Read Saluan MATIUS 23 Bible Online

MATIUS 23 - Saluan bible

MATIUS 23

¹Lantas i Yesus notatae hi mian da'isan ka' hi anu saja' mombatuki Ia,

²“To gulu-gulu' agama ka' to mia-mian Farisi nohumpak kuasa da montalangkan atulan i Musa.

³Kalana aijo' o hongo ka' o batuki iwi-iwi' na anu pinalentahkon nu aha. Panyo boli mombau apaa na anu nu bau nu aha, kalana aha madi' monjalanakon apaa na anu ingajan nu aha.

⁴Aha montuntut hahan anu mahan, ka' mombee'i to atu-atulan anu maboat, panyo sangkiding pe'e aha madi' montulungi mian anu monjalanakon.

⁵ Iwi-iwi' anu nu bau nu aha ola da nu toa nu mian. Aha sangaja' mompake kahohon anu opake balado'a opobolaa ka' opo uli-ulit ka' mompomantan na jambu-jambu nu juba' nu aha!

⁶Aha mongka'ima'i tampat anu ma'ima' i bau-bauon ka' kulusi anu ma'ima' hondo i to lai-laigan pogalejaan.

⁷Aha sanang na o adati nu mian i pasan, da o laga ‘Tuumangku Gulu'’.

⁸Panyo komiu, boli mongka'oho' o laga ‘Tuumangku Gulu'’, kalana Gulu'um ola sa'angu', ka' komiu iwi-iwi' moto utus.

⁹Ka' boli komiu molaga, mau pe'e ola samian i dunia aiya, ‘Tuuma’, kalana Tuumaum ola samian, aijo'mo Tuuma anu Kiita' i Suluga'.

¹⁰Ka' boli komiu mongka'oho' olaga anu ‘Mompalentah’, kalana anu mompalentah komiu ola samian, aijo'mo Tomundo anu Momposalamat anu jinanji'mo nu Tumpu.

¹¹ Mian anu talalo daka' i totonga' miu, tionyo timbali bau pokauhonum.

¹² Mian anu mohangkat butongnyo, o tauhakon, ka' mian anu montauhakon butongnyo o hangkatakon.”

¹³“Silakamo na komiu to gulu-gulu' agama ka' to mia-mian nu Farisi! Komiu saja' mombau pula-pula. Komiu ola monsaduakon da mian madi' totu-totu'u timbali mian anu palesayamo hi Tumpu Allah. Posi komiu pe'e madi' mongka'oho' mian anu palesayamo hi Tumpu, ka' mian sangga'at anu oka'oho', miu da boli palesaya. [

¹⁴Silakamo na komiu to gulu-gulu' agama ka' to mia-mian nu Farisi: Komiu ola ahi' mombau pula-pula. Komiu mongakali to balu-balu ka' mongagoi laigannyo ka' da bau pongkukubi ka'idekan aijo' komiu mompomantan balado'a. Aijo' nasababnyo komiu o hukum maboat!]

¹⁵Silakamo na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! Komiu mamba majo-majo'on motaap i ambai, ka' lumajang monsongkohi katano'an ola ahi' mombau samian da minsoop i agamaum. Ka' salatan mian aijo' ninsoopmo i agamaum, komiu monsaduakonmo ia salon nu nalaka. Lipat pinduan lebe ma'idek molingkudui komiu!

¹⁶Silakamo na komiu to pola-polaya' anu mapisok! Komiu mongajanakon sumo aiya, ‘De mian basumpa' monsanggo Laigan nu Tumpu, sumpa' nu mian aijo' madi' totu-totu'u! Panyo de ia basumpa' tiba sanggo nu mosoni' i uno nu Laigan nu Tumpu, sumpa' nu mian aijo' totu'u.’

¹⁷Komiu to mia-mian ponga' anu mapisok! Iya na anu talalo palalu: Mosoni'nyo kabai Laigan nu Tumpu anu mompotimbali mosoni' aijo' susi'?

¹⁸Komiu mule' mongajanakon aiya, ‘De samian basumpa' tiba sanggo nu ponsombahkonan, sumpa' nu mian aijo' madi' totu'u; panyo de ia basumpa' tiba sanggo nu anu sinombahkon i tampat pinonsombahkonan aijo', sumpa' nu mian aijo' totu'u.’

¹⁹Komiu talalo mapisok! Iya na talalo palalu? Anu sinombahkonnyo kabai tampat ponsombahkonan anu mompotimbali palasombahan aijo' susi'?

²⁰Kalana aijo', de samian na basumpa' tiba sanggo nu tampat ponsombahkonan, ka' tiba sanggo nu iwi-iwi' anu sinombahkon i tampat aita'.

