Read Saluan HAGAI 1 Bible Online

HAGAI 1 - Saluan bible

HAGAI 1

¹ I taun kino ohua'nyomo na i Tomundo' Darius nompalentah Persia i tanggan sa'angu' bitu'on ko anomnyomo Tumpu notataemo nonggunakon i Nabi Hagai. Potuunon nu Tumpu aijo' tinujukannyo hi Zerubabel anak i Sealtiel, gubernur nu Yehuda tiba mule' hi Imam Daka' Yosua anak i Yosadak.

²Tumpu Anu Daka' na kuasanyo notataemo hi Hagai, “Bansa aiya montaloakon koonyo nu aha ma'isa pe'e tempo'nyo na po ule' mombau Laigan-Ku.”

³Lapas aijo' pinoto'imo nu Tumpu hi Nabi Hagai da opotoka hi mian-Nyo anu pinalesayamo,

⁴“O mian-Ku anu pinalesayamo pa' tinokamo na tempo'nyo belemiu jojoong i unonu laigan anu ma'ima' an ka' madodo, yo aijo' Laigan-Ku me susumo laigan anu na'idekmo?

⁵Soba palahatikan na ka'ada'an nu belemiu!

⁶Belemiu notuganmo manjoo' hondo na bine' panyo anu pinadak ola sangkiding. Belemiu daagi ko anu okaan panyo madi' mobosu. Belemiu daagi ko anggur panyo madi' sukup mongosai kinyonyoa nu belemiu. Belemiu ko pakean panyo madi' sukup na momamuti butong nu belemiu.' Ka' tambo anu ohumpak nu anu mongala tambo na mian madi' sukup na montanggungi kapalaluan nu aha.

⁷Ma'isa sinumbu' nu belemiu kadaka' han aijo' jinadimo?

⁸Uuka aiya pindakomo aita puge-puge'nyo ka' pongala mae kau' lantas baumo na Laigan-Ku; sahingga Aku mongoa'imo sanang ka' mule' Aku osombahmo mule' susumo bau-baunyo anu sahondo-hondonyo. Soba palahatikan na ka'ada'an nu belemiu!

⁹Belemiu montaha'imani hasin nu ale' anu ugaat molabi-labi pada han anu ohumpak nu belemiu ola sangkiding hondo; oboa nu belemiu na aijo' panyo hasinnyo anu opadak nu belemiu aijo' Ku puhakonmo sahingga ola mingkot nutilahabakon nu mombun. Kadaka' Ku bau sumo aijo'? Makisudnyo aijo'mo: Kalana Laigan-Ku daagi susumo laigan anu na'idekmo sadangkan belemiu iwi-iwi' na pagala ahi' mombau laigan nu belemiu toto samian.

¹⁰Mokonyo aijo' madi'mo ko ujan tudun mae ka' madi'mo ko anu tumuu' na anu osu'an.

¹¹Pinotokang-Kumo mae na sinaa nontimpa'i tano' ka' to puge-puge'nyo ka' mule' sinin na ale' nu gandum ka' mule' sinin na ale' nu zaitun ka' iwi-iwi' na anu sinu'an i tano' aiya nanggasmo ka' suele manusia tiba binatang iwi-iwi' anu ingusahakonmo nu belemiu.”

¹²Lapas aijo' i Zerubabel tiba Yosua ka' iwi-iwi' na mian Israel anu ninsusule'mo mae lengkat itampat pinomboan ka' pinompojoongan kiijo' mae i Babel nontulutimo potatae i Hagai posaihon nu Tumpu aijo'. Aha nombaumo apaa na anu pinalentahkonmo nu Tumpu hi aha kalana nabuhukmo hi Tumpu.

¹³Lantas pinotokamo i Hagai hi mian da'isan na potuunon nu Tumpu tukoonyo, Hagai Tumpu binalajanji'mo monjagai aha.

¹⁴Sumo aijo' na Tumpu nongkakeha' kinyonyoa i Gubernur Zerubabel, tiba i Imam Daka' Yosua ka' mule' iwi-iwi' na mian anu ninsusule'mo mae lengkat itampat pinomboan ka' pinompojoongan aha da iwi-iwi' mokalajamo mombau Laigan nu Tumpu Anu Daka' Na-Kuasanyo, Tumpu Allah nu aha.

¹⁵Aha nontampu'uni nokalaja i tanggan uampulu' ka' opat bitu'on ko anomnyomo i taun ko ohua'nyomo na i Tomundo' Darius nompalentah.