Read Saluan MATIUS 13 Bible Online

MATIUS 13 - Saluan bible

MATIUS 13

¹I sinaa aijo' mule' i Yesus nompala'imo laigan aijo', lantas namba i biwi nu Dowiwi ka' sinumuhang i kiijo'.

² Da'isan hondo na mian anu sinilimu' nontiikubi i Yesus, kalana aijo' Ia namba sinumuhang i uno nu duangan, panyo mian da'isan aijo' tinuminjo i biwi nu bone'.

³Lantas i Yesus nongajan manjoo' na han hi aha, nompake kantuang. “Samian na topo ale' namba nonsau bine',” sumo aitu na i Yesus nontampu'uni sisikon-Nyo.

⁴“Hau-haunyo nonsau, daagi' ko bine' anu nanabu' i jalan. Lantas tomonsi' tinoka ka' bine' ningkot tinoluknyo.

⁵Daagi' ko anu nanabu' i tampat anu ko batunyo, anu tano'nyo sangkiding. Bine' haha aijo' malia' na tumuu' kalana tano'nyo sangkiding.

⁶Panyo salatan sinaa tolohangkatmo, bine' anu sala'je tumuu' aijo' magayou, lapas aijo' ia manggas ka' mate, saba' bakatnyo madi' talalo maleeng.

⁷Daagi' mule' ko bine' anu nanabu' i totonga' nu tano' anu sompiniton. Sompinit anu hii'on aijo' tumuu' ka' mongepet anu sala'je tumuu' aijo' sampe ia mate.

⁸Panyo daagi' mule' ko bine' anu nanabu' i tano' anu molumba', lantas nimbua'; daagi' ko anu sa'atu, daagi' ko anu anom pulu', ka' daagi' ko anu lipat tolumpulu'.”

⁹Lapas na Ia nonsisikakon kantuang aijo' i Yesus notataemo, “De ko bihing pohongomo!”

¹⁰Lapas aijo' anu saja' mombatuki Yesus tinoka ka' nompokilawa hi Ia, “Kadaka' Kita Tuuma mompake kantuang de motatae hi mian da'isan?”

¹¹I Yesus nontaami, “Kalana komiu binee'anmo balakat da monsumbu' lahasia anu mongkona mosia na Tumpu mompalentah, panyo aha i madi'.

¹² Kalana mian anu daagi'mo, timbali obee'i lebe manjoo' mule', ka' anunyo na saidi' mae molabi. Panyo mian anu madi' ko apa-apaa, saba' sangkiding anu daagi' hi ia po'ule' o'ala.

¹³Aijo'mo na sababnyo Aku mompake kantuang de motatae tiba mian da'isan, kalana aha montoa, panyo sumo mian anu madi' montoa; aha mohongo, panyo sumo mian anu madi' mohongo, ka' madi' mangalati'.

¹⁴ Tiba han aijo' jinadimo apaa na anu pinoto'i Nabi Yesaya, ‘Tumpu notatae: Aha saja' mohongo panyo madi' mangalati'; aha saja' mompalahatikan panyo madi' monsumbu' apaa na anu jinadimo.

¹⁵Kalana pikilan nu to mia-mian aiya tinatumpumo, bihing nu aha nabongonmo ka' mata nu aha pinipidi'akonmo. Aiya jinadi da mata nu aha boli montoa, bihing nu aha boli mohongo, pikilan nu aha boli mangalati' ka' boli po'ule' minsusule' mae hi beleng-Ku, lantas Aku mompa'alin aha.’ ”

¹⁶ “Panyo palias na ka'untungan miu,” koonyo i Yesus hi anu saja' mombatuki Ia, “Kalana komiu totu'u nontoa ka' nohongo.

¹⁷Jaga mae, da'isan na nabi ka' mian anu tulut hi Tumpu mongkahanda'i montoa anu tinoa miu uuka aiya, panyo aha madi' montoa. Aha mongka'oho' mohongo apaa na anu i hongo miu uuka aiya, panyo aha madi'mo daagi' mohongo.”

¹⁸“Hongo pe'e apaa na alati'nyo nu kantuang mongkona anu monsa'u bine' aijo'.

¹⁹Bine' anu nanabu' i jalan sumomo to mia-mian mohongo lele mongkona mosia na Tumpu mompalentah, panyo madi' mangalati'. Anu Ma'idek aijo' tinoka ka' nongagoi apaa na anu daagi' pinoto'i i uno nu kinyonyoa nu aha.

²⁰Bine' anu nanabu' i tampat anu manjoo' na batu, sumomo to mia-mian anu mohongo lele aijo', ka' lau-laus montalima tiba sanang na kinyonyoa.

