Read Saluan NAHUM 1 Bible Online

NAHUM 1 - Saluan bible

NAHUM 1

¹ Sumo uuka na potuunon nu Tumpu mongkona aha Ninewe. Potuunon aijo' pinonyata ihan anu pinotoa hi Nahum samian na nabi anu nolengkat mae i Elkos.

²Tumpu madi' mongka'oho' ko anu molingkudui, mian anu molawan Ia tionyo mohumpak hukuman. Kalana talalomo pinusa, Ia nombalosimo kasala'an nu aha.

³Memang Tumpu madi' malia' pusa, panyo Ia mule' talalo ahi' balakuasa sahingga de ihe na mombau kasala'an, madi' Nu pobebas ihukuman. Iya mae na kalajangan nu Tumpu ikiijo' tokamo mae na antong anu daka' hond, itampat panimpeja'an nu tengke-Nyo ikiijo' abu' timbali kundom.

⁴Ia nonsegaimo ambai ka' nompo 'otimo iwi-iwi' na kaunyo pinojadimo notiis na ueenyo. Bungkutnyo nu Karmel ka' iwi-iwi na padang anu kiijo' i Basan madi'mo na omuk ka' kiijo' i Libanon nagayoumo iwi-iwi' na bunga-bunga.

⁵Bungkutnyo iwi-iwi' ilakatnyo i ahop-Nyo, ka' puge'nyo suele na enamo iwi-iwi'. De Tumpu tokamo mae dunia langkakatanmo ka' iwi-iwi' na anu monjojoongi suele nu lakatmo.

⁶Ihe na moko ala montahan de Tumpu pusamo? Madi' ko anu madi' nu kona de Ia motambuha'mo? Ia mompotudunmo kapusan-Nyo anu inoakmo susumo apu, batu hansunmo ka' timbalimo abu' i ahop-Nyo.

⁷Tumpu aijo' manonong, Ia monjagai mian-Nyo anu pinalesayamo tempo'nyo aha sinusi'mo; Ia monjagai mian anu ninsoopmo palesaya hi Ia.

⁸Susumo iyaba' anu daka' monganjuhakonmo; ka' ihansunan-Nyomo na to sampo-sampo bali'-Nyo. Aha anu baani mongewa Ia, pinotudun-Nyomo na kasilakaan sahingga sinilakamo.

⁹Maumo pa' apaa na anu obau nu beleyum mongewa Tumpu, madi' mingkaliangan. Madi'mo Ia mombalosakon sampobali'-Nyo, sampe pinduan na kasala'an nu aha to sampo-sampo bali'-Nyo.

¹⁰Beleyum opapuimo susumo hat anu nanggasmo, susumo kuhat anu ko hii'nyo anu ningkalekotmo.

¹¹Lengkat atina' hi beleyum o Ninewe tokamo mae na samian anu kaho tanga'an ma'idek. Ia nombaumo tanga'an da mongewamo Tumpu.

¹²Sahingga notataemo na Tumpu hi aha Israel mian-Nyo anu pinalesayamo, “Maumo aha to mia-mian nu Asyur aijo' mahoson ka' konjoo'nyo da'isan panyo aha ohansunimo lantas mingkotmo. Binaung-Kumo na belemiu da sinansala panyo Aku madi'mo mombau mule' sumo aijo'.

¹³Uuka aiya kuasa nu Asyur o ingkotimo madi'mo mompalentah belemiu ka' Ku botu'imo na lante anu nonsegoti belemiu.”

¹⁴Sumo uuka na putusan nu Tumpu mongkona bansa Asyur, “Aha madi'mo daagi ko tulunan anu mombolosakon bansanyo. To pato-patong nu pilogot anu daagi kiijo' i laigan ponsomban, Ku hansunimo. Polamunan bansa Asyur Ku toukaimo kalana aha madi'mo pantas na tumuu'!”

¹⁵ Soba toa samian na anu sinai mae tokamo mae montulu iwi-iwi na bungkutnyo momboa mae lele ma'ima' lele inguntungmo na nahampate. O bansa Yehuda lame'akon na sinaa daka' nu belemiu ka' bayanmo na anu jinanji'mo nu belemiu hi Tumpu. Lipu' nu belemiu madi'mo daagi opalentah nu to mia-mian anu ma'idek na kinyonyoanyo. Aha ihansunmo iwi-iwi'.