Read Saluan MATIUS 11 Bible Online

MATIUS 11 - Saluan bible

MATIUS 11

¹Lapas i Yesus nombee'i pokinde-pokinde' hi aha sampulu' ka' ohua' anu saja' mombatuki Ia, Ia nompala'imo tampat aijo'. Ia namba nongajan ka' noleleakon poto'ion lengkat hi Tumpu to kota-kota hi anu ohani i kiijo'.

²I Yohanes anu Mompalamandikan anu hau-haunyo kiijo' i talungku' nohongo mongkona pakalaja'an i Kristus. Lantas ia nonsai aha sangkuka na anu lewa' mombatuki namba hi Yesus da mompokilawa,

³“Kitamo Tuuma na mian anu tokamo mae, susumo koonyo nu janji' nu Tumpu, kabai tionyo kami montanda'i mian sangga'at?”

⁴I Yesus nontaami, “Pinsusule' hi Yohanes ka' opoto'iakon apaa na anu i hongomo miu ka' tinoamo;

⁵ Mian anu mapisok montoa, mian anu lupe moko lumajang, mian anu ko panyakit kilit anu okabuhuk ma'alin; mian mabongon nohongo, mian anu mate po'ule' tumuu', ka' Lele Ma'ima' lengkat hi Tumpu opotokakon hi to mia-mian kasiasi.

⁶Kopi-kopian na mian anu madi' mombahakon tiba monsalakon Aku!”

⁷Salatan i namba na anu sinai mae i Yohanes aijo', i Yesus nomulaimo binabisala hi to mia-mian da'isan mongkona i Yohanes, tukoo-Nyo, “Komiu namba i padang bolaa da nontoa apaa? Santake na bombong anu nu puuhi nu mombun?

⁸Komiu mamba da montoa apaa? Samian anu mipake ma'ima'? To mia-mian anu mipake sumo aijo', jojoong i laigan nu tomundo'!

⁹Jadi, kadaka' komiu namba i padang bolaa? Da montoa samian na nabi? Totu'unyo, aitu pe'e molingkudui samian na nabi.

¹⁰ Kalana i Yohanes aijo'mo na anu kokoonyo nu ayat nu Kitab nu Tumpu aiya, ‘Aiyamo na posaihon-Ku, koonyo nu Tumpu, Aku nonsai ia namba i moona Belento imihije da ia mombau kajalanan nu Belento.’

¹¹Inau' pe'e! I dunia aiya ma'isa toho' ko mian anu lebe daka' molingkudui Yohanes anu Mompalamandikan. Maumo sumo aitu mian anu talalo ise' atina' hi mian anu palesayamo hi Tumpu lebe daka' molingkudui Yohanes.

¹² Salatanmo pe'e i Yohanes noleleakon sisikonnyo sampe tempo' uuka, mian anu palesayamo hi Tumpu nu pisala'i nu to mia-mian anu talalo mompagala mongkuasai.

¹³Sampe kinatokan i Yohanes, iwi-iwi' na atulan i Musa ka' ajalan nu to nabi-nabi mompo'inau'akon apa-apaa na anu tionyo timbali.

¹⁴ Ka' de komiu kahanda' palesaya, i Yohanes aijo'mo na i Elia, anu kina tokannyo pinoko poto'imo.

¹⁵De daagi' ko bihing, pohongo!

¹⁶Tiba apaa na Aku tionyo mompokakanakon to mia-mian tempo' aiya? Aha sumomo to ana-anak anu sumuhang i pasan. Sanggombu na mian mobisala hi anu sangga'at.

¹⁷‘Kami mompahaikakon nyanyian anu lame' hi komiu, panyo komiu madi' mongka'oho' mosolindaya! Kami monyanyiakon nyanyian nu tomate, komiu madi' mongka'oho' humaang!’

¹⁸I Yohanes tinoka — ia bapuasa' ka' madi' monginum anggur; ka' to mia-mian notatae, ‘Ia sinoku'onmo nu setan!’

¹⁹Sinaa aiya Anak nu Mian toka — Ia mongkaan ka' monginum; ka' aitu to mia-mian motatae, ‘Toa na mian aijo'! Majoko', saja' malangu, sangalu nu anu saja' montage hasin, ka' sangalu nu mian anu baladosa'.’ Mau mule' sumo aijo', kapandean nu Tumpu otoa i kasawe'annyo mae.”

²⁰Lantas i Yesus nontampu'uni nomposala' to kota-kota', iya na anu talalo manjoo' pinombauan-Nyo anu okabangangi. Kalana to mia-mian i kota-kota' aijo' madi' mongka'oho' balatobat i dosa-dosa' nu aha.

²¹ “Silaka na komiu, Korazim! Ka' silaka mule' na komiu Betsaida! Ande-andenyo anu okabangangi binau i totonga' miu, binaumo i Tirus ka' i Sidon, tantu to mia-mian i kiijo' mae pininmo na binala tobat i to dosa-dosa' nu aha ka' nompakemo pakean nu adat de ko anu mate, ka' nompotudumo abu' i buan nu ubak.

²²Inau'mo tempo' Sinaa Kiamat, sahanyo to mia-mian nu Tirus ka' Sidon na lebe dengke na o ampuni nu Tumpu ka' de mule' komiu!

²³ Ka' komiu, Kapernaum! Apaa komiu timbali opotangkas toka i suluga'? Madi'! Ola komiu o alin mokiijo' i naraka! Kalana ande-andenyo anu okabangangi binau atina' hi komiu, aijo' binaumo i Sodom, Sodom aijo' daagi' sampe tempo' uuka aiya?

²⁴ Inau'mo, Sinaa nu Kiamat sahanyo mian nu Sodom na lebe dengke na o ampuni nu Tumpu, ka' de mule' komiu!”

²⁵Tempo'nyo aitu i Yesus binala do'amo, “Tuuma, Tumpu anu mongkuasai langit ka' tano'! Aku mompoita talima kaseh hi Kita saba' iwi-iwi' aijo' Belento nolahasiakonmo hi to mia-mian anu pande, ka' ko ilimu', panyo Belento nompotiju'akonmo hi to mia-mian anu madi' ko sikolah.

²⁶Aijo'mo na anu momposanang kinyonyoa nu Tuuma.”

²⁷ Lantas i Yesus notatae, “Iwi-iwi na apaa pinotalimamo nu Tuuma hi beleng-Ku. Madi' ko samian pe'e monsumbu' Anak, de misa' Tuuma. Madi' mule' ko anu monsumbu' Tuuma de misa' Anak, ka' to mia-mian maumo ihe na Anak aijo' monsisikakon Tuuma.

²⁸Tokamo mae hi beleng-Ku na komiu iwi-iwi' anu malawe, ka' anu mongoa'i koboatnyo nu boaon; Aku mompilaweije komiu.

²⁹ Batuki na palentang-Ku, ka' balajan pe'e hi beleng-Ku. Sabab Aku aiya madi' bohipusaon, ka' madi' ko kinti-kinti, sahingga komiu tompilawe.

³⁰Sabab to pale-palentang-Ku momposanang, ka' boaon anu Kuposimbu hi komiu laing.”