Read Saluan MATIUS 5 Bible Online

MATIUS 5 - Saluan bible

MATIUS 5

¹Salatan i Yesus nontoamo mian da'isan aijo', Ia nindakomo nokiita' i bungkutnyo. Salatan Ia sinumuhangmo, anu saja' mombatuki Ia tinokamo hi Ia,

²lantas Ia nontampu'unimo nongajan aha:

³“Bila-bilahi na mian anu mongoa'i madi' moko ala, ka' ola montaha'imani Tumpu samata-mata; aha ninsoopmo mian anu palesayamo hi Tumpu!

⁴ Bila-bilahi na mian anu mongoa'i susa' na kinyonyoanyo; Tumpu mongindeko'je aha!

⁵ Bila-bilahi na mian anu madi' ko tige-tige; Tumpu tionyo mongganapije janji'-Nyo hi aha!

⁶ Bila-bilahi na mian anu molibos na mombau pongka'oho' nu Tumpu; Tumpu mompopuasje aha!

⁷Bila-bilahi na mian anu mongkalibosi mian sangga'at; Tumpu mongkalibosije aha suele!

⁸ Bila-bilahi na mian anu molino na kinyonyoanyo; aha monsumbu'je Tumpu!

⁹Bila-bilahi na mian anu momboa dame hi sangko mian; Tumpu mongakuije aha sumo to ana-anak-Nyo!

¹⁰ Bila-bilahi na mian anu mongoa'i ponsakisa kalana mombau kahanda' nu Tumpu; aha minsoopmo mian anu palesayamo hi Tumpu!

¹¹ Bila-bilahi na komiu de o alu, o sakisa, o pitana'i kalana Aku.

¹² To nabi-nabi anu tinumuu' ma'isa pe'e kino komiunyo sinakisamo sumo aijo'. Oposanaang ka' opolame' na kinyonyoa, saba' daka' na tamboo anu pinosadiakon nu Tumpu bau bagi miu.”

¹³ “Komiu timuson nu dunia. De timuson timbalimo matawas te daagi' opoko po'asing mule'? Madi'mo ko gunanyo, panyo o alin ka' o peja-peja' nu mian.

¹⁴ Komiu jingka nu dunia. Kota anu aita' i bungkutnyo madi' opoko posuluk.

¹⁵ Madi' ko mian anu montutungi sulu', lantas mongkulubi sulu' nu gumbang. Ia ola ahi' mompo'una' sulu' aijo' i tampat nu sulu', da monjingkai batu-batu mian i uno nu laigan.

¹⁶ Sumo aitu mule' na jingkaum tionyo monjingkai ahop nu mian da aha montoa anu ma'ima', apaa na anu binau miu, lantas mompuji' Tuumaum i suluga'.”

¹⁷“Boli monsangka saba' Aku toka da mohapusi atulan i Musa tiba ajalan nu to nabi-nabi. Aku toka misa' da mohapusi, panyo da mopotiju' alati'nyo anu sahondo-hondonyo.

¹⁸ O inau'! Sapinnyo langit ka' dunia daagi', sa'angu' na hulup kabai titik anu talalo ise' pe'e i uno nu atulan aijo' madi' o hapusakon, de iwi-iwi' ma'isa jadi!

¹⁹Sabab kalana aijo', ihe na molanggai sala'sa'angu' na palentah haha aijo' mau mule' talalo ise' ka' mongajan mian sangga'at, mombau sumo aitu mule' timbali anu talalo ise' hi mian anu palesayamo hi Tumpu. Panyo mule' ihe na mompojalan pale-palentah aijo', ka' mongajan mian sangga'at mombau sumo aitu mule', timbali daka' hi mian anu palesayamo hi Tumpu.

²⁰Jadi, o inau': Madi' opoko ala miu na timbali mian anu palesayamo hi Tumpu, de madi' molabii to gulu-gulu' agama, ka' to mia-mian Farisi i uno nu han mombau pongka'oho' nu Tumpu Allah!”

²¹ “Komiu monsumbu' saba' hi mompolee'to daagi' ko ajalan sumo uuka: Boli mompatei; ihe na mompatei, tionyo o putusimo na palakalanyo.

²²Panyo uuka Aku motatae hi beleyum, ihe na pusa hi mian sangga'at, tionyo o putusi na palakalanyo; ka' ihehe na monguduli mian sangga'at, tionyo o putusi na palakalanyo i ahop nu Mian Kopian Daka' nu Agama. Ka' ihehe na montaloakon hi mian sangga'at, ‘Talalo ponga'’, patut o alin i uno nu apu nalaka.

²³Kalana aijo', de sala'samian itina' hi komiu hau-haunyo monsombahkon anu obee' hi Tumpu, lantas tonginau' daagi' ko mian ma'idek na kinyonyoanyo hi ia,

²⁴tionyo ia mompala'i pe'e anu nu sombahkon aijo' i ahop nu tampat ponsombahkonan, lantas mamba baladame tiba mian aijo'. Lapas aijo' timbalije ia minsusule' ka' monsombahkon anu nu bee' hi Tumpu.