²¹Panyo lele aijo' madi' mimbakat i uno nu kinyonyoa nu aha, sahingga madi' montahan pin. Salatan aha mongoa'imo susa' kabai o sakisa, kalana lele aijo', lau-laus aha moojalo.

²²Bine' anu nanabu' i totonga' nu sompinit, sumomo to mia-mian anu mohongo lele aijo', panyo bata-bata mongkona kantumuu'an nu aha, ka' mongka'oho' tumuu' molabi. Kalana aijo' lele anu lengkat mae hi Tumpu, ola o piiti i kinyonyoa nu aha, sahingga madi' mimbua'.

²³Ka' bine' anu nanabu' i tano' anu molumba', sumomo to mia-mian anu mohongo lele aijo' ka' mangalati'. Aha mimbua' manjoo', daagi' ko anu sa'atu, daagi' ko anu anom pulu', ka' daagi' ko anu tolumpulu' lipat na hasinnyo.”

²⁴I Yesus monsisikakon mule' sa'angu' na kantuang hi mian da'isan, koo-Nyo, “De Tumpu mompalentah, ka'ada'annyo sumo kantuang aiya: Samian na topo ale' monsa'u bine' anu ma'ima' i ale'nyo.

²⁵Daagi' kino sampahuan, salatan iwi-iwi' na mian ihoyotmo sampobali' nu topo ale' aijo' tinoka nonsau bine' nu padang i totonga' nu gandum aijo', ka' ia namba.

²⁶Salatan anu sinau aijo' tinumuu'mo, ka' bunganyo i lubatmo kinantoaanmo suele na padang haha aijo'.

²⁷Lantas to mia-mian anu mongala tamboo hi anu mongale' aijo' tinokamo hi anu mongale' aijo' ka' notatae, ‘Te misa' kita Tuan na nonsau bine' anu ma'ima' aijo' i ale' i Tuan? Mosia na jadinyo sampe ko to pada-padangnyo aijo' mae?’

²⁸Anu topo bau ale' aijo' nontaami, ‘Aijo' palabuatan nu anu monsampo bali'.’ Lantas to mia-mian anu mongala tamboo i ale' aijo' po'ule' nompokilawa, ‘Tuan timbali na kami mamba mombubuti padang aijo'?’

²⁹‘Madi',’ tinaamannyo, ‘Kalana padang haha aijo' de o bubutimo, tantu gandumnyo suele tombubutmo.

³⁰Pojohokmo na padang haha aijo' tumuu' hingga-hinggat toka tempo'nyo mompadak. Tanda'i, kutaloakonje hi to mia-mian anu mompadak'. Limu'akon pe'e na padang haha aijo', obutu'i ka' o papui. Lapas aijo' limu' na gandumnyo, ka' o uno i uno nu alang.’ ”

³¹I Yesus nonsisik mule' sa'angu' na kantuang hi mian da'isan, koonyo, “Bisuannyo Tumpu mompalentah, ka'ada'annyo sumomo kantuang aiya; sa'angu' na batu nu sasawi ingala nu samian, lantas sinau i ale'nyo.

³²Batu nu sasawi aijo'mo bine' anu ise' hondo. Panyo de tumuu'mo, ia timbalimo anu talalo daka' i totonga' nu anu pinaha su'an. Ia timbalimo kau', sahingga to tomo-tomonsi' toka mimpeta i to panga-panga'nyo.”

³³Daagi' ko sa'angu' na kantuang sangga'at anu sinisikakon i Yesus hi mian da'isan. “Bisuannyo Tumpu mompalentah, ka'ada'annyo sumomo ragi anu ingala nu samian na boune, lantas ginalo'akon tiba patom pulu' na liter na labu nu tiligu sampe mo'insu' iwi-iwi'!”

³⁴Iwi-iwi' ingajanakon i Yesus hi mian da'isan mompake kantuang.

³⁵ Salatan sumo aijo' tinimbalimo na anu tinaloakon nu nabi, “Aku mompake kantuang de motatae tiba aha: Aku mompoto'ije hahan anu sulu-suluk daagi' pe'e u'utu mae jinadi na dunia aiya.”

³⁶Lapas aitu i Yesus nompala'imo mian da'isan aijo', lantas ninsoop i laigan. Anu saja' mombatuki Ia tinoka ka' notatae, “Soba kita Tuuma talangkan mae hi kami na alati' nu kantuang anu mongkona to pada-padang i totonga' nu gandum aijo'.”

³⁷I Yesus nontaami, “Mian anu monsa'u bine' anu ma'ima', aijo'mo na Anak nu Mian.

³⁸Ale' aijo', aiyamo dunia aiya. Bine' anu ma'ima', aijo'mo to mia-mian anu tinimbalimo mian anu palesayamo hi Tumpu. To pada-padang aijo'mo to mia-mian anu mosambiha' hi Ibilis.

