boune panggagamo hi tinanyo ka' mule' monian boune mahanggagamo tiba tina nu moniannyo.

⁷Panyo kita na montaha'imani ahi' Tumpu; ka' totu-totu'u ahi' na kinyonyoanto montanda'i Tumpunto. Ia mohongomo dosa' anu binauntomo ka' momposalamatmo kita.

⁸Madi' ko bau pikilan nu aha to sampo-sampobali'to na balame-lame' kalana kita ihansunmo. Kalana maumo ahi' kita pinatundu'mo, panyo kita po ule' ahi' tootinjo. Uuka aiya kita i unomo nu pikat panyo Tumpu na monjingkai mae kita.

⁹Kita binaladosa'mo hi Tumpu kalana aijo' uuka aiya kita tionyo ahi' mongoa'imo kapusan-Nyo. Panyo madi'mo pin Ia monsangaja'imo kita ka' mule' mombee'imo ka adilan hi kita. Ia monsabatakonmo kita ka' momboamo ijingka; kita mongoa'imo kasalamatan lengkat hi Ia.

¹⁰Naipuan mae sampobali' mongalu kita, aha notatae, “Iya mae na Tumpu nu belemiu aijo'?” Panyo uuka aiya aha montoamo apaa na anu nu bau Tumpu, hi kita, ka' aha ma'ambangmo. Kita monsakisamo to sampo-sampobali'to ka' opantundu'tomo ka' opahampeja'akonmo susumo hensek i jalan.

¹¹O, Yerusalem! Tinokamo na tempo'nyo belemiu po'ule'mo mombau pagan mesen nu kota' nu belemiu.

¹²I sinaa aijo' daerah nu belemiu lengkat iyaya mae — lengkat mae i Asyur, sasu kabete'an, lengkat mae i Mesir sasu salatan, ka' mule' lengkat mae i daerah Kaunyo nu Efrat, lengkat mae i santoa nu ndalangon ka' mule' lengkat mae i to bungku-bungkutnyo anu majo'on.

¹³Panyo tano' timbalimo kun kalana palabuatan anu ma'idek nu mian anu jojoong ikiijo'.

¹⁴O, Tumpu ojagaiakon mae na mian anu palesayamo hi Belento, mian anu pinile'anmo nu Belento. Aha nosi tademo na jinojoong i uno nu alas anu ewa hondo i daerah nu tano' anu ma'omuk. Bisa-bisa aha mohumpak anu okaan i padang hemput kiijo' mae i Basan ka' mule' kiijo' mae i Gilead susumo tempo'nyo naipuan mae.

¹⁵Pombau mae anu okabangangi hi kami, o, Tumpu susumo anu lewa'mo binau nu Belento naipuan mae tempo'nyo Belento nomboamo kami nosabat lengkat mae i Mesir.

¹⁶Da iwi-iwi' na bansa montoaje han aijo' ka' ma'ambangmo kalana aha tonginau'mo talu' iwi-iwi' na kahosonan nu aha madi' ahi' ko alati'nyo apa-apaa. Madi' ko anu nupisumbu-sumbu' nu aha sahingga madi'mo daagi' moko ala motatae kabai mohongo.

¹⁷Aha dumadangkangmo i tano' susumo ulo. Kalana mabuhukmo ka' langkakatanmo aha mosabatmo mae aijo' i binabentengan nu aha, lantas tokamo mae hi Belento o, Tumpu mami.

¹⁸Madi' ko Tumpu anu sumo Belento, o, Tumpu anu mongampuni dosa' nu mian anu pinile'anmo nu Belento aijo'mo mian anu daagi' tinontuha'. Madi' sampemo sidu-sidutu' na Belento motambuha'; panyo ola ahi' belento sanang na mompotoa kanonongan nu Belento anu madi' ko batasnyo aijo'.

¹⁹Belento mongkanonongi mule' kami ka' mongampuni kami. Iwi-iwi' na dosa' mami Nu peja-peja'mo ka' mule' Nu bahetakonmo mokaiyong ilana nu ambai! Kona hi aha mian nu Belento anu palesayamo, lee' mae i Abraham ka' mule' i Yakub! Nu potoamo na ka' ima'an tiba mule' kanonongan nu belento anu madi' ko batasnyo aijo' susumo anu jinanji'mo nu belento hi mompolee' mami daagi' pe'e naipuan mae. 15