Read Saluan MATIUS 4 Bible Online

MATIUS 4 - Saluan bible

MATIUS 4

¹ Lapas aitu i Yesus binoa nu Roh nu Tumpu nokiijo' i padang bolaa da o sobai nu Ibilis.

²Patom pulu' na sinaa ka' patom pulu' na pihi i Yesus madi' nongkaan. Lantas Ia nongoa'imo no ohop.

³Ibilis tinoka ka' notatae, “Te Beleyum misa' Anak nu Tumpu Allah? Yo pokau na batu haha aiya timbali roti.”

⁴ I Yesus nontaami, “I uno nu Kitab nu Tumpu tinulis: Mian madi' ola tumuu' nu roti, panyo mule' suele kalana potatae anu nu taloakon nu Tumpu.”

⁵Ilapas aijo' Ibilis nomboamo i Yesus nokiijo' i Yerusalem, kota anu susi', ka' nompo'una' Ia aita' i bawo nu binumbungan nu Laigan nu Tumpu.

⁶ Lantas aijo' Ibilis notataemo hi Ia, “Te Beleyum misa' Anak nu Tumpu? Desumo aijo' pingkanabu' mokaiyong; kalana i uno nu Kitab nu Tumpu tinulis sumo uuka, ‘Tumpu monsaije to mala-malaikat-Nyo monjagai Beleyum, aha molabotje Beleyum nu lima nu aha da Tengkeum madi' tonsumpun i batu.’ ”

⁷ I Yesus nontaami, “Panyo i uno nu Kitab nu Tumpu tinulis mule', ‘Boli beleyum monsobai Tumpuum.’ ”

⁸Lapas aitu Ibilis nomboamo i Yesus mule' nokiita' i bungkutnyo anu matangkas hondo ka' nompotiju' hi Ia iwi-iwi' na kalaja'an i dunia tiba iwi-iwi' na kakaya'annyo.

⁹Lantas Ibilis notataemo hi Yesus, “Iwi-iwi' aiya kubee'je hi Beleyum de Beleyum toloduku monsombah aku.”

¹⁰ I Yesus nontaami, “Lako' na oko anu Monggoda! I uno nu Kitab nu Tumpu tinulis: O sombah na Tumpu, Tumpuum, ka' ola Ia na hongo na palentah-Nyo!”

¹¹Ahennyo Ibilis nompala'imo Yesus, ka' to mala-malaikat tinokamo montulungi Ia.

¹² Salatan i hongo saba' i Yohanes pinosoopmo i uno nu talungku', i Yesus nalaimo nokiijo' i Galilea.

¹³ Ia nompala'imo Nazaret, lantas jinojoongmo i Kapernaum i biwi nu Dowiwi Galilea i tano' nu Zebulon tiba Naftali.

¹⁴Kalana i Yesus nombaumo sumo aijo', sahingga tinimbalimo apaa na anu tinaloakon nu Nabi Yesaya:

¹⁵ “Tano' nu Zebulon tiba tano' nu Naftali, i jalan mokiijo' i dowiwi, i santoa Kaunyo nu Yordan, Galilea tano' nu mian misa' Yahudi!

¹⁶Bansa anu tumuu' i uno nu pintung montoamo jingka anu jongkilaban! Anu jojoong i uno nu lipu' anu pintung kapatean binete'mo na sahaya nu jingka!”

¹⁷ Lengkat tempo'nyo aijo' i Yesus nontampu'unimo nompolele, “Balatobatmo bolimo komiu mombau dosa-dosa' miu, kalana Tumpu Allah malia'mo mompalentah sumo Tomundo!”

¹⁸Tempo'nyo i Yesus hau-haunyo i lumajang i biwi nu bone' Dowiwi Galilea, Ia nontoa ua'aha na topo meka, aijo'mo i Simon (anu o sanggohi mule' i Petrus) tiba utusnyo ise' i Andreas. Aha hau-haunyo mompagala ikan i dowiwi aijo' nu buani'.

¹⁹I Yesus notatae hi aha, “Imbo' batuki na Aku. Aku mongajanmo komiu mombuani' mian.”

²⁰Balo pinala'ian nu aha na buani' nu aha, lantas nombatukimo Yesus.

²¹I Yesus i lumajang lau-laus, lantas nontoa mule' ua'aha na mian sangga'at anu moto utus, aijo'mo i Yakobus ka' i Yohanes, ana-anak i Zebedeus. Aha hingga-hinggat tiba tuuma nu aha hau-haunyo mompoko ima'i buani' i uno nu duangan. I Yesus mule' nolagamo aha,

²²ka' balo pinala'ian nu aha na duangan, ka' tuuma nu aha, lantas nombatuki Yesus.

²³ I Galilea, i Yesus nonsongkohi iwi-iwi' na lipu' ka' nongajan i laigan pogalejaan. Ia nompolele Lele Ma'ima' tukoonyo Tumpu tionyo mompalentah. Ka' Ia mule' nompa'alin to mia-mian anu masakit ka' anu madi' sampa' na butongnyo.

²⁴Lele mongkona i Yesus aijo' tinolelemo i songko-songko na tano' Siria, sahingga manjoo' na mian tinoka hi Ia. Aha nomboamo mae to mia-mian anu mongoa'i manjoo' na lupa-lupa nu panyakit tiba kasusa'an. To mia-mian anu pininsoopanmo nu roh ma'idek, anu mongkingkimi ka' anu lupe, iwi-iwi' pina'alin i Yesus.

²⁵Manjoo' hondo na mian anu mombatuki Yesus tempo'nyo aitu. Daagi' ko anu tinoka lengkat mae i Galilea, daagi' ko anu tinoka lengkat mae i Sampulu' na Kota, lengkat mae i Yerusalem lengkat mae i Yudea, daagi' mule' ko anu lengkat mae i lipu' santoa nu Yordan.