Read Saluan ZAKHARIA 9 Bible Online

ZAKHARIA 9 - Saluan bible

ZAKHARIA 9

¹ Aiyamo na potuunon nu Tumpu. Ia momputusimo da mohukumo lipu' Hadrak tiba kota' Damsyik. Misa' ola to tulu-tulunan nu bansa Israel panyo suele ahi' puso nu kota' Siria aijo' suele anumo ahi' nu Tumpu.

²Hamat anu mompahasipat tiba Hadrak suele ahi' anu-Nyomo sumo aijo' mule' kota-kota' Tirus tiba Sidon ka' mule' iwi-iwi' na anu nusumbu' nu bau nu aha anu jojoong ikiijo'.

³Tirus nombaumo bente-benteng bau ponjagai butong nu aha ka' nolimu'mo manjoo' hondo na mosoni' tiba salaka sahingga sumomo ahi' balang biasa, susumo bone' ka' hensek i jalan.

⁴Panyo nu potimbalimo nu Tumpu da kasiasi. Iwi-iwi' na kakaya'an i kota' aijo' nu alinmo nu aha i ambai ka' mule' kota' aijo' nu angotimo nu apu.

⁵ Nu toaje nu kota' Askelon tiba Gaza ka' mabuhukje. Ekron suele montoaje ka' madi'mo ko anu nu taha'imani. Gaza saidi' mae madi'mo ko tomundo'nyo, ka' mule' Askelon liingmo kalana madi'mo ko miannyo.

⁶Asdod nu jojoongimo nu to mia-mian anu lengkat mae i bansa anu nogogalo'anmo. Tumpu notatae, “Mian nu Filistin anu talalo buulon Ku pateimo.

⁷Aha madi'mo daagi' mongkaan antok nu binatang anu daagi' baso'on kabai kaanon sangga'at anu opoliwa' madi' timbali okaan. Iwi-iwi' na mian anu daagi' tontuha' timbalimo mian anu palesayamo hi beleng-Ku, ka' o, anggapmo salaku tulunan nu bansa Yehuda. Ekron timbalimo mian anu palesayamo hi beleng-Ku susumo aha mian nu Yebus tempo'nyo naipuan mae.

⁸Ku jagaimo na tano'-Ku ka' madi'mo mompobee' to sulu-suludadu anu isalipu'an mae so' motulu. Aku madi'mo daagi mompobee' anu lewa' momposansala mompalentah mian anu palesayamo hi beleng-Ku. Kalana kasansala'an nu aha tinoang-Kumo.”

⁹ O, mian anu jojoong i Sion, balame-lame'mo! O, mian anu jojoong i Yerusalem pontaligalaimo! Toamo! Tomundo' nu beleyum tinokamo ka' inguntungmo mae na nahampate! Ia tomundo' anu adin momomboamo mae kasalamatan. Panyo madi' bakadaka'an na ia toka mae monsake'i keledai, sa'angu' na keledai anu daagi' bata'nyo.

¹⁰ Tumpu notatae, “Kareta-kareta anu bau pahampate anu lengkat mae i Efraim, Ku alinje, iwi-iwi' na ajahan nu Yerusalem Ku hopu'ije, ka' iwi-iwi' na pana' Ku hansunije. Tomundo' nu belemiu mombebakonje paladamean hi aha to bansa-bansa. Lengkat mae i ambai mamba i ambai na ia balakuasa, lengkat mae i Kaunyo nu Efrat toka-toka i puusnyo nu dunia.”

¹¹ Tumpu notatae hi mian anu palesayamo hi Ia, “Tiba palajanjian anu binaung-Kumo hi belemiu, palajanjian anu sinela'mo nu baso' nu koloban palasombahan, Ku pobebasmo na aha mian da'isan nu belemiu, anu sinansalamo kiijo' i tampat pinomboan aha susumo mian anu kinulungmo i uno nu bubung anu no'otimo.

¹²Pinsusule'mo mae o belemiu to mia-mian anu bibinoamo ka' pinojoongmo i sa'angu na tampat, tempo uuka belemiu montaha'imanimo. Pinsusule'mo mae i tampat anu timbali monjagai belemiu. Aku tataap mombalakatimo belemiu. Potombihing mae: Pinduan ohu'a na belemiu Ku balakati kalana iwi-iwi na kasansala'an anu ingoa'anmo nu belemiu.

¹³Yehuda Ku pakemo susumo pana' nu suludadu anu baani ka' mule' Israel susumo hihis nu pana' anu sasadiamo opeletakon. Mian anu jojoong i Sion Ku pakemo susumo bajak tiba bajak aijo' aha to mia-mian nu Yunani Ku tumbuhimo.”

¹⁴Tumpu mompotoamo butong-Nyo, hi aha mian anu palesayamo hi Ia, sumomo ahi' kilat na hihis nu pana'-Nyo pineletakon-Nyo. Tumpu Anu Matangkas na Kuasanyo saidi' mae mompuhimo tolompet salaku tanda montumbuhimo, lantas mambamo montumbuhi i uno nu tombusisi' anu lengkat mae i sasu salatan.

¹⁵Mian anu palesayamo hi Ia na memang ahi' Nu jagai, sahingga iwi-iwi' na sampobali' nu aha timbali opoko ala opatundu'. Susumo polo ais nu mian anu nalangumo nu inumon, sumo aitumo na polo ais nu aha hau-haunyo mahampate. Susumo baso' nu koloban anu dinudu'akonmo aita' i mezbah sumo aitumo na baso' nu sampobali' nu aha nobubus.

¹⁶De sinaa aijo' tokamo mae, Tumpu momposalamatmo mian anu palesayamo hi Ia, susumo polaya' nu potuu'on momposalamatmo dombanyo da madi' mohumpak balaa'. Aha majingkamo itano' nu Tumpu, susumo mainan nu makota' anu jongkilaban hondo.

¹⁷Memang ahi' ma'ima' hondo na tano' nu Tumpu mo'ulop mae, memang ahi' ma'ima' hondo ka' ma'u lele'an! Ikiijo' mae anggur tiba gandum tumuu'nyo molumba' hondo sahingga to oli-olitau ka' to lalangkoyang mompaka pahosonmo.