Read Saluan ZAKHARIA 8 Bible Online

ZAKHARIA 8 - Saluan bible

ZAKHARIA 8

¹Tumpu Anu Daka Na Kuasanyo nompotuunmo sumo uuka hi belengku,

²“Aku kahanda'mo hondo montulungi Yerusalem kalana Aku talalomo hondo mongkalibosi miannyo anu jojoong ikiijo', ka' kalana kalibosan-Ku aijo' kinyonyoang-Ku na'idekanmo hondo hi aha anu lewa monsampobali' mae kota' aiya.

³Aku po ule'mo minsusule' i Yerusalem, kota'-Ku anu susi' aijo' ka' jojoongmo ikiijo' mae. Yerusalem saidi mae nu sumbu'je nu mian salaku kota' anu tulu-tulutan, ka' puge'nyo nu Tumpu Anu Daka Na Kuasanyo osanggohije Puge'nyo anu Susi'.

⁴I lapangan nu kota' Yerusalem po ule'mo ko anu lewa' ko susuhang na mian anu to langka-langkai'mo ka' anu to bengke-bengkele'mo anu singkapmo talalo no tu'a sahingga lumajang tionyo ahi' mitokonmo.

⁵I jalan-jalan nu kota' po ule'mo da'isan na to ana-anak anu lewa' mahaik.

⁶Han aijo' ugaat madi' minsoop i'akan hi aha to mia-mian anu daagi tumuu' tempo uuka hi bansa aiya, panyo hi beleng-Ku na minsoop ahi' i'akan.

⁷Aku momposalamatmo mian anu palesayamo hi beleng-Ku anu kiijo' mae isongko-songko na lipu' pipinomboanmo aha,

⁸ka' monsule'akonmo mae aha anu lengkat mae i kabete'an, ka' mule' anu lengkat mae i kinsoban, sahingga aha po ule'mo jojoong i Yerusalem. Aha timbalimo mian anu palesayamo hi beleng-Ku ka' Akumo na Tumpu nu aha. Aku mompalentahmo aha ma'i-ma'ima' ka' mule' adin.”

⁹Tumpu notataemo hi mian anu palesayamo hi Ia, “Pohoson na kinyonyoa nu belemiu! Uuka aiya belemiu mohongomo potatae anu toho'mo tinaloakon nu to nabi-nabi tempo'nyo pundasi binaumo da bau pompotinjoan Laigan-Ku.

¹⁰Naipuan mae ma'isa pe'e ko anu noko ala nontamboi mian kabai binatang na mokalaja ka' mule' madi' ko anu mongoa'i ka'amanan, ka' mule' sampobali' anu mongganggu. Aku nonsabungmo aha samian tiba samian.

¹¹Panyo uuka mian anu daagi' tutuu' na bansa aiya madi'mo Ku bau susumo naipuan mae.

¹²Aha monsa'u bine' madi'mo ko anu mompoposia. Sagala anggur nu aha mimbua'mo ka' mule' tano' ko hasinnyomo ka' mule' ujan tudunmo mae manjo-manjoo'. Iwi-iwi' na balakat haha aijo' Ku bee'mo hi to mia-mian anu daagi' tutuu' i bansa aiya.

¹³O, mian anu jojoong i Yehuda ka' i Yerusalem! Naipuan mae de to mia-mian anu i salipu'an mae mompaha toto totobi'akonmo, aha motatae, ‘O'amalakon da balaa' anu nontuda'imo Yehuda tiba Israel suele ahi' montuda'i belemiu!’ Panyo Ku posalamatje na belemiu sahingga to mia-mian anu isalipu'an mae aijo' motataemo hi bubuu' aha, ‘O'amalakon da balakat anu toka hi aha Yehuda tiba hi aha Israel, suele toka ahi' hi butong nu belemiu!’ Kalana aijo' pohoson na kinyonyoa nu belemiu ka' boli ahi' mabuhuk!”

¹⁴Tumpu Anu Daka na Kuasanyo notataemo, “Tempo'nyo mompolee' nu belemiu nonsaduakonmo Aku da pinusa, tinantukan-Kumo da opiboatimo na mohukum aha. Aku madi'mo mombabali'i katantuan-Ku aiya, panyo osidahimo ahi'.

¹⁵Panyo uuka aiya Aku kahanda'mo mombalakati mian anu jojoong i Yerusalem ka' mian anu jojoong i Yehuda. Jadi bolimo mabuhuk.

¹⁶ Sumo uuka na palentah-palentah anu tionyo ahi' obau nu belemiu: De motatae tionyo ahi' anu totu'u na otaeakon hi sangko manusia. Mian kopian tionyo ahi' momputusi nu ka'adilan ka' momboa kadamean.

¹⁷Boli mombau tanga'an anu ma'idek hi sangko manusia. Boli montaeakon sumpa'anu madi' totu'u. Aku mongka'ideki mian anu baleko' tiba anu madi' adin ka' mule' mian anu buhingison.”

¹⁸Tumpu Anu Daka' na Kuasanyo nompoto'imo mae potuunon-Nyo sumo uuka hi belengku, da opotokakon hi mian anu palesayamo hi Ia,

¹⁹“Puasa' anu obau nu belemiu toka i bitu'on ko opatnyo, ko olima'nyo, ko popitu'nyo tiba ko sampulu'nyomo timbalimo sinaa anu olame'akon ka' obau bila-bilahi, ka' timbali kasanangan nu mian anu jojoong i Yehuda. Ka'ima'i na kahondoan tiba kadamean!”

²⁰Tumpu Anu Daka' na Kuasanyo notataemo, “Tempo'nyo tokamo mae, manjoo' na mian anu jojoong ito kota-kota' tokamo mae i Yerusalem.

²¹Mian anu jojoong i kota' sa'angu' motataemo hi aha mian anu jojoong i kota' sangga'at, ‘Imbo' da kita mamba monsombah Tumpu Anu Daka' na Kuasanyo ka' momoita balakat-Nyo. Batuki mae na kami!’

²²Lantas manjoo'mo na mian ka' mule' bansa manjoo'mo anu toto hoso-hoson tokamo mae i Yerusalem da monsombah Aku Tumpu Anu Daka' na Kuasanyo, ka' momoitamo balakat-Ku.

²³I sinaa haha aijo' aha sampulu' na mian anu isalipu'an tokamo mae hi samian na Yahudi ka' motatae, ‘Kami mongkahanda'i suele da mohumpak dale' susumo belemiu'.’ ” Tumpu Anu Daka' na Kuasanyo notataemo.