Read Saluan HAGAI 2 Bible Online

HAGAI 2 - Saluan bible

HAGAI 2

¹I tanggan uampulu' ka' sa'angu' bitu'on anu kopopitu'nyomo i taunmo ai-aijo' Tumpu notatae mule' hi Nabi Hagai.

²Tumpu nonsaimo i Hagai da mompoto'i hi Gubernur i Zerubabel, i Imam Daka' Yosua ka' hi mian da'isan da opoto'i na potuunon sumo uuka,

³ “Pa' daagi ko anu aiya hi belemiu na monsumbu' mosia na ko ima'nyo nu Laigan-Ku u'utu mae? Uuka aiya mosiamo na ka'ada'annyo de o'ala hi pikilan nu belemiu? Temisa' madi'mo ahi' ma'ima' na otoa?

⁴Maumo sumo aijo' boli ahi' hente na kinyonyoa nu belemiu iwi-iwi'! Lausakonmo na kalaja aijo' kalana Aku tataap montulungi belemiu.

⁵ Salatanmo belemiu nosabatmo mae lengkat i Mesir Aku binalajanji'mo saja' monjagai belemiu. Jadi boli belemiu bata-bata.

⁶ Madi'mo pin na tempo'nyo Ku tenenggohimo na langit tiba katano'an tiba ambai.

⁷Iwi-iwi' na bansang Ku pokalangkabutmo ka' mule' halata' nu aha nu boamo mae nu aha sahingga Laigan-Ku mobuke'mo nu kakaya'an nu aha.

⁸Iwi-iwi' na mosoni' tiba salaka i dunia aiya Aku na tumpunyo.

⁹Laigan-Ku anu salaje binau lebemo hondo ma'ima' molingkuduimo anu u'utu mae, ka' ia aiya Ku bee'imo ka'amanan ka' mule' kabilahian i uno nu kantumuu'an hi aha bansang-Ku.” Tumpu Anu Daka na Kuasanyo na notataemo.

¹⁰I tanggan uampulu' ka' opat bitu'on ko osio'nyomo i taun ko ohua'nyomo na i Tomundo' Darius nompalentah, Tumpu Anu Daka na Kuasanyo notataemo hi Nabi Hagai.

¹¹Ia notatae, “Poita kaputusan nu to ima-imam mongkona han aiya.

¹²Da bisuanyo daagi ko mian anu mongala sangkuyu na antok nu binatang anu okolobanakon bau palasombahan hi Tumpu lantas nu posulukmo i tapi'an nu juba'nyo ka' nu boamo ilaigannyo ka' lapas mae juba'nyo aijo' samantala puso-pusok ia so'mo monsala' kanyang roti kabai pa' apa-apaa na anu ingunjangmo, kabai anggur, kabai lanya' nu zaitun, kabai pa' apa-apaa na anu okaan, saba' iwi-iwi' aijo' pa' daagi ahi' susi'?” Salatan pinokilawamo i Hagai na iwi-iwi' aijo' to ima-imam nontaamimo, “Madi'mo.”

¹³ Lapas aijo' po ule' mule' pinokilawa i Hagai, “De bisuanyo daagi komian anu nahumimi'mo kalana ia nonsala' kanyangmo mian anu sinilakamo ka' lapas aijo' ia monsala' kanyang mule' sala'sa'angu' na anu okaan pa' kaanon aijo' suele jadimo mahumimi'?” To ima-imam nontaami, “Ii' memang ahi' nahumimi'mo!”

¹⁴Lapas aijo' i Hagai notatae mule'; “Tumpu nontaloakonmo tukoo-Nyo atulan aijo' mongkona suele aha mian nu Israel ilipu' aiya ka' mule' mongkona suele iwi-iwi' na anu nu bau nu aha. Jadi apaa na anu nu sombahkon nu aha i mezbah aiya inahumimi'mo.”

¹⁵Tumpu notatae, “Soba, palahatikan apaa na anu jinadimo ma'isa pe'e tinoka isinaa aiya, aijo'mo ma'isa pe'e Laigan-Ku aiya pinoko ima'an! Mosiamo ahi' na ka'ada'an nu belemiu tempo'nyo aitu?

¹⁶Belemiu nambamo nontoa tambulan nu gandum ka' aupe'e ahi' mohumpak 200 na kilogram na gandum, panyo taalu' ola ahi' 100 na kilogram. Belemiu mamba kahanda' montauk 100 na liter na anggur aijo' igumbang nu anggur panyo anu ikiijo' ola ahi' 40 na liter.

¹⁷Aku nontudunakonmo mae baleba' mapanas tiba ujan batu da mongidei sinin na hasin nu ale nu belemiu panyo belemiu madi' ahi' nongka'oho' ninsusule'mae hi beleng-Ku.

¹⁸Sinaa aiya tanggan uampulu' ka' opat bitu'on ko osio'nyomo pundasi nu Laigan-Ku noko baumo! Palahatikan apaa na anu jinadimo mulai sinaa uuka.

¹⁹Maumo ahi' madi'mo ko gandum anu tinontuha' tiba kau' anggur, kau' ara, kau dalima, tiba kau' zaitun anu ma'isa nimbua' panyo mulai sinaa uuka Aku mombalakatimo belemiu!”

²⁰I sinaamo aijo' suele aijo'mo tanggan uampulu' ka'opat bitu'on ko osio'nyomo, Tumpu nompotuunmo anu kopinduannyomo hi Hagai,

²¹Da opotokakon hi Gubernur Zerubabel. Koonyo nu Tumpu, “Madi'mo daagi pin langit ka' tano' Ku tenenggohimo,

²²to kala-kalaj'an Ku ideimo ka' mule' kuasa nu aha Ku hansunimo. Iwi-iwi' na kareta anu bau pahampate tiba anu mompojalan Ku bali-balikakonmo; iwi-iwi' na ajahan mohopu'mo ka' mule' anu monsake'i mompaha pate-pateimo.

²³I sinaa aijo' beleyum Zerubabel posaihon-Ku, Ku hangkatmo da mompalentah atas sanggong-Ku. Saba' beleyum na anu pinile'an-Kumo.” Tumpu Anu Daka Na Kuasanyo na notataemo. 1