Read Saluan MATIUS 24 Bible Online

MATIUS 24 - Saluan bible

MATIUS 24

¹Salatan i Yesus nompala'imo Laigan nu Tumpu, anu saja' mombatuki Ia tinoka hi Ia ka' nontiju' Laigan nu Tumpu aijo'.

²I Yesus notatae hi aha, “Tinoamo miu iwi-iwi' aijo'? Da osumbu'mo, madi' ko sa'angu' pe'e na batu nu laigan aijo' na tasusun i tampatnyo, iwi-iwi' o hobo'akon.”

³Lapas aitu, i Yesus namba i Bungkutnyo nu Zaitun, ka' hau-haunyo Ia suha-suhang, anu saja' mombatuki Ia tinoka ka' binisala tiba Ia mongkona posi aha. “Poto'i mae hi kami hipian na iwi-iwi' aijo' timbali,” koonyo nu aha hi Ia, “Apaa na bau pongoosian salaku tanda katokaanmo nu kita Tuuma, ka' sinaa imihinyomae?”

⁴I Yesus nontaami, “Jaga mae, boli sampe komiu o akali.

⁵Kalana da'isan na mian anu toka mae mongala sanggong-Ku ka' motatae, ‘Akumo na Tomundo anu Momposalamat!’ Da'isan na mian nu akali nu aha.

⁶Komiu mohongoje lintup nu pahampatean ka' lele nu pahampatean, panyo boli mabuhuk. Kalana hahan aijo' tionyo timbali, panyo aijo' misa' alati'nyo tempo'mo nu kakiamatan.

⁷Bansa sa'angu' mahampate mongewa bansa sangga'at, ka' negara sa'angu' montumbuhi negara sa'angga'at. Iyayamae timbalimo na kapo'ohopan ka' luulu'.

⁸Iwi-iwi' aijo' sala'je pontampu'uniannyo, sumo sakit anu ingoa'an nu samian na boune tempo'nyo kahanda'mo mohampeakon.

⁹ Lapas aitu, komiu o hakop ka' o bee' da o sakisa ka' o patei. Songko-songko na dunia mongka'idekimo komiu, kalana komiu anu mombatuki Aku.

¹⁰Tempo'nyo aitu da'isan na mian madi'mo palesaya, mombiabiangakonmo agama, palangues, ka' mompaha ka'ika'idekimo samian ka' sangga'at.

¹¹Da'isan na to nabi-nabi anu madi' totu'u toka ka' mongakali da'isan na mian.

¹²Ka'idekan mompaka hebatmo na molele, ahennyo da'isan na mian madi'mo daagi' kokalibosan.

¹³ Panyo mian anu balatahan toka i mihinyo, timbali o posalamat.

¹⁴Ka' Lele Ma'ima' mongkona mosia na Tumpu mompalentah o polele i songko-songko na dunia, da iwi-iwi' na mian mohongo. Lapas aitu, tokaje na kakiamatan.”

¹⁵ “Komiu montoaje ‘Ka'idekan anu monsilakai,’ sumo anu tinaloakonmo i Nabi Daniel, tinuminjo i tampat anu Susi'. (Tulisan toka hi topo anu mombasa': Palahatikan apaa na alati'nyo!)

¹⁶Tempo'nyo aitu, mian anu daagi' kiijo' i Yudea tionyo malai i bungkutnyo.

¹⁷ Mian anu kiita' i loteng nu laigan, bolimo mintau' mongala apa-apaa i uno nu laigan.

¹⁸Mian anu i ale', bolimo minsusule' da mongala juba'nyo.

¹⁹Palias na ko ide'nyo na sinaa aijo' kona hi boune anu poboa, ka' tina anu daagi' momposusu anaknyo!

²⁰Balado'a da boli sampe komiu malai i tempo' ehua kabai i tempo' sinaa nu Sabat!

²¹ Tempo' nu sinaa anu ma'idek hondo aijo' daagi' ko kasusa'an anu daka' sumo anu ma'isa toho' tinimbali lengkat pe'e i tampu'unan nu dunia toka tempo' aiya, ka' madi'mo mompo'ule' timbali.

²²De Tumpu madi' mompokodo' tempo'nyo; saba' madi' ko samian pe'e anu salamat. Panyo kalana mian, anu palesayamo hi Ia Tumpu, nompokodo'mo tempo'nyo aijo'.

²³Tempo'nyo aitu de daagi' ko mian motatae hi komiu, ‘Toa, Tomundo anu Momposalamat aijo' daagi' i aiya!’ kabai ‘Ia daagi' i aijo'!’ — boli o palesaya na mian aijo'.

²⁴Kalana tokaje mae na anu momposalamat padahan anu madi' totu'u, ka' to nabi-nabi anu madi' totu'u. Aha mombau palabuatan-palabuatan anu o palias, ka' hahan anu okabangangi bau pongakali, de timbali, mau mian anu palesayamo hi Tumpu suele.

²⁵Jadi, o inau'! Aku mompoto'imo hi komiu i moonanyo ma'isa pe'e han aijo' jadi saidi' mae.

