Read Saluan MATIUS 16 Bible Online

MATIUS 16 - Saluan bible

MATIUS 16

¹ Daagi' kino pia-piangkuka na mian nu Farisi ka' mian nu Saduki tinoka hi Yesus nonsobai Ia. Aha nompoita Ia mombau anu okabangangi da mompototu'u taalu' Ia tinoka lengkat mae hi Tumpu Allah.

²I Yesus nontaami, [“De batu nu sinaa ohanimo makakinsap, komiu motatae, ‘Sinaa ma'ima', saba' langitnyo momea'.’

³Ka' daagi' subu komiu motatae, ‘Sinaa aiya ujanmo, saba' langit momea' ka' mohungkom.’ Jadi, komiu timbali mongkila-kila loonu, kalana montoa baunyo nu langit, padahan tanda-tanda nu tempo'nyo kiamat madi' opoko kila-kila miu!”]

⁴ “Ibeh na ko ideknyo ka' ko geguannyo na to mia-mian tempo' aiya. Komiu mompoita Aku mombau anu okabangangi. Komiu madi' obee'i sa'angu' na anu okabangangi, boli mompiakon anu okabangangi i Nabi Yunus.” Salatan notatae sumo aitu, i Yesus nompala'imo aha, lantas i nambamo.

⁵Tempo'nyo anu saja' mombatuki Yesus tinokamo i santoa nu dowiwi, sinumbu'je nu aha, taalu' aha nongkolilimimo nomboa roti.

⁶ I Yesus notatae hi aha, “Bala'ingati mae na ragi nu to mia-mian Farisi ka' Saduki.”

⁷Nohongo potatae i Yesus aijo', anu saja' mombatuki Yesus nontampu'unimo notatae samian ka' samian, “Ia motatae sumo aijo', kalana kita madi' mae nomboa roti.”

⁸I Yesus monsumbu' apaa na anu binisalakon nu aha. Jadi Ia notatae, “Kadaka' komiu mombisalakon kalana madi' ko roti? Komiu madi' talalo palesaya!

⁹ Ma'isa mangalati' na komiu? Apaa komiu madi' tonginau' i olima' na roti anu pinuge-pugeng-Ku bau bagi nu olima' na madala na mian? Piangkuka na loyang na labinyo nu roti anu pinolimu' miu?

¹⁰ Ka' mosia mule' tiba popitu' na roti bau bagi nu opat na madala na mian aijo'? Piangkuka na ponang na labinyo nu kaanon anu pinolimu' nu belemiu?

¹¹Kadaka' sampe komiu madi' mangalati', kalana Aku misa' notatae tiba komiu mongkona roti? Bala'ingati mae na ragi nu to mia-mian Farisi ka' Saduki!”

¹²Kahimpusannyo anu saja' mombatuki Yesus aijo' nangalati'mo saba' i Yesus nonsai ahi' aha, bala'ingati misa' ragi anu opake pombau roti, panyo mongkona to panga-pangajalan nu to mia-mian Farisi ka' Saduki!

¹³I Yesus namba nokiijo' i da'erah ohani kota Kaisarea-Filipi. I kiijo' Ia nompokilawa hi anu saja' mombatuki Ia, “Koonyo nu mian. Ihe na Anak nu Mian aijo'?”

¹⁴ Anu saja' mombatuki Ia nontaami, “Daagi' ko anu notatae i Yohanes anu Mompalamandikan. Daagi' mule' ko anu notatae i Elia. Anu sangga'at mule' notatae i Yeremia, kabai sala'sa'angu' na nabi.”

¹⁵“Panyo de posi pikilan miu, Aku aiya ihe?” pinokilawa i Yesus hi aha.

¹⁶ I Simon Petrus nontaami, “Kita Tuuma aijo'mo na Tomundo anu Momposalamat, Anak nu Tumpu Anu Tuumu'.”

¹⁷“Talalo untung hondo na beleyum, Simon anak i Yona!” na koonyo i Yesus. “Kalana misa' mian na nompotoiyakon han aijo' hi komiu, panyo Tuumang-Ku anu i suluga'.

¹⁸Kalana aijo' osumbu'mo, beleyum atina' i Petrus, batu anu mahoson. Ka' aita' i batu, aiya na Aku mompotinjo Grejang-Ku, anu madi' opoko hungku'i; mau mule' anu monsilakai!

¹⁹ Aku mombee'je hi beleyum gunsing lengkat i Dunia Bu'ou nu Tumpu. Apaa na anu nu poliwa'i i dunia, suele opoliwa'i i suluga'. Ka' apaa na anu nu pototu'u nu beleyum i dunia, suele mule' opototu'u i suluga'.”

²⁰Lapas aijo' i Yesus nompo'ingatmo anu saja' mombatuki Ia, da aha madi' mompoto'i hi ihehemo, taalu' Iamo na Tomundo anu Momposalamat.

²¹I mulaan lengkat tempo'nyo aijo', i Yesus notatae pinotantu-Nyomo hi anu saja' mombatuki Ia, tukoonyo Ia tionyo mamba i Yerusalem, ka' mongoa'i manjoo' na kasansala'an lengkat i to pola-polaya', to ima-imam kapala ka' to gulu-gulu' agama. Ia tionyo o silakai, panyo sinaa kototolu'nyo Ia po'ule'mo opotumuu'.

²²Lantas i Petrus nohambet i Yesus i sohipi' ka' nontaloakon Ia, tukoonyo, “Bisa-bisa' Tumpu mompojo'onakon han aijo', Tumpu! Boli sampe han aijo' timbali hi Tumpu!”

²³I Yesus nonsiloi lantas notatae hi Petrus, “Lako' pala'i na tampat aiya, Ponggoda! Beleyum montewa' Aku. Pikilanum aijo' pikilan nu mian; misa' pikilan nu Tumpu!”

²⁴ Lapas aijo' i Yesus notatae hi anu saja' mombatuki Ia. “Mian anu mongka'oho' mombatuki Aku, tionyo mongkolilimi posi kapentingannyo, monsimbu salibnyo, ka' tionyo mombatuki Aku.

²⁵ Kalana mian anu mongka'oho' montoongi kantumuu'annyo, madi'mo mohumpak kantumuu'annyo. Panyo mian anu mombee' kantumuu'annyo kalana Aku, tionyo mohumpak kantumuu'an.

²⁶Apaa na untungnyo hi toto samian de songko-songko na dunia aiya timbalimo anunyo, panyo madi'mo nu humpak na kantumuu'annyo? Timbali na kantumuu'an aijo' otolosi nu sambu-sambumo?

²⁷ Madi'mo pin Anak nu Mian, mohingga-hinggatmo tiba to mala-malaikat-Nyo tokamo mae tiba kuasa nu Tuuma-Nyo. Tempo'nyo aitu Ia mombalosimo toto samian sitimbang tiba i palabuatannyo.

²⁸Da osumbu' anu daagi' aiya hi komiu, daagi' ko anu madi' silaka, de ma'isa pe'e montoa Anak nu Mian toka mae sumo Tomundo.”