Read Saluan MATIUS 3 Bible Online

MATIUS 3 - Saluan bible

MATIUS 3

¹Tempo'nyo aijo' tinoka na i Yohanes anu Mompalamandikan i padang bone' kiijo' i Yudea ka' nontampu'uni binasisik.

² “Balatobatmo bolimo mombau dosa-dosa' miu,” tukoonyo, “kalana Tumpu mompalentahmo sumo Tomundo!”

³ I Yohanes aiyamo na anu koonyo i Nabi Yesaya i uno nu potataenyo, “Daagi' ko mian anu saja' noloboo' i padang bone', ‘Posadiakon na jalan nu Tumpu; pohatakon na jalan hi Ia.’ ”

⁴ I Yohanes nompake baju' bulu nu unta. Pombutu'nyo kilit na binau, ka' kaanonnyo kihi-kihi' ka' juu' nu uani'.

⁵Manjoo' na mian lengkat mae Yerusalem, lengkat i songko-songko na tano' nu Yudea, ka' lengkat i tano-tano' anu mompaha'ohani Kaunyo nu Yordan, tinokamo hi Yohanes.

⁶Aha nongakui dosa-dosa' nu aha, ka' i Yohanes nompalamandikanmo aha i Kaunyo nu Yordan.

⁷ Manjoo' suele na mian nu Farisi tiba Saduki tinoka hi Yohanes da o palamandikan. Panyo tempo'nyo ia nontoa aha tinokamo mae ia notatae hi aha, “Komiu mian ma'idek! Ihe na nontaloakon komiu timbali molapas lengkat i hukuman nu Tumpu anu tokaje mae?

⁸Potoa i uno nu palabuatanum de komiu binala tobatmo i dosa-dosa' miu.

⁹ Boli montaha'imani komiu timbali molapas lengkat i hukuman ka' motatae kalana i Abraham mompolee' miu. Tutugi, batu-batu pe'e aiya, Tumpu timbali mombau lee' i Abraham!

¹⁰ Bobolo' sinadiamo bau pontaa' kau' toka i baka-bakatnyo. Toto sampu'un anu madi' mohasinakon bua'nyo anu ma'ima' tionyo o taa' ka' o alin i uno nu apu.

¹¹Aku mompalamandikan komiu nu uee da momponyata' saba' komiu binala tobatmo i dosa-dosa' miu; panyo lapas na aku tokaje mae na anu mompalamandikan komiu nu Roh nu Tumpu tiba apu. Ia lebe daka' molingkudui aku. Ka' momboa sapatu-Nyo pe'e aku madi' pantas.

¹²I lima-Nyo daagi' ko kiapan bau pontapii iwi-iwi' na gandum-Nyo sampe belesi'. Gandum nu polimu' i uno nu alang, panyo iwi-iwi' na ota'-Nyo o papui i uno nu apu anu madi' toho' mate.”

¹³Tempo'nyo aitu i Yesus namba lengkat mae i Galilea namba nokiijo' i Kaunyo nu Yordan. I kiijo' mae tinoka hi Yohanes nomoita da o palamandikan.

¹⁴Panyo i Yohanes nompisoba madi' montalima poitaon-Nyo aijo'. I Yohanes notatae, “Aku yo konanyo o palamandikan nu kita Tuumangku. Uuka ola mule' kita Tuumangku na tinoka hi belengku.”

¹⁵Panyo i Yesus nontaami, “Pojohokmo ola uuka aiya. Kalana sumo aitu na kita mombau iwi-iwi' anu nu kahanda'i nu Tumpu Allah.” Jadi i Yohanes nompalamandikanmo i Yesus.

¹⁶Ilapas pinalamandikan, i Yesus lia-lia' nosabat lengkat mae i uee nu kaunyo aijo'. Madi' pinin langit tinabuka'mo ka' i Yesus nontoamo Roh nu Tumpu nintatau' sumo tomonsi' malapati' aita' i buan-Nyo.

¹⁷ Lapas aitu hongomo na potatae nu Tumpu nontaloakon, “Aiyamo na Anak-Ku anu Kuku kalibosi. Ia momposanang kinyonyoang-Ku.”