Read Saluan NAHUM 2 Bible Online

NAHUM 2 - Saluan bible

NAHUM 2

¹O Ninewe Potombihing pe'e mae! Anu mongka'oho' mongidei beleyum ningkotmo! Ojagai na to bente-benteng ponjagaian! Ojagai na jalan! Posadiamo da mahampatemo. (

²Totu-totu'u Tumpu po'ule'mo mompokopiani Israel da timbali po'ule' ma'ima' susumo u'utu mae tempo'nyo ma'isa pe'e binulingan nu sampo bali'.)

³Kanta nu sampo bali' buhitnyo momea', ka' buhit nu baju'nyo kakanannyo mimbalu-balu' baso'. Sampobali' sinadiamo na montumbuhi mae nu potolokengkeng. Mimbalu-balu' apu, karetanyo besak jongkilaban. Iwi-iwi' na ajahannyo nahalumpatanmo.

⁴Ijalan iwi-iwi na karetanyo lumajang madi' ko anu monsalempodi. Ilapangan aha aijo' paintumputanmo. Otoa sumomo ahi' potong noakmo, mopadeka talalo hondo malia' sumomo ahi' kilat.

⁵To sulu-suludadu anu matangkas na pangkatnyo ilagamo da mongahopimo, aha ola ahi' toto sumpun, de aha montumbuhimo. Ko sia-sia' hondo na aha mokiijo' ipagan mesen nu kota', bau pontumbalakon sampamo pinotinjo.

⁶Tumban nu kaunyo nu uee iwi-iwi' pinaha bukamo, sahingga ginago'mo songko-songko na laigan nu tomundo'!

⁷Tomundo' boune pinoko alamo ihakop, to posa-posaihon boune anu monjagai tomundo' boune aijo' nolokihismo, ka' nontando'imo, aha notusa'mo susumo tomonsi' dara, ka' nontalundangimo saha'an kalana sinusa'mo ko anumo sinilaka.

⁸Mian da'isan nu Ninewe nopadekamo sinumolinsakmo namba nonsaui bunga-bunga, sumomo uee anu nosabatmo mae ipinongompoknyo anu notobamo. Daagi ko loboo' “Belenti, belenti!” panyo madi' ko anu nongka'oho' ninsusule'.

⁹Agoimo na mosoni' iwi-iwi' tiba salaka! Halata' i kota' aiya talalo hondo manjoo'!

¹⁰Ninewe ihansunmo ilingmo ka' kinunmo. Kinyonyoa natawasmokalana nabuhukmo. Ike-ike' ilundengmo ka' ilakatnyomo. Ohup nu mian iwi-iwi' singkapmo ine'es hondo.

¹¹Iyamo mae na kota' aijo' uuka aiya? Kota' anu sumomo liang tampat kalukutan nu singa? Tampat nu to ana-anak nu singa obee'i mongkaan, tampat anu lewa' kalambanan nu singa lakinyo tiba behenyo tampat anu madi' ko anu mompoposia to ana-anaknyo?

¹²U'utu mae kiijo' mae ponsa'uan nu singa kaanonnyo, ka' nu bini-binit nu bee' hi tinanyo ka' mule' hi anaknyo. Ia mompobuke liangnyo nu antok anu binini-binitnyomo anu mamba sina'unyo.

¹³“Aku aiya sampo bali' nu beleyum,” na koonyo nu Tumpu Anu Daka na kuasanyo. “To kare-kareta nu beleyum Ku papuimo ingko-ingkot. Suludadu nu beleyum silakamo i uno nu pahampatean. Ka' Ku alamo na iwi-iwi na apaa anu ingalamo nu beleyum hi mian sangga'at. Apa-apaa na anu nu tuntut nu to mia-mian anu nu sai nu beleyum madi' daagi ohongo.”