²⁵De daagi' ko mian anu mongkalaak komiu hi Mian Kopian, baladame pe'e tiba ia de daagi' ko tempo' da ma'isa pe'e toka hi Mian Kopian. De madi', mian aijo' mombee'mo komiu hi Mian Kopian, anu mombee'je mule' komiu hi Pulisi. Lantas Pulisi momposoopmo komiu i talungku'.

²⁶Ka' o inau': Tantu komiu madi' moko posabat i talungku' aijo' de ma'isa pe'e pinondenda hi beleyum opolunas iwi-iwi'.”

²⁷ “Komiu monsumbu' saba' daagi' ko pangajalan sumo uuka: Boli masala'.

²⁸Panyo uuka Aku motatae hi beleyum: Ihe na montoa samian na boune ka' ko napisunyomo, mian aijo' nasala'mo tiba boune aijo' i uno nu kinyonyoanyo.

²⁹ De mataum koanan monsaduakon beleyum baladosa', kubetakon ka' o alin na mata aijo'! Lebe ma'ima' molapus na sala'sa'angu' na pakakas nu butongum, ka' de mule' iwi-iwi' na butongum o alin i uno nu nalaka.

³⁰ De lima nu koananum monsaduakon beleyum baladosa', kolongakon ka' alin na lima aijo'! Lebe ma'ima' molapus na limaum sambiha', ka' de mule' iwi-iwi' na butongum minsoop i nalaka.”

³¹ “Daagi' mule' ko ajalan sumo uuka: Batu-batu mian anu mongga'atakon bengkele'nyo, tionyo ia mombee' sulat pooga'atan hi ia.

³² Panyo uuka Aku motatae hi beleyum: De ihe na mongga'atakon bengkele'nyo, padahan boune aijo' madi' noteeba', monsaduakon bengkele'nyo aijo' masala', de bengkele'nyo mo'osoa mule'. Ka' ihe na mo'osoa tiba boune anu gina'atakon aijo' suele masala'.”

³³ “Komiu monsumbu' saba' mompolee'to daagi' ko pangajalan sumo uuka: Boli mombaleko'i janji'. Apaa na anu jinanji'umo tiba sumpa' i ahop nu Tumpu, tionyo nu bau.

³⁴ Panyo uuka Aku motatae hi beleyum: Boli hondo-hondo basumpa', mau monsanggo langit, sabab langit aijo' Tumpu na anu mongkuasai,

³⁵ mau mule' sanggo nu dunia, sabab dunia aijo' latas nu tengke-Nyo; kabai sanggo nu Yerusalem, sabab aijo'mo na kota nu Tomundo Daka'.

³⁶Boli mule' basumpa' sanggo nu ubakum, sabab posi beleyum madi' moko bau bulu nu ubakum timbalimo pute' kabai mo'itom, mau mule' ola sahamba.

³⁷Taloakonmo, ‘Ii'’ kabai ‘Madi'’ — molabii anu sumo aijo' nyata' nolengkat mae i Ibilis.”

³⁸ “Komiu monsumbu' saba' daagi' mule' ko ajalan sumo uuka: Mata o bolosi nu mata, bese' o bolosi nu bese'.

³⁹Panyo uuka Aku motatae hi komiu: Boli mombalosi idek hi mian anu mombau idek hi komiu. Ola ahi' de mian mohapa' gagisingum anu i koanan, pojohok da ia mohapa' gagisingum anu i kowi suele.

⁴⁰Ka' de komian anu mongkalaak komiu hi Mian Kopian, ka' montuntut baju'um, bee'akonmo hi ia na juba'um.

⁴¹De ko samian anu ko pangkat mompakisa komiu monsimbu boaonnyo kojo'onnyo sa'angu' na kilometen, simbuumo kojo'onnyo ohua' na kilometen.

⁴²De komian mompoita apa-apaa hi komiu, bee'iakonmo na ia. Ka' boli mule' tolo madi' himian anu mongka'oho' mosabon apa-apaa hi beleyum.”

⁴³ “Komiu monsumbu' saba' daagi' mule' ko ajalan sumo uuka: Kanonongi na to sanga-sangaluyum, ka' oka'ideki na to sampo-sampo bali'um.

⁴⁴Panyo uuka Aku motatae hi beleyum: Kanonongi na to sampo-sampo bali'um, ka' o sambayangakon na to mia-mian anu mongkabisa'i komiu,

⁴⁵da komiu timbali to ana-anak nu Tuumaum i suluga'. Kalana Tumpu mompobete' batu nu sinaa bau bagi nu mian anu ma'ima' ka' bagi nu mian anu ma'idek. Ia mombee'i ujan hi mian anu mombau ima', ka' hi mian anu mombau idek suele.

⁴⁶Kalana de komiu mongkalibosi ola mian anu mongkalibosi komiu, bau apaa na Tumpu tionyo mombalosi palabuatan miu aijo'? Te misa' topo tagi hasin suele mombau sumo aitu?

⁴⁷Ka' de komiu mombee'i salan do'a ola hi to sanga-sangaluyum, apaa na ka'ima'annyo? To mia-mian anu madi' monsumbu' Tumpu suele mombau sumo aijo'?

⁴⁸ Tuumaum i suluga' mongkalibosi iwi-iwi' na mian totu-totu'unyo. Komiu tionyo suele sumo aitu.”