Read Saluan MATIUS 28 Bible Online

MATIUS 28 - Saluan bible

MATIUS 28

¹Salatan sinaa nu Sabat ilapasmo, i sinaa nu Duminggu subu-subu hondo, i Maria Makdalena ka' i Maria anu sangga'at aijo' nambamo nontoa kubulan aijo'.

²Monti-montiik kino luulu'mo anu daka' hondo. Samian na Malaikat nu Tumpu nintatau' lengkat mae i suluga' lantas nolingginakon batu pinongkulubi aijo', ka' sinumuhang i buannyo.

³Ohupnyo nu Malaikat aijo' sumo kilat ka' pakeannyo pute' hondo.

⁴Suludadu anu nonjagai kiijo' nabuhukmo hondo sampe aha i lakatnyo sumo mian anu natemo.

⁵Malaikat aijo' notatae hi to bou-boune aijo', “Boli mabuhuk! Kusumbu' komiu molio i Yesus anu sinalibmo aijo'.

⁶Ia madi'mo ko anu i aiya. Ia po'ule'mo tinumuu', sumo anu Tinaeakon-Nyomo u'utu mae. Imbo' ka' toa na tampat-Nyo pinompomale'an Ia.

⁷Palia-lia' uuka mamba, ka' opoto'iakon hi anu saja' mombatuki Ia, ‘Ia po'ule'mo tinumuu' ka' tempo' uuka Ia nambamo i moona nokiijo' i Galilea. I kiijo' mae komiu montoaje Ia!’ O inau', apaa na anu tinaloakonkumo hi komiu.”

⁸To bou-boune aijo' malia-lia' nompala'i kubulan aijo'. Kalana mongoa'i buhuk tiba lame' nogogalo'anmo, aha nopadeka' ka' nompoto'iakon han aijo' hi aha anu saja' mombatuki Yesus.

⁹Monti-montiik i Yesus tinokamo nonsingkaboti to bou-boune haha aijo' ka' notatae, “Tabea'!” Lantas aha tinoka nongohani Ia, lapas aitu nontanggogolimo tengke-Nyo ka' nonsombah Ia.

¹⁰“Boli mabuhuk,” koonyo i Yesus hi aha, “Lako' poto'iakon hi to utu-utus-Ku da aha mamba mokiijo' i Galilea; i kiijo' mae aha montoaje Aku.”

¹¹Hau-haunyo to bou-boune haha aijo' namba, aha to pia-piangkuka na suludadu anu nonjagai kubulan aijo' ninsusule'mo i kota', ka' nompoto'i hi Kapala nu to Ima-imam iwi-iwi' apaa na anu jinadimo.

¹²Kapala nu to Ima-imam aijo' binasale' tiba to pola-polaya' nu Yahudi, lantas nombee'i doi manjoo' hondo hi suludadu anu monjagai aijo',

¹³ka' notatae, “Komiu tionyo montaloakon, saba' anu saja' mombatuki Yesus aijo' tinokamo pihi-pihi, ka' nombuling mayat-Nyo tempo'nyo hau-haunyo komiu hoyot.

¹⁴Ka' de i gubernur mohongo han aijo', osale'ije mami na ia da komiu madi' opoposia.”

¹⁵Saba' suludadu anu monjagai aijo' nongala doi aijo' ka' nombau sumo anu pinoto'imo hi aha. Kalana aijo, sisik aijo' daagi' saja' togilele hi mian nu Yahudi sampe sinaa aiya.

¹⁶ Sampulu' ka' sa'angu' na anu saja' mombatuki Yesus aijo' namba nokiijo' i bungkutnyo nu Galilea, sumo anu pinalentahkonmo i Yesus hi aha.

¹⁷Salatan aha nontoamo i Yesus kiijo' mae, aha tinolodadupumo nonsombah Ia, panyo daagi' ko anu i kiijo' hi aha bata-bata.

¹⁸I Yesus nongohani aha ka' notatae, “Iwi-iwi' na kuasa i suluga' ka' i dunia aiya binee'mo hi beleng-Ku.

¹⁹ Kalana aijo' lako'mo hi iwi-iwi' na bansa ka' songko-songko na dunia potimbali na aha anu saja' mombatuki Aku. Opalamandikan na aha ka' o sanggo na sanggo nu Tuuma, ka' Anak, ka' Roh nu Tumpu Allah.

²⁰O' ajan na aha mohongo-hongo iwi-iwi' apaa na anu Pinalentahkon-Kumo hi komiu. Ka' o inau', Aku saja' monjagai komiu sampe sinaa imihinyo mae.” 110