Read Saluan ZAKHARIA 11 Bible Online

ZAKHARIA 11 - Saluan bible

ZAKHARIA 11

¹O, Libanon tuhea'akon mae iwi-iwi' na tumban nu belemiu, da apu montoyo'imo ingko-ingkot na kau' aras nu belemiu.

²O, kau' daru tando'imo kalana notua'mo na kau' cemara iwi-iwi', kau' anu toto kukuut notua'mo. O, kau anu toto daka-daka' i Basan haangmo. Kalana alas anu toto ewa-ewa notoyo'mo.

³Potombihing na tando' nu mian anu singkap balakuasa kakaya'an nu aha imadi'anmo hondo-hondo. Potombihing na huu' nu to singa-singa i uno nu alas; kalana ihansunmo na kajojoongan nu aha tutuus Kaunyo nu Yordan.

⁴Tumpu, notataemo hi belengku, “Soba bau au'aitu beleyum atina' polaya' potuu'on anu molaya' domba anu oko-okolotmo.

⁵Anu mongoli domba aijo' nompateimo domba haha aijo', pada han madi' kinohukumannyo. Aha anu nompobaluk antoknyo nu domba haha aijo' notatae, ‘Opuji' na Tumpu! Uuka aiya kita nompaka kayamo!’ Topo laya' potuu'on haha aijo' madi' kinokalibosan hi domba haha aijo' anu nu jagai nu aha.

⁶Aku madi'mo daagi' kokalibosan maumo pa'hihe na mian ilipu' aiya. Ku bee'mo iwi-iwi' na miannyo hi aha anu balakuasa. Aha aijo' mohansunimo lipu' aiya, ka' Aku madi'mo mompo ago aijo' ikakuasa'an nu aha.”

⁷Aku, i Zakharia, lantas tinamboanmo nu to pada-padagang domba da molaya' domba-domba anu okolotmo. Aku daagi' ko tokon ohua'; sa'angu' sinanggohanku, i “Kanonongan” ka' sa'angu' mule' i “Posegot”. Lapas aijo' jinagaankumo ka' lewa'mo pinotuu'ku na domba haha aijo'.

⁸Aha totolu na topolaya' potuu'on nongka'idekimo mae aku, sahingga madi'mo kinokasabalanku. Ola sina'angu' na bitu'on aha ilaa'kumo.

⁹Lapas aijo' aku notataemo hi sampahas na domba haha aijo', “Aku madi'mo daagi' molaya' belemiu. Anu matemo pojohokmo da ia matemo, ka' anu pisala'onmo pojohokmo da ia pisala'onmo. Lantas tuha'nyo bakasmo da mompaha pate-pateimo.”

¹⁰Lantas tokon anu sinanggohanku i “Kanonongan” aijo' ingalangkumo ka' pinato'kumo da bolimo osidahakon na palajanjian anu binaumo nu Tumpu hi iwi-iwi' na bansa.

¹¹Isinaamo aijo' na palajanjian ai-aijo' madi'mo daagi' osidahakon. To pada-padagang domba haha aijo' no mata-mataimo mae aku ka' aha sininsumbu'mo talu' iwi-iwi' na palabuatanku aijo'mo na salaku potatae nu Tumpu.

¹² Aku notataemo hi aha, “De to Tuan-tuan situju bee'akonmo mae na tambongku, de madi' mae obee', yo bolimo.” Lantas binee'mo mae nu aha hi belengku tolumpulu' na doi salaka pinontamboi mae aku. Tumpu notataemo hi belengku, “Posoop na doi atina' i kas nu Laigan-Ku” nu Tumpu. Ola sumo aijo'na pinohalagai mae nu aha Aku!

¹⁴Lapas aijo' pinato'kumo na tokonku ko ohua'nyo, aijo'mo anu kusanggohi “Posegotan”, maka no poso'mo na posaangu'an i Yehuda ka' Israel.

¹⁵Lantas notataemo mae na Tumpu hi belengku, “Bau mule' daagi' minsan au'aitu beleyum polaya' potuu'on, panyo uuka aiya salaku polaya' potuu'on anu madi' talakana'.

¹⁶Kalana Aku mompokalajamo samian na polaya' nu potuu'on da monjagai dombang-Ku, panyo ia madi' mongkali-kalinga domba anu nokangkanmo; ia madi' molio domba anu tinalasmo, madi' mule' ahi' mompakuli'i domba anu binelaonmo ka' mule' madi' mombee'i pakan te domba anu daagi' tutuu'. Pakalaus ola nu kaan na antok nu domba anu molompo' hondo ka' nu paha gauti konukunyo nu binatang haha aijo'.

¹⁷Kinutukan na polaya' potuu'on anu madi' mingkaliangan aijo'! Ia nompala'imo pahasan nu dombanyo. Kakuasa'annyo belentimo de saidi' mae mahampatemo. Limanyo lundengmo ka' mule' matanyo anu sasu koanannyo mapisokmo.”