Read Saluan MATIUS 15 Bible Online

MATIUS 15 - Saluan bible

MATIUS 15

¹Sanggombu na mian nu Farisi ka' toto piangkuka na Gulu' Agama lengkat mae i Yerusalem tinokamo hi Yesus. Aha nompokilawa hi Ia,

²“Kadaka' anu saja' mombatuki Belento molanggai to ada-adat nu mompolee'to? De mongkaanmo, aha madi' mombaso'i lima imoonanyo mombatuki atulan!”

³I Yesus nontaami, “Ka' kadaka' komiu suele molanggai palentah nu Tumpu, ola kalana mongka'oho' mombatuki to ada-adat nu mompolee' miu?

⁴ Sabab Tumpu notatae, ‘O'adati na tuumaum ka' tinaum,’ ka' ‘Ihehemo na montalo-taloakon tuumaum, tinaum, tionyo o hukum mate.’

⁵Panyo komiu mongajanakon: de mian motatae hi tu'anyonyo, ‘Apaa na anu tionyo kubee' hi tuuma ka' tina, sinombahkonkumo hi Tumpu Allah,’

⁶saba' mian aijo' madi'mo daagi' o tuntut da mongadati tu'anyonyo. Jadi, kalana to ada-adat nu mompolee'um, komiu mongoa'imo dengke na potatae nu Tumpu.

⁷Komiu mian baleko'! Kona hondo apaa na anu tinaeakonmo i Yesaya mongkona komiu, aitumo,

⁸ ‘Sumo uuka na koonyo nu Tumpu: To mia-mian haha aijo' ola ahi' monsombah Aku nu potatae, panyo kinyonyoa nu aha majo'on lengkat hi beleng-Ku.

⁹Palasuma na aha monsombah Aku, kalana atulan nu mian na nu ajan nu aha kokoonyo pe'e aijo' atulan-Kumo.’ ”

¹⁰Lapas aijo' i Yesus nolaga to mia-mian ka' notatae hi aha, “Hongo da mangalati'!

¹¹Anu minsoop i nganga' madi' mombau da mian aijo' mahumimi'; ola ahi' anu mosabat lengkat i nganga'nyo, aijo'mo na anu mompotimbali ia mahumimi'.”

¹²Lantas anu saja' mombatuki Yesus tinoka ka' notatae hi Ia, “Osumbu'mo nu Kita Tuuma saba' to mia-mian nu Farisi aijo' ingise'-ise'mo, tempo'nyo nohongo Kita Tuuma notatae sumo aijo'?”

¹³I Yesus nontaami, “Batu-batu pomulaon anu madi' sinu'an nu Tuumang-Ku i suluga' o bubutakon.

¹⁴ Madi' timbali opalahatikan na to mia-mian Farisi aijo'. Aha aijo' mapisok montaka' anu mapisok; jadi, de mian mapisok montaka' mian mapisok ua-ua'aha timbali manabu' i uno nu bolo'.”

¹⁵I Petrus notatae, “Tulungi mae pojalasakon na kantuang aijo' hi kami, Kita Tuuma!”

¹⁶I Yesus nontaami aha, “Apaa komiu suele ma'isa mangalati'?

¹⁷Madi' osumbu' miu kalana anu minsoop i uno nu nganga' mintatau' i uno nu kompong, ka' lapas mae mosabatmo mule'?

¹⁸ Panyo anu mosabat lengkat i nganga', aijo' pinolengkatannyo mae, lengkat i kinyonyoa; ka' aijo'mo na mombau mian timbali mahumimi'.

¹⁹Kalana lengkat i uno nu kinyonyoa lubat na pikilan-pikilan anu ma'idek, anu monsabapi mian mompatei, masala' mombau anu moko mahenyu, montomang, mombee'i sakisi baleko', ka' mompitana'akon.

²⁰Hahan aijo' na monsabapi mian timbali mahumimi', ka' misa' mongkaan nu lima anu madi' o baso'i.”

²¹Lapas aijo' i Yesus nompala'i tampat aijo', ka' namba i tano' ohani kota Tirus ka' Sidon.

²²Samian na boune nu Kana'an lengkat mae i da'erah aijo', tinoka hi Yesus ka' nolo-noloboo', “Anak i Daud, kalibosi na aku! Anakku boune pininsoopanmo nu roh ma'idek. Ka'ada'annyo masakit hondo.”

