Read Saluan MATIUS 14 Bible Online

MATIUS 14 - Saluan bible

MATIUS 14

¹Tempo'nyo aitu i Herodes mongkuasai lipu' nu Galilea, nohongo lele i Yesus.

²I Herodes notataemo hi to paga-pagawenyo, “Tantu aiya i Yohanes anu Mompalamandikan po'ule'mo tinumuu'! Aijo' na sababnyo Ia ko kuasa mombau anu okabangangi.”

³ Kalana toho'mo i Herodes nompokau da i hakop na i Yohanes, ka'pinungu na ia ka' pinosoop i uno nu talungku'. I Herodes nombau sumo aitu, kalana han i Herodias bengkele' nu utusnyo, aijo'mo i Filipus.

⁴ Kalana toho'mo i Yohanes nontaeakon sumo uuka hi Herodes, “Madi' timbali beleyum mo'osoa tiba i Herodias!”

⁵Sabenannyo i Herodes mongka'oho' mompatei i Yohanes, panyo ia mabuhuk hi to mia-mian, kalana aha monsangka i Yohanes nabi.

⁶Tempo'nyo i Herodes molame'akon sinaa ka' taun kinahampeannyo, anak boune i Herodias nanari i ahop nu mian da'isan. Ia nanari talalo nomposanang kinyonyoa i Herodes,

⁷sahingga i Herodes binajanji' hi ia tiba sumpa', koonyo apaa na anu nu poita obee'je hi ia.

⁸Kalana sinale'anmo nu tinanyo, langkoyang aijo' notataemo, “Kupoita ubak i Yohanes anu saja' Mompalamandikan obee'akon mae hi belengku uuka aiya ka' osake' mae i dulang!”

⁹Nohongo poitaon aitu, i Herodes nolibosmo hondo. Panyo kalana ia binasumpa'mo i ahop nu mian anu pinasonyo toka i lameannyo, ia nompalentahkonmo da poitaon nu langkoyang aijo' opo daagi'.

¹⁰Ia nonsai mian mamba mokiijo' i talungku' da mongkolong mae ubak i Yohanes.

¹¹Lapas aitu ubak i Yohanes binoa pinotimpas i dulang, ka' binee' hi langkoyang aijo'. Lantas langkoyang aijo' nomboa mule' hi tinanyo.

¹²Salatan sumo aitu anu saja' mombatuki Yohanes tinokamo nongala mayat i Yohanes ka' i lamunnyo. Lantas aha namba nompoto'iakon han aijo' hi Yesus.

¹³Tempo'nyo i Yesus nohongo lele aijo', Ia sinumake' i duangan posi sausa'nyo ka' nompala'i tampat aijo', da mamba mokiijo' i tampat anu liing. Panyo salatan ihongo nu to mia-mian na han aijo', aha nompala'i kota-kota nu aha ka' namba nompayuntun i Yesus nontulu jalan katano'an.

¹⁴Tempo'nyo i Yesus ilumobos lengkat i duangan ka' nontoa mian da'isan aijo', Ia nolibosmo hi aha. Lantas Ia nompa'alin to mia-mian anu masakit kiijo' hi aha.

¹⁵Tompasi'mo na sinaa, anu saja' mombatuki Yesus tinokamo ka' notatae hi Ia, “Sinaa aiya tompasi'mo ka' tampat aiya mosi panintade. Sahanyo kita Tuuma monsai to mia-mian aiya mamba, da timbali mongoli kaanon i to kampu-kampung.”

¹⁶“Bolimo aha mamba”, koonyo i Yesus, “Komiumo na mombee'i aha mongkaan.”

¹⁷“Hi kami ola ahi' olima' na roti ka' ohua' na ikan!” Tinaaman nu anu saja' mombatuki Yesus aijo'.

¹⁸“Boa mae na aijo',” koonyo i Yesus.

¹⁹Lapas aitu Ia nonsai mian da'isan aijo' da sumuhang i hemput. Lantas Ia nongala olima' na roti ka' ohua' na ikan, ka' nonsinda langit ka' nompoita balakat hi Tumpu. Lapas aijo' Ia nompuge-puge roti aijo' nu lima-Nyo ka' nombee' hi anu saja' mombatuki Ia da obagi-bagiakon hi mian da'isan aijo'.

²⁰Aha iwi-iwi' nongkaan sampe nobosumo. Lapas aijo' anu saja' mombatuki Yesus nolimu' labinyo nu anu kinaan aijo', daagi' sampulu' ka' ohua' na ponang nobuke'.

²¹Anu nongkaan tempo'nyo aitu kugantang olima' na madala na mian, aitu ma'isa pe'e binilang na boune ka' to ana-anak.

²²Lapas aijo' i Yesus nonsaimo anu saja' mombatuki Ia da sumake'mo i duangan, ka' momonanyo motaap pe'e i dowiwi, hau-haunyo Ia nonsaimo mian da'isan aijo' da minsusule'mo.

²³Salatan mian da'isan aijo' mambamo, i Yesus noliba'mo i sa'angu' na bungkutnyo sausa'nyo da balado'a. Tempo'nyo aitu pinihimo, i Yesus daagi' kiijo' mae sausa'nyo.

²⁴Hau-haunyo aijo' duangan anu sinake'an nu anu saja' mombatuki Yesus najo'onmo i totonga' nu dowiwi. Duangan aijo' ningkele-kelenjuangmo sinantip nu bokon, kalana baleba' nu ahopi nu duangan.

²⁵Ohanimo jam totolu' ka' jam anomo subu, i Yesus tinokamo hi aha i lumajang i bawo nu uee.

²⁶Salatan anu mombatuki ia, nontoa ia i bawo nu uee aha tinolokengkengmo hondo, “Kadudu!” Noloboo'mo na aha ka' nabuhukmo.

²⁷Panyo i Yesus lau-laus nontaami, “Potanang! Aku i Yesus. Boli mabuhuk!”

²⁸Lantas i Petrus notatae, “De Beleyum totu'u i Yesus, saimae na aku lumajang i bawo nu uee.”

²⁹“Toka mae,” Tinaaman i Yesus. Jadi i Petrus i lumobos lengkat i duangan, ka' i lumajang i bawo nu uee, ka' tinoka hi Yesus.

³⁰Panyo salatan i Yesus nontoa, palias na kinodaka'nyo na baleba' i dowiwi aijo', ia nabuhukmo ka' nontampu'unimo tinonu'. “Tumpu, tulung!” ia noloboo'.

³¹I Yesus nalia-lia' na nonguluakon lima-Nyo ka' nontoongi ia, ka' notatae, “Petrus, Petrus, beleyum aiya ma'isa talalo palesaya. Kadaka' beleyum bata-bata hi beleng-Ku?”

³²Lantas ua'aha aijo' sinumake'mo i duangan aijo' ka' baleba' binelentimo.

³³Sahingga anu saja' mombatuki Yesus tinolodupu ka' nonsombah Ia. Aha notatae, “Totu'u Tumpu Anak nu Tumpu!”

³⁴Tempo'nyo aha tinoka i santoa nu dowiwi, aha i lumajang tano' nokiijo' i Genesaret.

³⁵Ka' tempo'nyo to mia-mian i kiijo' nontoa taalu' anu tinoka aijo', i Yesus. Aha noleleakonmo lele aijo' i songko-songko na da'erah ka' anu mompaha ohani kota aijo'. Lantas iwi-iwi' na mian anu masakit binoamo hi Yesus.

³⁶Ka' aha nompoita hi Ia da timbali montiik juba'-Nyo, mau ola puusnyo. Lantas iwi-iwi' na anu montiik na'alinmo.