²¹Ka' de samian basumpa' tiba sanggo nu Laigan nu Tumpu, aijo' alati'nyo ia basumpa' tiba sanggo nu Laigan nu Tumpu aijo', ka' tiba sanggo nu Tumpu anu jojoong i kiijo'.

²² Ka' de samian basumpa' tiba sanggo nu suluga', aijo' alati'nyo basumpa' tiba sanggo nu kajojoongan nu Tumpu, ka' tiba sanggo nu Tumpu anu sumuhang i kajojoongan aijo'.

²³ Silaka na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! To lampa-lampa sumo solasi, adas manis, ka' suele jintan, komiu mombee'i, de sampulu' na bahagian sambahagian hi Tumpu. Padahan hahan anu palalu hondo i uno nu to atu-atulan nu agama, sumo umpamanyo: Ka'adilan, mompahakali-kalibosi, ka' mohongo-hongo, madi' o palahatikan miu. Padahan aijo'mo na tionyo o bau miu, tiba madi' timbali mompojohok anu toto sangga'at.

²⁴Komiu to pola-polaya' anu mapisok! Lalo i uno nu anu o inum miu na o tilis miu, padahan unta na o lonyom miu!

²⁵Silaka na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! To mangko-mangko' ka' to lea-lean miu, o baso'i miu bele-belesi' na sambiha'nyo, padahan i unonyo koton hondo tiba to hahan anu i humpak miu ola pinakisa ka' pinalanguesan.

²⁶Farisi mapisok! Baso'i pe'e bele-belesi' na anu i unonyo i to mangko-mangko' ka' to lea-lean miu da i sambiha'nyo timbali belesi' suele!

²⁷ Silakamo na komiu to gulu-gulu' agama ka' to mia-mian Farisi! Komiu ola ahi' mombau pula-pula! Komiu sumomo to kubu-kubun anu o set mopute', i sambiha'nyo o toa ma'ima', padahan i unonyo mobuke' nu buku ka' iwi-iwi' anu to busi-busik.

²⁸Sumo aitumo na komiu. I sambiha'nyo komiu o toa ma'ima' hi mian; panyo i unonyo komiu mobuke' nu kabaleko'an ka' mombahakon palentah.”

²⁹“Silakamo na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! Komiu mombau tampat pongkubulan anu to ma'i-ma'ima' bau anu nu to nabi-nabi, ka' mombunga-bungai kubulan nu to mia-mian anu ma'ima' na kantumuu'annyo.

³⁰Ka' komiu notatae, ‘De kami tinumuu' tempo'nyo daagi' ko mompolee' mami naipuan mae, kami madi' nombatuki aha mompatei to nabi-nabi.’

³¹Jadi, posi komiu mangaku saba' komiumo na lee' nu to mia-mian anu nompatei to nabi-nabi!

³²De sumo aitu janjulakonmo ka' baumo na to dosa-dosa' anu tinampu'unanmo nu mompolee' miu aijo'!

³³Komiu ma'idek ka' lee' nu mian ma'idek! Mosia na komiu timbali momposalamat butong i hukuman nu nalaka?

³⁴Hongo ima-ima': Aku monsaije hi komiu to nabi-nabi, to mia-mian pande, ka' to gulu-gulu'; sambahagian lengkat hi aha o pateije miu, ka' sambahagian anu sangga'at o salibje miu. Daagi' ko anu o sakisaje miu i uno nu laigan pogalejaan, ka' komiu mahantumput lengkat i sa'angu' na kota mokiijo' i kota sangga'at.

³⁵Kalana aijo' komiu o hukum, kalana nompateimo mian iwi-iwi' anu madi' ko sala'nyo — lengkat pe'e nompatei i Habel anu madi' ko sala'nyo, tinoka i pinompateian i Zakharia anak i Berikia, anu pinatean miu i olot nu Laigan nu Tumpu, ka' i tampat ponsombahkonan.

³⁶Palesayamo: Iwi-iwi' aijo' nu tanggungje nu to mia-mian tempo' uuka!”

³⁷“Yerusalem, Yerusalem! To nabi-nabi pinateanmo. To posa-posaihon nu Tumpu pinahambunu'akonmo nu batu sampe i nate. Piangkukamo na Aku mongka'oho' molimu' iwi-iwi' mian nu kampungum, sumo tina nu manuk mongokobi sioknyo i aluk nu polipiknyo, panyo komiu madi' mongka'oho'!

³⁸Kalana aijo', Tumpu madi' daagi' monjagai komiu.

³⁹Osumbu'mo! O mulai tempo' uuka aiya, beleyum madi'mo daagi' montoa Aku sampe beleyum motatae, ‘Obalakatiakon na Ia anu tinokamo mae tiba sanggo nu Tumpu.’ ”