Read Saluan MATIUS 21 Bible Online

MATIUS 21 - Saluan bible

MATIUS 21

¹Salatan Yerusalem ingohanimo, aha tinokamo i Betfage i Bungkutnyo nu Zaitun. I kiijo' i Yesus nonsai ua'aha na mian anu saja' mombatuki Ia lumajang namba i moona.

²“Lako'mo i kampung anu moona otokai aijo',” pinotuun i Yesus hi aha. “Otoaje miu na sa'angu' na keledai sego-segot tiba anaknyo. Bukai ohu-ohua' ka' boa mae.

³De daagi' ko mian mompokilawa apa-apaa, poto'iakon hi mian atina', ‘Tumpu mompalaluimo’, saba' mian aijo' sampaje mompobee' keledai aijo' oboa mae.”

⁴Han aijo' sumo aitu da jadi apaa na anu tinaeakonmo nu nabi sumo uuka,

⁵ “Taeakon hi Sion, Tomundo'um tinokamo hi komiu. Ia madi' kotige-tige ka' sinumake' i sa'angu' na keledai, sa'angu' anak nu keledai anu daagi' ise'.”

⁶Lapas aijo' ua'aha na anu saja' mombatuki Ia ka' nombaumo sumo anu pinotuunakon i Yesus hi aha.

⁷Aha nomboa keledai aijo' tiba anaknyo. Lantas tonga' nu keledai haha aijo' ilatasan nu aha tiba juba' nu aha. Lapas aijo', i Yesus sinumake'mo.

⁸Da'isan na mian kiijo' mae nontalabakon to juba-juba' nu aha i jalan, ka' to mia-mian sangga'at nonsolui to panga-panga' ise' nu kau', ka' pinolatas i totonga' nu jalan.

⁹ Mian da'isan anu ilumajang i moona ka' anu i mihi hi Yesus molo-moloboo', “Tumuu'mo na Anak i Daud! Obalakatiakon na Ia anu tinoka tiba sanggo nu Tumpu! Puji' na Tumpu Anu Matangkas na Kuasanyo!”

¹⁰Lantas salatan i Yesus ninsoopmo i Yerusalem, songko-songko na kota aijo' kinalangkabutmo. “Aiya, ihe?” to mia-mian i kota aijo' nompaha poki-pokilawamo.

¹¹“Ia Nabi Yesus, lengkat mae i Nazaret i Galilea,” tinaaman nu mian da'isan anu nonsampo jalan i Yesus.

¹²Lapas aijo' i Yesus ninsoop nokiijo' i Laigan nu Tumpu ka' nolaa' iwi-iwi' na mian anu mobalu-baluk i kiijo'. Ia nombalikakon to meja-meja' anu pontolosian doi, ka' to bangku-bangku nu anu mompobaluk tomonsi' malapati'.

¹³ Lantas Ia notataemo hi to mia-mian aijo', “I uno nu Kitab nu Tumpu tinulis, Tumpu notatae, ‘Laigan-Ku osanggohi laigan tampat balado'a.’ Panyo komiu mompotimbalimo petaa nu tololang!”

¹⁴To mia-mian anu mapisok ka' anu lupe tinoka hi Yesus i Laigan nu Tumpu, ka' Ia nompa'alin aha.

¹⁵Panyo Kapala nu to Ima-imam ka' to gulu-gulu' agama notambuha'mo nontoa anu okabangangi, anu binau i Yesus. Ka' aha notambuha' suele nohongo to ana-anak binalame-lame'mo i Laigan nu Tumpu, “Tumuu'mo na Anak i Daud!”

¹⁶ Aha notatae hi Yesus, “Beleyum nohongo apaa na anu tinaloakon nu aha?” “Ii' Aku nohongo,” tinaaman i Yesus. “Ma'isa toho' komiu nombasa' ayat Kitab nu Tumpu aiya: ‘To ana-anak ka' bungamea' Ingajannumo montaeakon pompuji' anu talakana'’?”

¹⁷Lapas aijo', i Yesus nompala'i aha, lantas nambamo i kota Betania ka' i hoyot sinampahu i kiijo' mae.

