Read Saluan MATIUS 18 Bible Online

MATIUS 18 - Saluan bible

MATIUS 18

¹ Tempo'nyo aitu anu saja' mombatuki Yesus tinoka hi Ia ka' nompokilawa, “Ihe na anu osangka talalo daka' i mian anu palesayamo hi Tumpu?”

²I Yesus nolaga samian na anak anu ise', ka' ia pinotinjo i ahop nu aha.

³ Lantas i Yesus notatae, “Palesayamo! Ola ahi' de komiu mongabali' ka' timbali susumo to ana-anak, komiu timbali minsoop mian anu palesayamo hi Tumpu.

⁴Mian anu mompota'aluk butongnyo ka' timbali susumo anak aiya, iamo na anu talalo daka' hi mian anu palesayamo hi Tumpu Allah.

⁵Ka' mian anu montalima anak anu sumo aiya kalana Aku, bala alati' montalima Aku.”

⁶“Ihe na anu monsaduakon sala'samian na to mia-mian anu ise' aiya madi'mo palesaya hi beleng-Ku, lebe ma'ima' de batu ponggilingnyo o popuut i bokoko'nyo ka' ia o tua i ambai anu maleeng.

⁷Paya' na ko ideknyo na dunia aiya kalana hahan anu monsaduakon mian baladosa'. Totu'u hahan anu sumo aitu saja' daagi', panyo silaka na mian anu monsaduakon!

⁸ De limaum kabai tengkeum monsaduakon beleyum baladosa', okolongakon ka' o'alin. Lebe ma'ima' beleyum tumuu' tiba Tumpu Allah, maumo madi' ko sambiha' na lima kabai tengke, de mule' beleyum o alin i uno apu nalaka tiba ohua' na lima ka' tengkeum.

⁹ Ka' de mataum monsaduakon beleyum mombau dosa', kubetakon ka' o alin. Lebe ma'ima' beleyum tumuu' tiba Tumpu mau mule' sa'angu' na mata, de mule' o alin i uno nu apu nalaka tiba ohua' na mata.”

¹⁰“Jaga! Boli mompopo'ambang sala'samian na to mia-mian anu ise' aijo'. Kalana, o inau'mo, na to mala-malaikat, aha saja' i ahop nu Tuumang-Ku i suluga'. [

¹¹ Kalana Anak nu Mian toka da momposalamat mian anu talas!]

¹²Mosia na pongka'oho'um? De daagi' ko samian anu ko dombanyo sa'atu, lantas sa'angu' na domba-domba aijo' molapus, apaa na anu nu bau nu mian aijo'? Tantu nu pala'i na domba anu siompulu' ka' osio' aijo' i bungkutnyo, ka' mamba molio anu molapus aijo'.

¹³Ka' de po'ule'mo i humpaknyo na domba aijo' — palesaya na Aku — ia lebe lame' i domba anu sa'angu' aijo' molingkudui anu siompulu' ka' osio' sangga'at anu madi' nolapus.

¹⁴Sumo aitumo na Tuumaum i suluga' madi' mongka'oho' sala'samian lengkat hi to mia-mian anu sala'je palesaya hi beleng-Ku aiya, sala' jalan.”

¹⁵ “De utusum baladosa' hi beleyum, lako' hi ia ka' opoto'i na kasala'annyo. Obau na aijo' hoko-hokot, ola posi komiu ua'aha. De ia mombatuki potataeum, saba' ko hasinnyo na beleyum po'ule' nohumpak utusum aijo'.

¹⁶ Panyo de madi', boa na samian, kabai ua'aha na mian mule'. Kalana i uno nu Kitab nu Tumpu tinulis, ‘Tahahumo sangkiding ohua' kabai totolu' na sakisi anu opalalu da momponyata' samian na anu osangka ko sala'nyo.’