²³I Yesus madi' nontaami mau pe'e apaa hi boune aijo'. Lantas anu saja' mombatuki Yesus tinoka hi Ia ka' nompoita, “Kita Tuuma, sai na boune aijo' mamba. Ia ola saja' hengge' i hikunto!”

²⁴I Yesus nontaami, “Aku sinai ola ahi' mamba hi bansa Israel, posi hi aha anu sala' na jalan.”

²⁵Boune aijo' tinoka ka' tinolodupu i ahop hi Yesus ka' notatae, “Tulungi mae na aku, Kita Tuan.”

²⁶I Yesus nontaami, “Madi' ma'ima' mongala kaanon nu to ana-anak, ka' o bahetakon hi dedeng.”

²⁷“Totu'u Kita, Tuan”, tinaaman nu boune aijo', “Panyo dedeng pe'e mongkaan laaya' anu manabu' lengkat i meja' nu tuannyo.”

²⁸Lantas aijo' i Yesus notataemo hi ia, “Kita Tina, totu'u daka' na palesayaum! Jadimo, apaa na anu nu ka'oho'!” Tempo'nyo aitu mule' anak boune aijo' i na'alinmo.

²⁹I Yesus nompala'imo tampat aijo', lantas ilumajang nontuus biwi nu bone' i dowiwi nu Galilea. Lapas aitu Ia noliba' i sa'angu' na bungkutnyo, lantas sinumuhang i kiijo'.

³⁰Da'isan na mian anu tinoka hi Ia nomboa to mia-mian anu pengko', anu mapisok, anu kapi', anu momo', ka' da'isan mule' na mian anu masakit, sangga'at. Aha nompo'una' mian haha aijo' i ahop hi Yesus, ka' Ia nompa'alinakon mian haha aijo'.

³¹Mian da'isan anu daagi' i kiijo' binangang hondo, salatan aha montoamo mian momo' notataemo, mian pengko' na'alinmo, mian anu kapi' ilumajangmo, ka' mian anu mapisok nontoamo. Lantas aha nompuji-puji'mo Tumpu bansa nu Israel.

³²Lapas aijo' i Yesus nolaga anu saja' mombatuki Ia ka' notatae, “Aku molibos hi mian da'isan aijo'. Tolunsinaamo na kopinnyo aha nohingga-hinggat tiba aku, ka' uuka aha madi'mo ko kaanon. Aku madi' mongka'oho' mompojohok aha minsusule' mo'ohop dumo tolubuk i jalan.”

³³Lantas anu saja' mombatuki Yesus nompokilawamo hi Ia, “Iyamae na kita timbali mohumpak kaanon i da'erah anu manintade aiya bau kapentingan nu mian ko da'isan aiya?”

³⁴“Daagi' sangkuka na roti hi komiu?” pinokilawa i Yesus hi aha. “Popitu',” tinaaman nu aha, “ka' ikan to ise-ise' daagi' pia-piangkuka na batunyo.”

³⁵Lantas i Yesus nonsai mian da'isan aijo' da sumuhangmo i tano'.

³⁶Lapas aijo' Ia nongala popitu' na roti ka' ikannyo, lantas Ia nompoitamo talima kase hi Tumpu. Lapas aijo', Ia nompuge-pugemo roti ka' ikan aijo' nu lima-Nyo, ka' binee'-Nyo hi anu saja' mombatuki Ia. Ka' binagi-bagiakonnyo hi mian da'isan aijo'.

³⁷Iwi-iwi' na mian aijo' nongkaan sampe nobosu. Ilapas aijo' anu saja' mombatuki Yesus nolimu' labinyo nu anu kinaan nu aha aijo'. Iwi-iwi' popitu' na ponang nobuke'.

³⁸Konjoo' nu mian, ola posi to momo'ane anu nongkaan tempo'nyo aijo', opat na madala na mian, ma'isa i lekeng na boune ka' to ana-anak.

³⁹Lapas aijo', i Yesus nonsaimo mian da'isan aijo' minsusule'. Ia sinumake'mo i sa'angu' na duangan ka' namba nokiijo' i da'erah Magadan.