¹⁸Dodododopnyo daagi' subu-subu aha nambamo mokiijo'mo minsusule' i kota, i Yesus no'ohopmo.

¹⁹Ia nontoa sangkau na kau' ara i sambiha' nu jalan. Ia namba i pu'unnyo, nu kau' aijo', panyo madi' nohumpak sa'angu' pe'e na bua'nyo, boli mompiakon hohonnyo. Lantas i Yesus notatae i kau' aijo', “Oko madi'mo daagi' mimbua'!” Lau-laus kau' ara aijo' nagayou.

²⁰Salatan anu saja' mombatuki Yesus nontoa kajadian aijo', aha binangangmo hondo. “Mosia na kau' ara aijo' timbali lau-laus nanggas sampu-sampu'un?” pinokilawa nu aha.

²¹ “Totu'u” tinaaman i Yesus, “De komiu palesaya ka' madi' bata-bata, komiu timbali mombau apaa na anu Binaungkumo i kau' ara aiya. Ka' misa' ola aijo', aitu pe'e komiu timbali motatae i bungkutnyo aiya, ‘Talahangkat ka' tongalin mokaiyong i uno nu ambai’; saba' han aijo' tionyo timbali.

²²Mau mule' apaa na anu opoita miu i uno nu do'aum, tionyo o humpak miu, asan komiu palesaya.”

²³Lapas aijo', i Yesus ninsusule' i Laigan nu Tumpu, lantas ninsoop ka' nongajan i kiijo'. Tempo'nyo Ia hau-haunyo mongajan, Kapala nu to Ima-imam ka' to pola-polaya' nu Yahudi tinokamo hi Ia ka' nompokilawa, “Apaa na alasan nu Beleyum mombau iwi-iwi' aiya? Ihe na nombee'i hak aiya hi Beleyum?”

²⁴I Yesus nontaami, “Aku suele kahanda' mompokilawa hi komiu. Ka' de komiu montaami, Aku montaeakonje hi komiu tiba hak ihe na Aku mombau hahan aiya.

²⁵I Yohanes mompalamandikan tiba hak ihe? Tumpu kabai mian?” Lantas Kapala nu to Ima-imam ka' to pola-polaya' nu Yahudi aijo' nontampu'unimo nombisalakon kiijo' hi aha, “De kita montaeakon, ‘Tiba hak nu Tumpu,’ Ia motatae, ‘Desumo aitu, kadaka' komiu madi' palesaya hi ia?’

²⁶Panyo de o taeakonto, ‘Tiba hak nu mian,’ kita mabuhuk hi mian da'isan, kalana aha iwi-iwi' monsangka i Yohanes samian na nabi.”

²⁷Jadi aha nontaami, “Kami madi' monsumbu'.” Lantas i Yesus notatae hi aha, “Desumo aitu, Aku suele madi' montaeakon hi komiu tiba hak ihe na Aku nombau iwi-iwi' aiya.”

²⁸“Uuka, mosia na pikilannum mongkona han aiya?” lau-laus i Yesus notatae. “Daagi' ko samian na tuuma anu ko anaknyo ua'aha na mo'ane. Mian aijo' namba hi anaknyo anu tumpe ka' notatae, ‘Anak, lako'mo mamba pokalaja i ale' nu anggur sinaa uuka.’

²⁹‘Aku madi' mongka'oho',’ tinaaman nu anak aijo'. Panyo madi' pinin nongabali'mo na pikilannyo ka' namba i ale' nu anggur aijo'.

³⁰Lapas aitu tuumanyo namba hi anaknyo anu ko'ohua'nyo, ka' nontaeakon makisut anu susumo uuka. ‘Ma'ima'mo kita Tuuma,’ tinaaman nu anak ko'ohua'nyo aijo'. Panyo ia madi' namba.

³¹Jadi, ua'aha na anak aijo', ihe na anu nombau pongka'oho' nu tuumanyo?” “Anu tumpe,” tinaaman nu Kapala nu to Ima-imam ka' to pola-polaya' nu Yahudi aijo'. Lantas i Yesus notatae hi aha, “Palesayamo: Anu saja' montage hasin, ka' to bou-boune anu masala' na tongkoimoona timbali mian anu palesayamo hi Tumpu ka' de mule' komiu.

