Read Saluan MATIUS 25 Bible Online

MATIUS 25 - Saluan bible

MATIUS 25

¹ “De Anak nu Mian toka sumo Tumpu, lupanyo sumo i uno nu kantuang aiya: Sampulu' na langkoyang anu mombatuki boting, toto samian mongala pansona', lantas mamba molabot boting mo'ane.

²Aha olima' anu ponga', ka' anu olima' sangga'atannyo na pande.

³Aha olima' na langkoyang anu ponga' nomboa pansona', panyo madi' nontoukai lanya'.

⁴Aha olima' na langkoyang anu pande nomboa pansona' ka' nontoukai lanya'.

⁵Boting mo'ane aijo' madi' sampa' tinoka, jadi to lalangkoyang haha aijo' mulaimo natatundu' ka' tinohoyotmo.

⁶Tonga' pahu, ihongoje na lewo' anu noloboo', ‘Boting mo'ane tinokamo! Imbo' labot na ia!’

⁷Sampulu' na langkoyang aijo' nobula, ka' nontutungi pansona' nu aha.

⁸To lalangkoyang anu ponga' aijo' notatae hi anu pande, ‘Bee'i mae lanya' miu sangkiding hi kami, kalana pansona' mami mopoho'mo.’

⁹‘Madi' timbali!’ tinaaman nu to ana-anak langkoyang anu pande aijo', ‘kalana dumo kita iwi-iwi' madi' sukup na lanya'. Lako'mo pongoli i toko.’

¹⁰Lantas to lalangkoyang anu ponga' aijo' namba nongoli lanya'. Hau-haunyo aha namba, tinokamo na boting mo'ane. Olima' na langkoyang anu sinadiamo aijo' ninsoop hingga-hinggat tiba boting mo'ane i tampat nu bau-bauon, ka' tumban pinotumbanmo!

¹¹ Lapas aijo', to lalangkoyang anu sangga'at aijo' tinokamo. Aha notatae daka-daka', ‘Tuan, Tuan, tuhea'akon pe'e mae na tumban.’

¹²Panyo boting mo'ane aijo' nontaami, ‘Aku madi' monsumbu' komiu!’ ”

¹³Lantas i Yesus nompopupus kantuang-Nyo sumo uuka: “Kalana aijo' balajaga-jagamo, sabab komiu madi' monsumbu' sinaanyo kabai jamnyo.”

¹⁴ “De Anak nu Mian toka sumo Tumpu. Lupanyo suele sumo i uno nu kantuang aiya: Samian na mo'ane kahanda' mamba i tampat anu majo'on. Ia nolaga to posa-posaihonnyo, lantas ia nombagi-bagiakon halata'nyo hi aha.

¹⁵Hi toto samian na posaihon aijo' binee'annyo iya na anu opoko ala nu aha toto samian. Hi samian binee'annyo olima' na madala doi mosoni'. Hi sangga'atan binee'annyo ohua' na madala doi mosoni'. Ka' hi samian mule' binee'annyo samadala na doi mosoni'. Lantas ia namba.

¹⁶Posaihon anu nontalima olima' na madala doi mosoni' aijo' lia-lia' namba binadagang, lantas nohumpak ka'untungan olima' na madala doi mosoni' mule'.

¹⁷Sumo aitumo mule' na posaihon anu nontalima ohua' na madala na doi mosoni' aijo' nohumpak untung ohua' na madala mule'.

¹⁸Panyo posaihon anu nontalima samadala na doi mosoni' aijo', namba nongkeke bolo' i tano', lantas nomposuluk doi nu tuannyo i kiijo'.

¹⁹Pinin hondo ilapas aijo', tuan nu to posa-posaihon aijo' ninsusule'mo mae, ka' mulai binalekeng tiba aha.

²⁰Posaihon anu nontalima olima' na madala na doi mosoni' aijo' tinoka, ka' nombee' sampulu' na madala. ‘Kita Tuan,’ na koonyo, ‘Kita Tuan nombee' olima' na madala doi mosoni' hi belengku. Toamo, aku kino hasinnyo nohumpak ka'untungan olima' na madala suele.’

²¹‘Ma'ima'mo’, koonyo nu tuan aijo', ‘beleyum posaihon anu ma'ima' ka' mohongo-hongo. Kalana beleyum timbali o palesaya i hahan anu sangkiding, manjoo'je na kubee' hi beleyum. Pinsoop ka' batuki na aku, basana-sanang tiba aku!’

²²Lantas posaihon anu nontalima ohua' na madala doi mosoni' aijo' tinoka ka' notatae, ‘Kita Tuan, Tuan, nombee'mo ohua' na madala na doi mosoni' hi belengku. Toa kino hasinnyo nohumpak ka'untungan ohua' na madala suele.’

²³‘Ma'ima'mo’, koonyo nu tuan aijo', ‘beleyum posaihon anu ma'ima', ka' mohongo-hongo. Kalana beleyum timbali o palesaya i hahan anu sangkiding, manjoo'je na kubee' hi beleyum. Pinsoop ka' batuki na aku, basana-sanang tiba aku!’

²⁴Lapas aitu posaihon anu nontalima samadala na doi mosoni' aijo' tinokamo, ka' notatae, ‘Kita Tuan, kusumbu' kita Tuan mian anu masigo. Kita Tuan mompadak bua'nyo i tampat anu madi' sinu'anan nu kita Tuan, ka' mongala hasinnyo i tampat anu madi' sinu'anan bine' nu kita Tuan.

