Read Saluan HABAKUK 1 Bible Online

HABAKUK 1 - Saluan bible

HABAKUK 1

¹Aiyamo na potuunon anu pinoto'i nu Tumpu hi Nabi Habakuk.

²O Tumpu sampe toka hipian na aku tionyo ahi' momoita da otulungi? Hipian na Belento mohongo mae ka' momposalamat kami da bolimo osansalai?

³Kadaka' Belento ola mompojohok aku montoa palabuatan anu ma'idek nanjo-nanjoo'mo aijo'? Te toho' mule' ola o intim nu Belento na montoa palabuatan anu susumo aijo'mo na konjoo'nyo? Iyaya mae daagi ko kahansunan ka talalo buhingison ka' pahantuda'an ka' mule' po ualian.

⁴Atulan madi' otoongi totu-totu'u ka' mule' ka'adilan madi' toho' otinjohakon. Mian anu ma'idek na kinyonyoanyo lebemo molingkudui aha mian anu madi' tageo' na kinyonyoanyo, jadi ka'adilan obali-balikakonmo nu aha.

⁵ Lapas aijo' Tumpu notataemo hi mian-Nyo anu pinalesayamo, “Opalahatikan na to bansa-bansa anu mompaha ohani tiba belemiu sahingga belemiu bangang ka' jonomo na mata kalana tinokaje hi belemiu na Aku nombaumo apa-apaa anu madi' opalesaya nu belemiu de ola osisikakon hi belemiu.

⁶ Bansa Babel anu baani ka' singgi aijo' Ku pojadimo bansa anu balakuasa. Aha mosabatmo mae lengkat ilipu'nyo ka' monsongkohimo songko-songko na dunia da mompatundu'mo iwi-iwi' na bansa sangga'at.

⁷Iyaya mae aha mompopo buhukmo; Aha takabun hondo madi' montalima iwi-iwi' na atulan, kasuali anu sosok tiba pongka'oho' nu aha.

⁸Ajahan nu aha lebe malia' molingkudui macan tutul ka' lebe singgi molingkudui serigala anu hau-haunyo no ohopmo. Tompukan nu suludadu nu aha lengkat mae i iwi-iwi na lipu' anu majo'on; aha toka mae sumomo tomonsi' bonyia' nonsabutmo kaanonnyo.

⁹Suludadu nu aha montumbuhimo da mombaumo palabuatan anu ma'idek. Iwi-iwi' na mian nu lakatmo na montoa aha aijo' tinokamo mae. Anu ihakopmo nu aha madi'mo opokolekeng na ko daisannyo.

¹⁰To tomu-tomundo' ola nu wen nu aha ka' mule' to pega-pegawe anu toto tangka-tangkas na pangkatnyo ola suele lewa' nu kokojoi nu aha. Iwi-iwi na benteng nu anggap nu aha madi' ko gunanyo ka' tinabuhanmo nu aha nu tano' lantas tinumbuhanmo nu aha na benteng aijo'.

¹¹Lantas sumo pinuhakon nu mombuun nambamo na mian haha aijo' anu monganggap kahosonan nu aha pokakanamo sumo pilogot nu aha.”

¹²Tumpu, daagi pe'e naipuan mae Belento memang Tumpu. Belento Tumpungku anu susi' sampe toka sidu-sidutu'. Tumpu, Tumpungku anu monjagai mae aku, bansa Babel aijo' pinile'anmo nu Belento ka' pinobaanimo nu Belento da mohukum kami.

¹³Panyo mosia na Belento ka' moko ala montoa mian haha aijo' anu ma'idek na kinyonyoanyo ka' anu buhingison aijo'? Temisa' Belento na talalo ahi' susi' na montoa palabuatan ma'idek haha aijo'? Temisa Belento na mongoa'i ahi' monguahi na montoa palabuatan anu madi' adin? Jadi kadaka' Belento ola momohokot salatan montoa mian anu palesaya ohansunimo nu mian anu palaganta?

¹⁴Kadaka' manusia o anggapmo nu Belento susumo ikan i ambai ka' susumo sipuyu anu madi' ko polaya'nyo?

¹⁵Bansa Babel nohakopmo to mia-mian nu peka susumo au'aitu aha aijo' ikan. Mian haha aijo' ihela'mo i uno nu buani ka' bansa Babel binalasana-sanangmo kalana aha nohumpakmo hasinnyo.

¹⁶Lapas aijo' buani aijo' nu sombahmo nu aha ka' mule' nu sombahkonmo nu aha na koloban saba' kalana buani aijo' sahingga aha nohumpakmo lejeki manjoo' hondo ka' binilahimo na kantumuu'an nu aha.

¹⁷Kadaka' aha saja'mo mongkeat bajak nu aha ka' mompatei to bansa-bansa ka' madi'mo daagi ko kinyonyoa mongampuni?