Read Saluan NAHUM 3 Bible Online

NAHUM 3 - Saluan bible

NAHUM 3

¹Silakamo na kota' aiya anu talalomo na leko' manjoo' ka' anu pinateannyomo, kahomo balang anu pinahuhuakon ka' anu ingagoan.

²Potombihing na penepes nu pondoke tiba daladak nu loda, galupak nu ajahan ka' suele kareta tolo-tolo tumpa.

³Tompukan nu suludadu anu nonsake'i ajahan binaanimo hondo na nontumbuhi, bajak jinoliotanmo ka' talombo' jinongkilabanmo. Mian anu sinilakamo madi'mo pinoko bilang na bangke' nu mian anu sika-sika tambun. Sahingga mian anu lumajang tosumpunmo.

⁴Ninewe anu lewa' masala' hau-haunyomo obee'i hukuman. Katingkai'annyo totu-totu'u nonggodamo kinyonyoa. Manjoo' na bansa anu pinokonannyomo paha-pahaik, ka' ingindeke'nyomo na nonsale'i.

⁵Tumpu Anu Daka' na Kuasanyo notataemo, “O Ninewe, beleyum Ku silakaimo! Baju' nu beleyum Ku ukatakonmo i ahop nu to bansa-bansa, sahingga node nu beleyum nu toamo nu aha.

⁶Ku baumo na beleyum susumo balang anu mohumimi'i, Ku pahambunu'akonmo na beleyum nu anu sala', Ku pojadimo na beleyum da bau balang anu lewa' otoa nu mian.

⁷Anu montoa beleyum matikojo'onmo ka' motatae, ‘Ninewe imadi'anmo! Anu na'idekmo hondo! Ihe na suele susa'mo na kinyonyoanyo sama-sama tiba ia? Madi' ko anu mongka'oho' toka mae mongindeko ia.’ ”

⁸O Ninewe te toho'mo mule' beleyum na lebe ma'ima' molingkudui Tebe puso nu kota' Mesir? Tebe suele tampatnyo ibiwi nu kaunyo anu mongompo susumo pagan mesen. Ya Kaunyo nu Nil aijo'mo na benteng salaku bau kahosonannyo.

⁹Tebe mompalentah Sudan tiba Mesir ka' mule' kakuasa'annyo madi' ko batasnyo; Libia tiba Put aijo'mo na sangalunyo.

¹⁰Maumo sumo aijo' mian anu jojoong i Tebe i hakopmo ka' binoamo i pinompojoongan aha. I iwi-iwi na sangan nu jalan to ana-anaknyo lewa'mo binanda ka' sinilakamo. To pola-polaya' nu aha pinungumo nu lante ka' binagi-bagimo nu aha anu nohakop mae.

¹¹O Ninewe beleyum suele poso'mo kalana malangumo. Beleyum suele bala'usaha da madi' nu poposia nu sampo bali' nu beleyum iwi-iwi'.

¹²Iwi-iwi' na benteng nu beleyum sumomo kau' ara anu nahambua'mo ka' mule' nahamo. De kau' ara aijo' o hunjong bua'nyo haha aijo' motohontangmo i uno nu nganga' nu mian anu kahanda'mo mongkaan.

¹³To sulu-suludadu nu beleyum lupemo susumo boune ka' lipu' nu beleyum totu-totu'u madi'mo moko ala na mongahopi sampo bali'. Apu montoyo'imo iwi-iwi na supat nu sabatan daka' nu belemiu.

¹⁴Taukmo na uee anu oposadia hau-haunyo beleyum otikumo, ka' opohoson na benteng iwi-iwi' nu beleyum! Peja-peja' na lega da bau tela ka' oposadia na ponsetakannyo!

¹⁵Maumo pa'apaa na anu nu bau ola palasuma kalana beleyum totu-totu'u mohopu'mo mopapu kabai silaka i uno nu pahampatean. Beleyum mohopu'mo susumo hasin nu ale' anu nu kaanmo nu kihi-kihi'. Beleyum mompaka panjoo'mo susumo kihi-kihi'!

¹⁶To daga-dagang nu beleyum nolingkuduimo konjoo'nyo nu to manda-mandala' aita i langit. Panyo uuka aiya aha nohopu'mo susumo kihi-kihi' nombokamo polipiknyo lantas ilumahapmo pa' noya na kinalambanannyo.

¹⁷To mia-mian daka' tiba to pega-pegawe nu beleyum sumomo sampahas na kihi-kihi' anu nihohung'mo nihohungmo i iwi-iwi na pagan mesen tempo'nyo nu bakin. Panyo salatan batu nu sinaa binete'mo aha sampamo lumahap; madi' ko samian pe'e na monsumbu' pa' noya na kinalambanan nu aha.

¹⁸O tomundo' nu lipu' Asyur! To gubernur-gubernur nu beleyum sinilakamo ka' mule' to bupati-bupati nu beleyum ihoyotmo sidu-sidutu'. Mian da'isan nu beleyum noga'a-ga'atmo namba i bungkutnyo ka' madi'mo ko samian pe'e na anu moko ala monsule'akon mae aha.

¹⁹Bela nu beleyum madi'mo opoko ala opakuli'i ka' mule' madi'mo opoko ala da opa'alinakon. Iwi-iwi' na mian anu nohongomo lele kinahansunan nu beleyum nohapa'imo lima salaku tanda ilame'mo. Kalana iwi-iwi' na mian nongoa'imo kasansala'an kalana palabuatan nu beleyum anu ma'i-ma'idek atina' anu madi'mo kokamingkotannyo.