²⁶ De mian motatae hi komiu, ‘Toa, Ia daagi' aijo' i padang bolaa!’ — boli komiu mokiijo'. Kabai motatae, ‘Toa, Ia matisuluk i uno nu kaman aiya!’ — boli palesaya.

²⁷Sabab katokaan nu Anak nu Mian sumo sahaya nu kilat majingka lengkat i Kabete'an, ka' majingka toka i Kinsoban.

²⁸ Iya na daagi' ko bangke'nyo, i kiijo' daagi' ko tomonsi' montoluk bangke'nyo.”

²⁹ “Madi' pin salatan kasusa'an aijo' lapasmo, batu nu sinaa pinikatmo, ka' bitu'on madi'mo ko sahayanyo. To manda-mandala' nanabu'mo lengkat mae i langit, ka' anu mongkuasai langa kalangkabutmo.

³⁰ Lapas aijo' tanda Anak nu Mian otoamo aita' i langit. Tempo'nyo aitu iwi-iwi' na bansa i dunia humaangmo. Aha montoamo Anak nu Mian toka aita' i bawo nu kundom tiba kuasanyo anu daka' hondo.

³¹Tolompet anu daka' pino'onyi'mo, ka' Anak nu Mian monsaimo to mala-malaikat-Nyo molimu' mian-Nyo anu palesayamo lengkat mae i pasu' alam opat nu dunia, lengkat mae i puus nu langit sa'angu', toka i puus nu langit sangga'at.”

³²“De pangajalan mongkona kau' ara. De to panga-panga'nyo to die-die' molunoumo ka' maluano'mo ka' montampu'unimo minsumpe, osumbu'mo miu saba' tempo' nu posinaa ohanimo.

³³Sumo aitumo de komiu montoa hahan apaa na anu jinadimo, aijo' osumbu'mo miu, saba' tempo'nyo ohanimo hondo.

³⁴Osumbu'mo! Hahan aijo' jadi ma'isa pe'e to mia-mian anu tumuu' tempo' uuka aiya nate iwi-iwi'.

³⁵Langit ka' tano' lanjap, panyo potataeng-Ku tataap sampe toka sidu-sidutu'.”

³⁶“Madi' ko anu monsumbu' hipian na sinaanyo ka' jamnyo, to mala-malaikat i suluga' madi' monsumbu', Anak pe'e nu Tumpu madi' monsumbu', ola Tuuma i suluga' na anu monsumbu'.

³⁷ De Anak nu Mian tokamo, lupanyo sumo tempo'nyo i Nuh naipuan mae.

³⁸I sinaa ma'isa pe'e kino iyaba' daka' aijo', to mia-mian mongkaan monginum, ka' mo'osoa. Sumo aitumo na saja' binau sampe tinokamo na sinaa i Nuh ninsoop i uno nu kapan.

³⁹ Tempo'nyo iyaba' aijo' noleetabi aha iwi-iwi', atina'je ka' aha nonsumbu' apaa na anu tinimbali. Sumo aitumo suele na lupanyo saidi' mae de Anak nu Mian tokamo.

⁴⁰Tempo' aitu ua'aha na mian hau-haunyo mokalaja i ale': Samian o boa, ka' samian mule' o pala'i.

⁴¹Ua'aha na boune hau-haunyo monggiling gandum: Samian o boa, ka' samian mule' o pala'i.

⁴²Jadi, obala'ingati, kalana komiu madi' monsumbu' hipian na Tumpu miu toka.

⁴³ O inau' na aiya! De tumpu nu laigan monsumbu' jam sangkuka pihi na anu montomang toka, ia madi' timbali hoyot, da anu montomang aijo' madi' minsoop i laigannyo.

⁴⁴Kalana aijo', komiu suele balasadia. Saba' Anak nu Mian toka tempo' nu anu madi' osangka-sangka miu.”

⁴⁵Koonyo mule' i Yesus, “Desumo aitu, posaihon anu mosia na anu mohongo-hongo ka' anu pande? Ia na anu o hangkat nu Tuannyo da timbali kapala nu to posa-posaihon sangga'at, da mombee'i aha mongkaan toka i tempo'nyo.

⁴⁶Palias na kosanangnyo nu posaihon aijo' de tuannyo minsusule'mo mae, ka' montokai mae ia hau-haunyo mombau kalaja'anyo.

⁴⁷Palesayamo, tuan aijo' mompalesayakon iwi-iwi' na halata'nyo hi posaihon aijo'.

⁴⁸Panyo de posaihon aijo' ma'idek, ia motatae i uno nu kinyonyoanyo,

⁴⁹‘Tuanku daagi' pin minsusule'je mae,’ lantas ia nontampu'unimo nondoke to posa-posaihon sangga'at, ka' mongkaan monginum tiba to mia-mian anu saja' malangu.

⁵⁰Lapas aitu tuannyo ninsusule'mo mae i sinaa ka' jam anu madi' sinangka-sangka.

⁵¹Saba' posaihon-posaihon aijo' pinahandokeakon totu-totu'u nu tuannyo ka' ingalin nokiijo' i tampat nu to mia-mian anu palangues. Aha humaang ka' mongoa'i sansala i kiijo' mae.”