Read Saluan ZAKHARIA 12 Bible Online

ZAKHARIA 12 - Saluan bible

ZAKHARIA 12

¹Aiyamo na potuunon nu Tumpu mongkona Israel. Tumpu anu nompotimbalimo langit ka' mule' nompotimbalimo dunia ka' nompotumuu'mo manusia notatae,

²“Ku baumo na Yerusalem susumo piala anu ko isinyo anggur, to lipu-lipu' anu mompaha ohani monginumo ka' mahasungonanmo susumo mian anu malangumo. Ka' de Yerusalem otumbuhimo to kota-kota' i lipu' Yehuda anu daagi' suele ahi' otumbuhimo.

³Panyo de sinaa aijo' tokamo mae, Ku baumo na Yerusalem susumo batu anu maboat; maumo bansa pa' iya mae na monsoba mohangkat mohumpakmo bahaya. Iwi-iwi' na bansa i dunia aiya mosa'angu'mo montumbuhi Yerusalem.

⁴I sinaa aijo' iwi-iwi' na ajahan Ku pobingongmo ka' mule' aha mian anu monsake'i Ku po ulawonmo, ka' mian anu jojoong i Yehuda Ku jagaimo, panyo iwi-iwi na ajahan nu sampobali' nu aha Ku popisokmo.

⁵Lantas to utu-utus nu aha Yehuda motataemo i uno nu kinyonyoa nu aha, ‘Tumpumo ahi' Anu Daka' na Kuasanyo na nombee'i kahosonan hi mian anu palesayamo hi Ia anu jojoong i Yerusalem'.’

⁶I sinaa aijo' to utu-utus nu aha Yehuda Ku pojadimo susumo apu i uno nu tambulan nu kau' anu pinosunmo kabai susumo potong anu noakmo pinosuhapmo i timpa'an nu gandum; nu silakaimo nu aha na to bansa-bansa anu aitu mae mompaha ohani aha. Panyo mian anu jojoong i Yerusalem na tataap ahi' jojoong madi' ko anu mompoposia i uno nu kota'.

⁷Aku, Tumpu na momona mombee'i ka untungan mahampate hi aha to sulu-suludadu nu Yehuda, da kaholomatan anu tinalimamo nu lee' i Daud ka' mule' mian anu jojoong i Yerusalem madi' molingkudui kaholomatan anu titinalimamo nu mian sangga'at anu jojoong i Yehuda.

⁸I sinaa aijo' Ku jagaimo na mian anu jojoong i Yerusalem; ka' anu madi' mahoson aijo' hi aha timbalimo mahoson susumo i Daud. Aha lewa'mo nu potiju' nu lee' mae i Daud susumo anu lewa' binau nu malaekat-Ku, ka' mule' susumo anu lewa' binaung-Ku.

⁹I sinaa aijo' Ku silakaimo na to bansang-bansang anu monsoba-soba montumbuhi Yerusalem.

¹⁰ Lapas aijo' lee' mae i Daud tiba mian anu jojoong i Yerusalem Ku bee'imo kinyonyoa anu mongka'ima'i mongkalibosi ka' mule' mongka'ima'i balado'a. Aha saidi' mae montoamo ia jijinalo'mo nu aha ka' montando'imo susumo mian anu montando'imo anak anu sa'a-sa'angu'nyomo na sinilaka. Aha tumando'mo ka' susa'mo hondo na kinyonyoa nu aha susumo mian anu nolapusmo na anaknyo tumpe.

¹¹I sinaa aijo' ko anumo tumando' talatalalo hondo i Yerusalem, susumo nontando'i i Hadat-Rimon i Bangka'nyo nu Megido.

¹²Lantas to utu-utusnyo ilipu' aijo' mosi tando'imo; to utu-utus mae nu lee' i Daud, to utu-utus mae nu lee' i Natan, to utu-utus mae nu lee' i Lewi, to utu-utus mae nu lee' i Simei ka' mule' iwi-iwi' na poto utusan sangga'at. Batu-batu poto utusan mosi tando'imo, ka' to momoane iposi-posi sampoto utusannyo mae montando'imo panyo madi' timbali mogalum hi to bou-boune.”