³⁹Sampobali' anu nonsu'an padang haha aijo' Ibilis. Tempo' nu mompadak, aijo'mo Sinaa Kiamat, ka' to mia-mian anu mompadak aijo'mo na to mala-malaikat.

⁴⁰Sumo aitumo na to pada-padang olimu' ka' opapui i uno nu apu, sumo aitumo na Sinaa de Kiamatmo.

⁴¹Anak nu Mian monsaije to mala-malaikat-Nyo molimu' miannyo iwi-iwi' anu nonsaduakonmo mian nombau dosa', ka' iwi-iwi' mian sangga'at anu nombau ka'idekan.

⁴²Aha iwi-iwi' olumbu'akon i uno nu tolukun anu ko apunyo ka' moak hondo; i kiijo' aha humaangje ka' mongoa'i sansala.

⁴³Ka' to mia-mian anu nombaumo kahanda' nu Tumpu majingka sumo batu nu sinaa i uno nu Dunia Bu'ou nu Tumpu, Tuuma nu aha. Jadi, de daagi' ko bihing, pohongomo!”

⁴⁴“De Tumpu mompalentahmo, ka'ada'annyo sumomo kantuang aiya: daagi' ko halata' anu sulu-suluk i uno nu tano', lantas i humpak nu samian, ka' po'ule' tinabuhannyo i uno nu tano'. Lapas aijo', kalana i lame'mo, mian aijo' namba nompobaluk iwi-iwi' na halata'nyo, lantas ninsusule' ka' nongoli tano' aijo'.”

⁴⁵“De Tumpu mompalentahmo, ka'ada'annyo sumomo aiya: Samian na dagang molio to muti-mutiara anu ko halaga'nyo.

⁴⁶Salatan ia nohumpakmo sa'angu' na mutiara anu talalo hondo ma'ima', lau-laus ia namba nompobaluk iwi-iwi' na halata'nyo, lantas nongoli mutiara anu sa'angu' aijo'.”

⁴⁷“De Tumpu mompalentahmo, ka'ada'annyo: O'umpamakon nu buani' anu binuani'akon i dowiwi, lantas nohumpak manjoo' na ngahan nu ikan.

⁴⁸Salatan buani' aijo' nobuke'mo, buani' aijo' i hangkat i katano'an, nu topo ikan. Lapas aitu aha sinumuhang ka' nompo'i-po'iwi' ikan haha aijo', anu ma'ima' inguna' nu aha i kalanjang, ka' anu madi' ma'ima' ingalinmo.

⁴⁹Sumo aitumo na tempo' nu Sinaa Kiamat, to mala-malaikat mambaje mompo'i-po'iwi to mia-mian ma'idek, tiba to mia-mian anu mombau kahanda' nu Tumpu.

⁵⁰Lapas aijo' to mia-mian ma'idek aijo' o'alinmo i uno nu tolukun anu ko apunyo. I kiijo'mo na aha humaang ka' mongoa'i sansala.”

⁵¹“Pa' komiu mangalati' iwi-iwi' aijo'?” Pinokilawa i Yesus. “Mangalati' Kita Tuumangku!” tinaaman nu aha.

⁵²Lantas i Yesus notataemo, “Aijo', na sababnyo batu-batu gulu' Agama anu timbalimo mian anu palesayamo hi Tumpu, sumo samian na tumpu nu laigan anu monsabatakon lengkat i tampat nu halata'nyo anu bu'ou ka' anu pininmo.”

⁵³Salatan i Yesus ilapasmo na nonsisikakon kantuang aijo', ia nompala'imo tampat aijo',

⁵⁴lantas ninsusule'mo i kampung-Nyo. I kiijo' mae Ia namba nongajan i laigan pogalejaan, ka' to mia-mian anu nohongo Ia i kiijo' binangangmo hondo. Aha notatae, “Lengkat iyamae na mian aiya nohumpak kapandean sumo aijo'? Ka' lengkat mae iya na Ia nohumpak kuasa mombau anu okabangangi?

⁵⁵Te misa' Ia anak nu tukang kau'? Te misa' i Maria aijo' na tina-Nyo; ka' to utu-utus-Nyo aijo'mo i Yakobus, i Yusuf, i Simon, ka' i Yudas?

⁵⁶Ka' te misa' to utu-utus-Nyo boune jojoong i aiya suele? Lengkat mae iya na Ia nohumpak iwi-iwi' aijo'?”

⁵⁷ Sahingga aha madi' nontalima i Yesus. Lantas i Yesus notatae hi aha, “Samian na nabi o adati iyayamae, panyo posi i kampungnyo ka' i laigannyo, madi' o adati.”

⁵⁸Kalana aijo' i Yesus madi' nombau manjoo' na anu oka'ambangi i kiijo', kalana aha madi' palesaya.