¹⁷De ia madi' montalima pokinde' nu to mia-mian aijo', poto'i na han aijo' hi jama'at. Ka' kahimpusannyo de ia madi' mongka'oho' montalima pokinde' nu jama'at, anggapmo na ia sumomo anu montage hasin, ka' samian anu madi' monsumbu' Tumpu Allah.”

¹⁸ “Osumbu'mo: Apaa na anu opoliwa' miu i dunia aiya, sumo aitumo suele opoliwa' i suluga'. Ka' apaa na anu opototu'u miu i dunia aiya, suele opototu'u i suluga'.

¹⁹Ka' da osumbu' mule': De itina' hi komiu i dunia aiya ua'aha na mian situjumo mau mule' pa'apaa na o do'akon, do'a aijo' nu talima nu Tuumang-Ku i suluga'.

²⁰Kalana iya na mian ua'aha kabai totolu' na mogombu kalana Aku, Aku toka i totonga' nu aha.”

²¹ Lapas aitu, i Petrus tinoka hi Yesus ka' nompokilawa, “O Tumpu, de utusku baladosa' hi belengku, sampe piangkuka na aku tionyo mongampuni ia? Sampe to pimpitun?”

²²I Yesus nontaami, “Madi', misa' ola pimpitun, panyo lipat pitumpulu' ka' popitu'!

²³Kalana de Tumpu mompalentahmo, ka'ada'annyo sumomo i uno nu kantuang aiya: Samian na tomundo mongka'oho' mompolunasakon sama-samaya' nu to posa-posaihonnyo.

²⁴Tempo'nyo ia montampu'unimo mompalesaya, pinopangadap hi ia samian na posaihon anu ko samaya'mo juta-juta,

²⁵ka' anu madi'mo moko polunas. Jadi, tomundo aijo' mompalentahkon da posaihon aijo' opobaluk tiba anak, ka' bengkele'nyo, ka' iwi-iwi' na halata' nu aha bau pombayan samaya'nyo.

²⁶Posaihon aijo' nonsombah i ahop nu tomundo aijo', ka' nompoita, ‘Kita Tuan, ampuniakon pe'e mae na posaihonto. Posaihonto mompolunasje iwi-iwi' na samaya'.’

²⁷Tomundo aijo' nolibos hi ia, sahingga ia nohapus iwi-iwi' na samaya'nyo.

²⁸Salatan posaihon aijo' nosabat, ia nompahakabotmo tiba sangalunyo, samian na posaihon suele anu ko samaya' hi ia to pia-piangkuka na madala. Ia nohakop sangalunyo aijo', ka' kinoko'nyo, ka' notatae, ‘Bayan mae iwi-iwi' na samaya'um!’

²⁹Lantas sangalunyo aijo' nonsombah i ahopnyo, lantas nompoita, ‘Sabaan pe'e sangalu, iwi-iwi' ku bayanje!’

³⁰Panyo posaihon aijo' madi' nontalima. Panyo ola mule' ahi', pinosoopnyo na ia i uno nu talungku' sampe ia nombayan samaya'nyo.

³¹Salatan to posa-posaihon sangga'at nontoa apaa na anu jinadimo aha nolibos ka' nompoto'i han aijo' hi tomundo.

³²Saba' tomundo aijo' nolaga posaihon anu ma'idek aijo' ka' notatae hi ia, ‘O posaihon anu ma'idek! Iwi-iwi' na samaya'um i hapus kumo, ola kalana beleyum nongkakasemo hi belengku.

³³Te misa' beleyum suele tionyo ahi' molibos hi sangaluyum, susumo aku nongkalibosimo beleyum?’

³⁴Tomundo aijo' talalomo pinusa. Posaihon anu ma'idek aijo' pinosoopnyo i uno nu talungku' sampe ia nompolunas iwi-iwi' na samaya'nyo.”

³⁵I Yesus nompomingkot sisik-Nyo nu potatae sumo uuka, “Sumo aijo'mo na Tuumang-Ku i suluga' mombau komiu toto samian, de madi' sanang na komiu mongampuni utusum.”