³² Kalana i Yohanes anu Mompalamandikan tinoka, ka' nompotiju' hi komiu mosia na tumuu' anu nu kahanda'i nu Tumpu, panyo komiu madi' mongka'oho' palesaya i pangajalannyo; panyo anu saja' montage hasin ka' to bou-boune masala' palesaya hi ia. Panyo mau mule' komiu nontoamo iwi-iwi' aijo', komiu madi' ahi' mombali'i pikilan miu ka' madi' palesaya hi Tumpu.”

³³ “Hongo na kantuang anu sa'angu' aiya mule'”, koonyo i Yesus. “Samian na tumpu nu tano' nonsu'ani sa'angu' na ale' nu anggur. Ia nompagan titikub, ka' nongkeke bolo' bau pompo' una'an tampat pompeeti anggur, ka' mule' nompotinjo pontamongian. Lapas aijo', ia nontamboakon ale' nu anggur aijo' hi aha anu mokalaja, lantas namba i lipu' sangga'at.

³⁴Salatan tinokamo na tempo'nyo nu pontipuan bua'nyo nu anggur, tumpu nu tano' aijo' nonsai to posa-posaihonnyo mamba hi anu mongkalaja ale' aijo', da montalimakon baginyo.

³⁵Panyo anu mongkalaja ale' aijo' nohakop to posa-posaihon nu tumpu nu tano' aijo': Samian binobotan, sangga'at pinatean, ka' sangga'at mule' pinahambunu'akon nu batu.

³⁶Tumpu nu tano' aijo' nonsai mule' to posa-posaihon sangga'at, lebe da'isan molingkudui anu momona. Panyo aha suele binau sumo anu momona.

³⁷Imihinyo tumpu nu tano' aijo' nonsai namba hi aha, me posi anaknyo. ‘Tantu anakku na o adati,’ ia binapikin.

³⁸Panyo salatan anu mokalaja ale' aijo' nontoa anak nu tumpu nu tano' aijo', aha notatae samian ka' samian, ‘Toa, aiyamo na ia anu montoongi pusaka'nyo. Imbo' da o patei na ia, da kita na mohumpak pusaka'nyo!’

³⁹Saba' anak aijo' i hakop ka' ingalin i sambiha'nyo ka' pinatean.”

⁴⁰I Yesus nompokilawa, “Jadi, de tumpu nu ale' nu anggur aijo' minsusule'mo mae, apaa na anu tionyo nu bau hi anu mokalaja aijo'?”

⁴¹Aha nontaami, “Tantu ia mompatei to mia-mian ma'idek aijo', lantas montamboakon ale' nu anggur aijo' hi mian sangga'at anu mongka'oho' mombee'i sangga'at na hasin nu tano' aijo' hi ia de tokamo na tempo'nyo.”

⁴² Saba' i Yesus notatae hi aha, “Ma'isa toho' komiu nombasa' anu tinulis i uno nu Kitab nu Tumpu? ‘Batu anu madi' opake nu tukang bangunan tinimbalimo batu anu talalo o palalui. Sumo aijo' na palabuatan nu Tumpu; palias na ko ima'nyo!’ ”

⁴³“Jadi, o inau'mo,” koo-Nyo i Yesus, “Iwi-iwi' na hak salaku mian anu palesayamo hi Tumpu, o alamo atina' hi komiu ka' obee' hi sa'angu' na bansa anu montuluti to pale-palentah nu Tumpu. [

⁴⁴Mian anu manabu' i batu aijo', tionyo hansun; ka' mian anu nu tuda' nu batu aijo' nu diodos tinimbali abu'.]”

⁴⁵Salatan Kapala nu to Ima-imam ka' to mia-mian Farisi nohongo kantuangan i Yesus aijo', sinumbu'mo nu aha na i Yesus taalu' monsisik aha.

⁴⁶Jadi aha binala usahamo mohakop Ia. Panyo aha mabuhuk hi mian da'isan aijo', kalana mian da'isan aijo' monsangka i Yesus samian na nabi.