Read Saluan ZAKHARIA 2 Bible Online

ZAKHARIA 2 - Saluan bible

ZAKHARIA 2

¹Anu po ule' mule' tinoangku, nontoamo mo'ane samian nontoongi kahohon bau pongukun.

²Pinokilawangkumo, “Pa' kahanda'mo moya?” “Ka oho'mo mongukun Yerusalem,” na koonyo, “aku kahanda' monsumbu' pa' sangkuka na ko mantannyo ka' mule' ko bolanyo nu kota' aijo'.”

³Lapas aijo' aku nontoamo malaekat anu notataemo mae hi belengku aijo' ilumajangmo nokiijo', ka' samian mule' na malaekat nonsingkabotimo ia.

⁴Malaekat anu u'uka momona notataemo hi malaekat anu ko ohu'nyo, “Lako'mo lia-lia' hi olitau aijo', ka' poto'iakon hi ia na Yerusalem po ule'mo da'isan na miannyo tiba potuu'on sahingga madi'mo bisa na po ule' obau na pagan mesennyo titikup.

⁵Tumpu binalajanji'mo tukoo-Nyo Iamo na timbali pagan apu na montikubi kota' aijo' da monjagai ka' mule' Ia jojoongmo ikiijo' tiba kakuasa'an-Nyo ka' Ia talasanggomo.”

⁶Tumpu notatae hi mian anu palesayamo hi Ia, “Aku nomposungkehetmo belemiu namba isongko-songko na tampat. Panyo uuka aiya o to mia-mian anu binoamo ka' pinojoongmo i sa'angu' na tampat pala'imo mae na Babel ka' mule' pinsusule'mo mae i Yerusalem.

⁸Ihe na montumbuhi mae belemiu tantu aha montumbuhimo anu talalo hondo Ku kanonongi.” Sahingga Tumpu Anu Daka' na Kuasanyo nompalentahmo mae aku da mompotokakon potuunon-Nyo aiya hi to bansa-bansa anu nombulingimo mian anu palesayamo hi Ia,

⁹“Posi Tumpumo ahi' na mongewa belemiu! Ka' belemiu nu bulingimo nu aha anu toho'mo binau posaihon nu belemiu. De han aijo' jadimo osumbu'je nu belemiu talu' Tumpu Anu Daka' na Kuasanyo na nompalentahmo mae aku.”

¹⁰Tumpu notatae, “Panyanyimo bila-bilahi o, mian anu jojoong i Yerusalem! Aku jojoongmo atina' hi belemiu!”

¹¹Tempo'nyo aijo' manjoo'mo na bansa anu tokamo mae hi Tumpu da timbalimo mian anu palesayamo hi Ia. Ia jojoongmo atina' hi belemiu ka' mule' osumbu'je nu belemiu talu' Tumpu nompalentahmo mae aku da toka hi belemiu.

¹²Daagi' minsan na Yehuda po ule' timbali Tumpu, na tumpu-Nyo itano'-Nyo anu susi' ka' mule' Yerusalem timbalimo kota' anu talalo hondo Nu kanonongi.

¹³Pomohokotmo na belemiu iwi-iwi' i ahop nu Tumpu! Kalana Ia mambamo mae lengkat i tampat kajojoongan-Nyo kiita i suluga'.