Read Saluan ZAKHARIA 7 Bible Online

ZAKHARIA 7 - Saluan bible

ZAKHARIA 7

¹I tanggan opat bitu'on Kislew, aijo'mo bitu'on anu ko osio'nyomo i uno nu taun ko opatnyomo na i Tomundo' Darius nompalentah Tumpu nompotuunmo mule' mae hi belengku.

²Mian anu jojoong i Betel nonsaimo i Sarezar tiba i Regem-Melekh ka' to sanga-sangalu nu aha da mamba i Laigan nu Tumpu Anu Daka' na Kuasanyo momoita balakat-Nyo.

³Aha mule' ahi' sinai da mompokilawakon hi to ima-imam ka' hi to nabi-nabi sumo uuka, “Pa daagi' palalu na kami mohangi Laigan nu Tumpu iha-ihansunmo ka' opuasa'akon de kakonamo i bitu'on ko olima'nyomo susumo anu saja'mo obau mami nonotau-taunmo na kopinnyo?”

⁴Sumo uuka na potuunon nu Tumpu anu tinokamo mae hi belengku.

⁵Pinoto'i-Nyo, “Poto'i hi mian anu jojoong i lipu' aiya ka' hi to mia-mian, te puasa' tiba mohangi anu nu bau nu aha i bitu'on ko olima'nyo ka' mule' i kopopitu'nyo anu pitumpu pulu'mo na taun na kopinnyo na lewa' binau, misa' bau poholomati Aku.

⁶Ka' mule' de aha mongkaanmo ka' monginumo, aha ola molio da mompo'osa butong nu aha.”

⁷Aiyamo na anu titinaloakonmo nu Tumpu pipinoto'imo nu to nabi-nabi tempo'nyo naipuan mae Yerusalem daagi' jinojoongan nu mian ka' mian anu jojoong ikiijo' daagi' nonta'up kasanangan. Tempo'nyo aijo' mian madi' ola jojoong i kampung anu toto ise-ise' anu mompaha ohani kota' panyo ahi' suele i bahagian salatan tiba i tengke nu to puge-puge'nyo i sasu kinsoban.

⁸Tumpu Anu Daka' na Kuasanyo nompotuunmo mae sumo uuka hi belengku,

⁹“Pa' sangkuka na taun anu ihikuhakonmo binee'-Kumo na palentah haha aiya hi mian anu palesayamo hi belengku, ‘Belemiu tionyo ahi' saja' adin, ka' mongkalibosi mian, ka' mule' manonong hi sangko manusia.

¹⁰Boli mongkabisa'i anu balu, to ana-anak anu madi'mo ko tuumanyo ka' tinanyo, to mia-mian anu i salipu'an mae anu tataapmo atina' hi belemiu kabai ihehemo na anu i uno nu kasusa'an. Ka' boli ahi' mombau tanga'an anu ma'idek hi sangko manusia.’

¹¹Panyo mian anu palesayamo hi beleng-Ku, talalo hondo panggaga ka' madi' hondo kahanda' mompotombihing, aha ola ahi' mompiiti bihing nu aha da madi' mohongo-hongo.

¹²Kinyonyoa nu aha pinokuutmo hondo nu aha susumo ko kuutnyo nu batu. Aku talalomo ahi' pinusa kalana aha madi'mo nontuluti to panga-pangajalan anu binee'-Kumo hi aha pipinoto'imo nu to nabi-nabi naipuan mae.

¹³Aku madi'mo nontaami do'a nu aha kalana aha suele madi'mo nompotombihing mae tempo'nyo Aku notatae.

¹⁴Sumomo ahi' tambusisi' na Aku nonsapui aha, sahingga aha talapakisa jinojoongmo ahi' i lipu' nu aha anu i salipu'an mae. Tano' anu maomuk iliingmo hondo ka' madi'mo ko anu monjojoongi ka' mule' kinuunmo.”