Read Saluan ZAKHARIA 13 Bible Online

ZAKHARIA 13 - Saluan bible

ZAKHARIA 13

¹Tumpu Anu Daka' na Kuasanyo notatae, “I sinaa aijo' mimpusesemo mae sa'angu' na mata nu uee da momposusi' lee' mae i Daud tiba mian anu jojoong i Yerusalem da madi'mo baladosa' ka' mule' palasombahan hi pilogot anu lewa-lewa'mo binau nu aha.

²I sinaa aijo' Ku sapuimo na sanggo nu to pilo-pilogot i tano' aiya sahingga madi'mo daagi' ko samian na anu monginau'. Iwi-iwi' na mian anu mongakuimo butongnyo nabi Ku laa'mo tiba aha anu sinoku'anmo nu roh anu madi' totu'u.

³Ka' de daagi' ko mian anu montaloakon tukoonyo ia kahanda' mompoto'i potuunon saba' posi tuumanyomo ahi' tiba tinanyo na motatae hi ia aijo' tukoonyo ia tionyomo ahi' ohukum mate kalana anu tinaeakonnyo aijo' madi' totu'u. De ia tataap mongakui butongnyo salaku nabi saba' ia nu posi jalo'mo nu tuumanyo tiba tinanyo sampe mate.

⁴I sinaa aijo' to nabi-nabi ma'ambangmo na mombau apa-apaa susumo nabi. Aha madi'mo mompusok baju' nu nabi bau-bau pongakali ka' mombuulakon anu tinoa nu aha.

⁵Ola ahi' aha aijo' motataemo, ‘Aku misa' nabi. Aku ola ahi' mian anu mongale', anu mokalaja i ale' sansina-sinaa'.’

⁶Ka' de ko mian anu mompokilawa hi ia, ‘Apaa na nombelai atina i saha'an nu beleyum?’, ia montaami, ‘Aku binelaon mae aijo' i laigan nu sangalungku.’ ”

⁷ Tumpu Anu Daka' na kuasanyo notatae, “Tinjomo mae o, bajak ka' tumbuhimo na polaya' potuu'on anu mokalaja hi beleng-Ku! Pateimo na Ia sahingga to domba-domba mosungke-sungkehetmo. Kutumbuhimo na mian anu palesayamo hi beleng-Ku,

⁸ka' isongko-songko na lipu' obagi totolu' na dunia, ohua' na bagian na dunia na silakamo na miannyo.

⁹Me sambagian na dunia na daagi' salamat. Ka' mule' aha aijo' Ku posusi'mo susumo salaka anu osuangmo i apu da madi'mo ko galo'nyo. Aha Ku uji'mo susumo mian monguji'mo mosoni'. Lantas aha balado'amo hi beleng-Ku ka' suele ahi' Ku taamimo na aha. Ku poto'imo hi aha tukoong-Ku aha aijo' mian anu palesayamo hi beleng-Ku, ka' aha suele mongakuimo tukoonyo nu aha; Akumo na Tumpu nu aha.”