Read Saluan MALEAKHI 3 Bible Online

MALEAKHI 3 - Saluan bible

MALEAKHI 3

¹ Tinaaman nu Tumpu Anu Daka' na Kuasanyo, “Ku saimo na anu Ku utus da momposadia jalan anu bau kajalanan-Ku. Sahingga monti-montiik Aku, Tumpu anu olio-lio nu belemiu tokamo i uno nu Laigan-Ku. Anu Ku utus o'i-o'indi nu belemiu aijo' tokamo mae lantas mombebakonmo palajanjian-Ku.”

² Tetapi ihe na moko ala totahan i sinaa nu Tumpu anu tokamo mae aijo' ka' mompotoamo butong-Nyo? Kalana Ia sumomo ahi' apu nu tukang anu lewa' monsopu' logam, ka' mule' sumomo ahi' sabung nu tukang baso'i hude.

³Ia toka mae da momputusimo, susumo mian anu mompobelesi'mo ka' mule' monsopu'mo salaka. Susumo samian na tukang logam monsopu'mo mosoni' tiba salaka, sumo aijo'mo na anu nu utus nu Tumpu monsopu'mo to ima-imam da aha monsombahkon iwi-iwi na koloban mombatuki ahi' apaa na anu nu situjui nu Tumpu.

⁴Sahingga susumo tempo'nyo naipuan mae, nu ka'ima'i ahi' nu Tumpu na iwi-iwi na koloban anu sinombahkonmo hi Tumpu nu aha mian Yehuda tiba mian nu Yerusalem.

⁵Notatae na Tumpu Anu Daka' na Kuasanyo, “Aku tokamo mae hi belemiu da momputusimo. Aku malia'mo timbali sakisi de momputusimo to tukang-tukang sihir, to mia-mian anu lewa' masala', anu tinimbali sakisai baleko', hi anu madi' adin na mombee'i gaji kona hi aha mian anu mongala tambo, hi aha anu madi' ko ka'adilannyo kona hi aha to balu-balu, to ana-anak anu madi'mo ko tuumanyo ka' tinanyo, ka' aha mian nu salipu'an mae, ka' mule' kona hi aha mian iwi-iwi' anu madi' mongadati Aku.”

⁶“Akumo na Tumpu, ka' Aku madi' mongabali'. Kalana aijo' belemiu lee' mae i Yakub, madi' ahi' opatei.

⁷Susumo mompolee' nu belemiu naipuan mae, belemiu suele iwi-iwi' madi'mo nompajuli iwi-iwi' na atulan-Ku, ka' mule nompojalan madi'mo nontuluti ima-ima'. Po ule'mo mae toka hi beleng-Ku da Aku suele tokaje mae hi belemiu. Panyo pinokilawamo nu belemiu, ‘Apaa na anu tionyo ahi' obau mami da po ule' mo toka mae hi Belento?’

⁸Uuka aiya Ku pokilawamo hi belemiu: Pa' timbali ahi' na manusia mongakali Tumpu? Tantu ahi' madi'. Panyo belemiu nongakalimo Aku. Belemiu nompokilawa, ‘Mosia?’ Tinamaan-Ku: Tentang han mombayan anu sampulu' na bagian sampulu' na o'ala ka' mombee' palasombahan.

⁹Iwi-iwi' na bansa nongakalimo mae Aku, sahingga belemiu iwi-iwi' kinonamo nu kutuk.

¹⁰ Boa mae na anu sampulu' na bagian sambagian na o'ala ka' obee' mae iwi-iwi' i Laigan-Ku, da saja' ahi' manjoo' na anu okaan ikiijo'. Soba uji' mae na Aku da otoaje nu belemiu na Aku nombuka'mo sabatan nu suluga' ka' mule' mombee'imo iwi-iwi na anu ma'ima' manjoo' hondo hi belemiu.

¹¹Aku madi'mo ola mompopilaya koe' lewa' montimili bua' nu ale' nu belemiu, iwi-iwi' na anggur nu belemiu mahampemo na mimbua'.

¹²Sahingga belemiu otaloakonmo nu bansa iwi-iwi' sanang na kantumuu'an nu belemiu, kalana lipu' nu belemiu timbalimo tampat anu ma'ima na bau kajojoongan.”

¹³Tumpu notatae, “Potatae nu belemiu totu-totu'u nongalumo Aku.” “Panyo pinokilawamo mae nu belemiu, ‘Apaa na anu sinisikmo mami lewa' nongalu belento?’

¹⁴Belemiu notatae, ‘Palasuma na aku monsombah Tumpu. Apaa na gunanyo mombau anu halus obaunto salaku bau pongadati Tumpu Anu Daka' na Kuasanyo kabai opotoanto hi Ia nakalakuanto salaku bau pomponyata saba' kita aiya nompele-pele'mo na nombau kasala'anto?

¹⁵Pinosi toantomo na to mia-mian anu bulon sanang na kantumuu'an nu aha. Mian anu ma'idek na kalakuannyo misa' ola mompaka kayamo, panyo de aha monguji' kasabalan nu Tumpu nu palabuatan anu ma'idek, aha madi' ahi' nu poposia nu Tumpu.’ ”

¹⁶Lantas aha to mia-mian anu mongkabuhuk Tumpu notatae hi samian ka' samian. Nu hongo nu Tumpu ka' mule' nu palahatikan apaa na anu nu taloakon nu aha. To mia-mian anu moholomati Ia ka' mule' mongkabuhuk Ia otulismo na sanggo-Nyo, i sa'angu' na kitab anu bau pontulisan anu kiita i ahop-Nyo.

¹⁷Tumpu Anu Daka' na Kuasanyo notataemo, “Aha timbalimo mian anu palesayamo hi beleng-Ku. Toka isinaanyo Aku momputusimo aha timbalimo. Aku na Tumpunyo ka' Ku kalibosimo. Kukanonongimo na aha, susumo samian na tuuma mongkanonongi anak anu tulu-tulutan hi Ia.

¹⁸Mian anu palesayamo hi beleng-Ku montoa mule' bedanyo mosia na mian anu manonong tiba mian anu maidek na kalakuannyo, ka' mule' mian anu monsombah Aku tiba mian anu madi' monsombah Aku.”