Read Saluan MATIUS 22 Bible Online

MATIUS 22 - Saluan bible

MATIUS 22

¹I Yesus notatae mule' hi mian da'isan mompake kantuang,

²tukoo-Nyo, “De Tumpu mompalentah, ka'ada'annyo sumomo kantuang aiya: Samian na tomundo nombau bau-bauon po'osoan nu anak mo'anenyo.

³Tomundo aijo' nonsai to poka-pokauhon mamba molabot to mia-mian anu i laga da toka i bau-bauon aijo'. Panyo aha anu i laga aijo' madi' mongka'oho' toka.

⁴Lapas aijo', tomundo aijo' nonsai mule' to poka-pokauhonnyo sangga'at. Pinoto'inyo hi aha: ‘Opoto'iakon hi aha anu i laga aijo': Kaanon nu bau-bauon sinadiamo. Sapi', ka' ana-anak nu sapi'ku anu talalo ma'ima' kinolotmo. Iwi-iwi' sinadiamo. Imbo'mo da mokiijo' i bau-bauon po'osoan!’

⁵Panyo aha anu i laga aijo' madi' mompajuli. Aha namba i posi pakalaja'annyo toto samian — samian namba i ale'nyo, anu sangga'at namba i usahanyo;

⁶ka' anu sangga'at mule' nohakop to posa-posaihon nu tomundo aijo', lantas nomboboti ka' nompatei aha.

⁷Salatan tomundo aijo' nohongo han aijo', ia pinusa hondo. Ia nonsai suludadunyo da mompatei anu lewa' mompatei aijo' ka' nompapui kota nu aha.

⁸Lapas aijo' ia nolaga to poka-pokauhonnyo, lantas notatae, ‘Bau-bauon po'osoan sinadiamo, panyo aha anu i laga madi' pantas.

⁹Lako'mo uuka mokiijo' i jala-jalan anu ewa, ka' laga mae da'i-da'isan na mian mamba i bau-bauon po'osoan aiya.’

¹⁰Saba' to posa-posaihon aijo' nambamo. Aha nokiijo' i jala-jalan anu ewa, lantas nolimu' iwi-iwi' na mian anu kinabot nu aha, anu ma'ima' mau anu ma'idek. Sahingga nobuke' na laigan nu bau-bauon po'osoan aijo' tiba to mia-mian anu i laga.

¹¹Lantas tomundo aijo' ninsoop ka' lewa' montoa to mia-mian anu i laga. Ia nontoa ko samian i bau-bauon aijo' anu madi' nompake pakean nu bau-bauon.

¹²Lantas ia nompokilawa hi mian aijo', ‘Sangalu, mosia na beleyum timbali minsoop i aiya madi' nompake pakean nu bau-bauon?’ Mian aijo' madi' noko ala nontaloakon apa-apaa.

¹³ Lantas tomundo aijo' notatae hi to poka-pokauhonnyo, ‘Segoti na tengke ka' lima nu mian aiya, ka' alin na ia i sambiha'nyo i tampat anu pikat. I kiijo' daagi' ko anu tumando' ka' sansala.’ ”

¹⁴Lantas i Yesus nompomingkot kantuang aijo' sumo aiya, “Da'isan na anu o laga, panyo sangkiding na anu o pile'i.”

¹⁵Lapas aijo', to mia-mian nu Farisi namba binasale' hingga-hinggat mongkona mosia na aha mompoki-pokilawa i Yesus da o humpak na kasala'annyo.

¹⁶Saba' aha nonsai anu saja' mombatuki aha mamba hi Yesus tiba to pia-piangkuka na mian anu monsangaja'i Herodes. To mia-mian aijo' notatae hi Yesus, “Tuumangku Gulu', osumbu' mami na kita Tuuma madi' mongakali. Kita Tuuma mongajan totu-totu'u mongkona kahanda' nu Tumpu hi mian, madi' mompajuli pikilan mau pe'e pa' ihe, sabab kita Tuuma madi' mompile'i mian.

¹⁷Kalana aijo', soba kita Tuuma taeakon hi kami: De mombatuki atulan nu agamanto, timbali na mombayan hasin hi Tomundo kabai madi'?”

¹⁸I Yesus monsumbu' tanga'an nu aha anu ma'idek aijo', jadi Ia notatae, “He to mia-mian anu geguan! Kadaka' komiu molio-lio kasala'an-Ku?

¹⁹Soba potoa mae hi belengku na takean nu doi anu opake miu bau pombayan hasin!” Lantas aha nombee' hi Ia santake na doi salaka.

²⁰I Yesus nompokilawa hi aha, “Gambalan ka' sanggo ihe na aiya?”

²¹“Tomundo,” tinaaman nu aha. Saba' i Yesus notatae hi aha, “Desumo aitu, bee'mo hi Tomundo apaa na anu i Tomundo, ka' hi Tumpu apaa na anu nu Tumpu Allah.”

