Read Saluan MATIUS 1 Bible Online

MATIUS 1 - Saluan bible

MATIUS 1

¹Aiyamo na daputan nu mompolee' i Yesus Kristus, tulunan i Daud, tulunan i Abraham. Lengkat mae hi Abraham tinoka hi Daud, sanggo-sanggo nu mompolee' i Yesus Kristus sumo uuka:

²i Abraham, i Ishak, i Yakub, i Yehuda tiba to utu-utusnyo, i Peres tiba i Zerah (tina nu aha sanggonyo i Tamar), i Hezron, i Ram, i Aminadab, i Nahason, i Salmon, i Boas (tinanyo aijo'mo i Rahab), i Obed (tinanyo aijo'mo i Rut), i Isai, ka' i Tomundo Daud.

⁶Lengkat hi Daud toka tempo'nyo mian nu bansa Israel binoamo nokiijo' i Babel tinulis na sanggo-sanggo sumo uuka: i Salomo (tinanyo aijo'mo bauntan i Uria), i Rehabeam, i Abia, i Asa, i Yosafat, i Yoram, i Uzia, i Yotam, i Ahas, i Hizkia, i Manasye, i Amon, i Yosia, i Yekhonya (ka' to utu-utusnyo).

¹²Lengkat tempo'nyo mian nu bansa Israel binoa nokiijo' i Babel tinoka hi Yesus i hampe tinulis na sanggo-sanggo sumo uuka: i Yekhonya, i Sealtiel, i Zerubabel, i Abihud, i Elyakim, i Azur, i Zadok, i Akhim, i Eliud, i Eleazar, i Matan, i Yakub, i Yusuf langkai' i Maria. Ka' lengkat hi Maria aijo'mo na i Yesus i hampe anu sinanggohan i Kristus.

¹⁷Jadi lengkat hi Abraham tinoka hi Daud, iwi-iwi' sampulu' ka' opat na lapisan nu katulunan. Lengkat hi Daud toka tempo'nyo bansa Israel binoa nokiijo' i Babel sampulu' ka' opat na lapisan nu katulunan suele. Lengkat tempo'nyo bansa nu Israel binoa nokiijo' i Babel tinoka hi Kristus i hampe suele mule' sampulu' opat ka' na katulunan.

¹⁸ Sumo aiya na sisikon mongkona kinahampean i Yesus Kristus. Tina-Nyo i Maria nodohoi tiba i Yusuf. Panyo ma'isa pe'e aha binanika' inyata' i Maria pinoboamo. I Yusuf madi' nonsumbu' saba' i Maria pinoboamo kalana kuasa nu Roh nu Tumpu.

¹⁹I Yusuf, dohoinyo aijo', samian anu saja' mohongo-hongo atulan nu agama. Jadi ia mongka'oho' mongga'atakon dohoinyo aijo', panyo nu pohowini, da i Maria madi' ma'ambang i mian da'isan.

²⁰Hau-haunyo i Yusuf mompopikilakon han aijo', ia nongipi. I uno nu ipionnyo aijo', ia nontoa samian na malaikat nu Tumpu anu notatae hi ia, “Yusuf, tulunan i Daud, boli mabuhuk monika'i Maria; sabab anak anu i uno nu ma'alumnyo aijo' kuasa nu Roh nu Tumpu.

²¹ I Maria mohampeakonje samian na anak mo'ane. Anak aijo' tionyo nu sanggohi i Yesus, kalana Ia na momposalamat mian anu palesayamo hi Ia lengkat i dosa' nu aha.”

²²Iwi-iwi' aijo' jinadi sumo aitu da ganaap apaa na tinaloakonmo nu Tumpu ka' anu pinoto'imo nu nabi-Nyo, aijo'mo,

²³ “Samian na boune anu ma'isa toho' nonganak ia na poboa ka' mohampeakon samian na anak mo'ane. Anak aijo' osanggohi Imanuel.” (Imanuel te basa' nu Ibrani alati'nyo, “Tumpu monsangalui kita”.)

²⁴Noko pobula na i Yusuf, ia nombatukimo apaa na anu tinaloakon nu malaikat nu Tumpu hi ia. Ia monika'i Maria.

²⁵ Panyo ma'isa pe'e i Maria nohampeakon Anaknyo aijo', i Yusuf madi' nogalum tiba i Maria. Ka' salatan Anak aijo' i hampemo, i Yusuf nonsanggohi Ia i Yesus.