²⁵Aku mabuhuk, jadi mamba pinosuluku na doi nu kita Tuan i uno nu tano'. Aiyamo na doi nu kita Tuan.’

²⁶‘Beleyum posaihon anu ma'idek ka' moluluk!’ koonyo nu tuan aijo'. ‘Te misa' sinumbu'mo nu beleyum na aku mompadak bua'nyo i tampat anu madi' sinu'ananku, ka' mongala hasinnyo i tampat anu madi' sinau'anku bine'?

²⁷Desumo aitu, sahanyo ahi' beleyum nonguna' doingku aijo' i bank, da tempo'nyo aku minsusule'mo mae, po'ule' ku humpak na doingku aijo' tiba bunganyo.

²⁸Kalana aitu, ala na doi aijo' hi ia, ka' bee' hi anu ko doi mosoni' sampulu' na madala aijo'.

²⁹ Kalana mian anu daagi'mo po'ule' obee'i lebe manjoo', sahingga anunyo molabi. Panyo mian anu madi' ko apa-apaa, sangkiding anu daagi' hi ia, opaka ala.

³⁰ Ka' posaihon anu madi' ko gunanyo aijo', alin i uno nu pikat hondomi' i sambiha'nyo. I kiijo' ia humaang ka' mongoa'i sansala!’ ”

³¹ “De Anak Mian toka sumo Tomundo nu sampo jaalan nu malaikat-Nyo iwi-iwi', Ia sumuhang i kasuhangan-Nyo anu opopodaka'.

³²Iwi-iwi' na bansa olimu' i ahop-Nyo. Lantas Ia mongga'atakon aha timbali ohua' na tompuk, sumo polaya' binatang mongga'atakon domba ka' mee'.

³³To mia-mian anu mombau pongka'oho' nu Tumpu, olimu' i sasu koanan-Nyo, ka' anu sangga'at i sasu kowi-Nyo.

³⁴Lapas aijo', Tomundo aijo' notatae hi to mia-mian anu i sasu koanan-Nyo, ‘Imbo' na komiu anu binalakatanmo nu Tuumang-Ku. Pinsoopmo i uno nu Kalaja'an anu pinosadiakon hi komiu salatanmo pe'e dunia momona.

³⁵Kalana tempo'nyo Aku mo'ohop, komiu nombee'i Aku mongkaan, ka' tempo'nyo Aku negot, komiu nombee'i Aku monginum. Aku mian nu salipu'an, komiu montalima Aku i laigan miu.

³⁶Aku madi' ko baju', komiu nombee'i Aku baju'. Aku masakit, komiu nompakuli' Aku. Aku tinalungku', komiu nontulungi Aku.’

³⁷Lantas to mia-mian aijo' motatae, ‘Kita Tumpu, naipian na kami toho' nontoa Kita Tumpu no'ohop, lantas kami nombee'i Kita Tumpu mongkaan, kabai megot lantas kami mombee'i Kita Tumpu monginum?

³⁸Naipian na kami toho' nontoa Kita Tumpu sumo mian anu i salipu'an, lantas kami molabot Kita Tumpu i uno nu laigan mami? Naipian na Kita Tumpu madi' toho' nompusok baju', lantas kami nombee'imo Kita Tumpu baju'?

³⁹Naipian na kami toho' nontoa Kita Tumpu masakit kabai tinalungku'? Lantas kami nontulungi Kita Tumpu?’

⁴⁰Tomundo aijo' nontaami, ‘Da osumbu': tempo'nyo komiu mombau han aijo', mau pe'e hi sala'samian i to utu-utus-Ku anu talalo kanteles, alati'nyo komiu nombaumo hi beleng-Ku!’

⁴¹Lantas Tomundo aijo' notatae hi to mia-mian anu i sasu kowi-Nyo, ‘Lako'mo pokiijo', anu kinutukanmo! Pinsoopmo i uno nu apu anu madi' toho' mate, anu pinosadiakonmo i Setan ka' hi to mala-malaikatnyo!

⁴²Kalana tempo'nyo Aku mo'ohop; komiu madi' nombee'i Aku mongkaan; tempo'nyo Aku negot, komiu madi' mombee'i Aku monginum.

⁴³Aku samian, mian nu salipu'an, komiu madi' montalima Aku i i uno nu laigan miu. Aku madi' mibaju', komiu madi' mombee'i Aku baju'. Aku masakit ka' tinalung-Ku', komiu madi' mombee'i Aku pakuli'.’

⁴⁴Lantas aha notatae hi Ia, ‘Tumpu, naipian na kami nontoa Tumpu mo'ohop kabai megot, kabai sumo samian, mian nu salipu'an, kabai madi' ko baju', kabai masakit, kabai tinalungku', kami madi' nontulungi Kita Tumpu?’

⁴⁵Tomundo aijo' nontaami, ‘Da osumbu'mo: de komiu madi' ka'oho' montulungi, sala'samian anu talalo kanteles aiya, alati'nyo komiu madi' mongka'oho' montulungi Aku.’

⁴⁶ Saba' to mia-mian aijo' o hukummo nu hukuman anu sampe toka sidu-sidutu', panyo komiu to mia-mian anu mombau kahanda' nu Tumpu, mongoa'i kantumuu'an talakana' ka' sampe toka sidu-sidutu'.”