²²Salatan aha nohongomo katalangan aijo', aha binangangmo. Sahingga aha nambamo nompala'i i Yesus.

²³ I sinaa aitu mule' to pia-piangkuka na mian nu Saduki tinokamo hi Yesus. Aha mian anu mongakui, saba' mian mate madi' mo mompo'ule' tumuu'.

²⁴ “Kita Tuumangku Gulu',” koonyo nu aha “I Musa nongajanakon sumo uuka: De samian na mo'ane mate, ka' ia madi' ko anak, utusnyo tionyo mo'osoa tiba balunyo da mombee'i lee' hi mian anu natemo aijo'.

²⁵Daagi' ko aha popitu' na moto utus anu jinojoong i aiya. Anu tumpe no'osoa, lantas i nate madi' kino anak. Saba' balunyo anu pinala'iannyo binaumo osoa nu utusnyo.

²⁶Utusnyo aijo' madi' pinin i nate mule' madi' kino anak. Han anu pokakana jinadi mule' sumo aitu tiba utusnyo anu ko totolu'nyo, ka' sumo aitumo na jinadi toka-toka hi anu ko popitu'nyo.

²⁷Kahimpusannyo boune aijo' i nate suele.

²⁸Jadi, tempo'nyo mian mate po'ule'mo opotumuu', bengkele' ihe na boune aijo'? Kalana aha popi-popitu' no'osoamo tiba ia.”

²⁹I Yesus nontaami, “Komiu ilipunmo hondo, kalana komiu madi' mangalati' i Kitab nu Tumpu, mau pe'e kuasa nu Tumpu Allah.

³⁰Kalana de mian mate po'ule'mo tumuu', aha madi'mo daagi' mo'osoa panyo aha tumuu'mo susumo malaikat i suluga'.

³¹Ma'isa toho' komiu nombasa' apaa na anu tinaeakonmo nu Tumpu Allah mongkona mian mate po'ule' opotumuu'? Tumpu notatae,

³² ‘Akumo na Tumpu i Abraham, Tumpu i Ishak, ka' Tumpu i Yakub.’ Tumpu aijo' misa' Tumpu nu mian mate. Ia Tumpu nu mian tumuu'!”

³³Salatan mian da'isan aijo' nohongo katalangan i Yesus, aha binangang hondo i pangajalan-Nyo.

³⁴Tempo'nyo to mia-mian nu Farisi nohongo saba' i Yesus nombaumo to mia-mian nu Saduki madi'mo daagi' moko ala motatae apa-apaa, aha nosa'angu'mo.

³⁵ Samian anu kiijo' hi aha, aijo'mo samian na gulu' agama saja' mompokilawa i Yesus, mompagala molio da ohumpak na kasala'an.

³⁶“Tuumangku Gulu',” na koonyo, “Palentah iya na anu talalo o palahatikan i uno nu atulan nu agama?”

³⁷ Tinaaman i Yesus, “Kalibosi na Tumpuum nu kinyonyoaum totu-totu'u, ka' iwi-iwi' na pikilannum.

³⁸Aijo'mo na palentah anu talalo o palahatikan ka' anu talalo opopohimona!

³⁹ Palentah anu ko'ohua'nyo pokakanamo tiba anu i moona aijo'. Kalibosi na bubuu' komiu, sumomo beleyum mongkalibosi posi butongum.

⁴⁰Iwi-iwi' na atulan nu agama anu binee' i Musa, ka' ajalan nu to nabi-nabi, mimpu'u i palentah anu ohu-ohua' aijo'.”

⁴¹Hau-haunyo to mia-mian nu Farisi daagi' binala gombu i kiijo', i Yesus nompokilawa hi aha,

⁴²“Mosia na pikilan miu mongkona Tomundo anu Momposalamat? Lee' ihe na Ia?” “Lee' i Daud,” tinaaman nu aha.

⁴³“Desumo aitu,” koonyo i Yesus, “apaa nasababnyo Roh nu Tumpu nombee'i pikilan hi Daud da nonsanggo Tomundo anu Momposalamat ‘Tumpu’? Sabab i Daud notatae,

⁴⁴ ‘Tumpu notatae hi Tumpungku: Suhangmo i sasu koanan-Ku, sampe Aku mombau sampo bali' miu matundu' hi komiu.’

⁴⁵Jadi, de i Daud monsanggo Tomundo anu Momposalamat aijo' ‘Tumpu’, mosia na timbali Ia lee' mae i Daud?”

⁴⁶Madi' ko samian pe'e na noko taami i Yesus. Ka' lengkat pe'e i sinaa aitu, madi'mo daagi' ko anu baani mompokilawa apa-apaa hi Ia.