Read Saluan MATIUS 6 Bible Online

MATIUS 6 - Saluan bible

MATIUS 6

¹ “O inau', boli komiu mompojalan palentah nu agama i ahop nu mian da'isan da nu toa nu mian. De komiu mombau sumo aijo', komiu madi' mohumpak tamboo nu Tuumaum i suluga'.

²Jadi, de komiu mombee' sadaka' hi mian kasiasi, boli lewa' o hengge-hengge'akon na han aijo' sumo anu nu bau nu to mia-mian geguan. Nu ka'ima'i nu aha na mombau sumo aijo' i uno nu laigan pogalejaan tiba i jalan daka', da nu puji' nu mian. O inau' aha nontalimamo tamboonyo.

³Panyo komiu, de komiu mombee' sadaka', bee'mo hoko-hokot, da madi' ko anu monsumbu'.

⁴Bakas na palabuatanum aijo' madi' nu sumbu' mau pe'e ihe, boli mompiakon Tuumaum i suluga'. Ia montoa palabuatanum anu sulu-suluk aijo', ka' mombee'je tamboonyo hi beleyum.”

⁵ “De komiu balado'a, boli sumo to mia-mian anu mongka' oho' bapula-pula. Aha mongka'oho' balado'a tinjo-tinjo i laigan pogalejaan ka' i popanga'an nu jalan da nu toa nu mian. O inau', aijo'mo na tamboonyo anu tinalimamo nu aha.

⁶Panyo de komiu balado'a, pinsoop i salipi' ka' tumban na sabatan, lantas balado'a hi Tuumaum anu madi' kantoan aijo'. Saba' Tuumaum na montoa palabuatanum anu sulu-suluk mombee'je tamboonyo hi beleyum.

⁷De komiu balado'a, boli opo uli-ulit sumo to mia-mian anu madi' monsumbu' Tumpu. Aha monsangka, saba' poitaon nu aha tionyo Nu hongo, sabab do'a nu aha anu mantan aijo'.

⁸Boli sumo aha. Sinumbu'mo nu Tuumaum apaa na anu opalalui miu, mau ma'isa pe'e komiu nomoita.

⁹Jadi balado'a sumo uuka, ‘Tuuma mami isuluga': Sa'a-sa'angu'nyo kita na Tumpu. O'amalakon kitamo na anu o sombah ka' anu o'angga'i.

¹⁰Kitamo na Tomundo' mami. O'amalakon kitamo na mompalentah i dunia ka' kahanda'to o tuluti sumo i suluga'.

¹¹Bee'i mae sinaa aiya kaanon anu o palalui mami.

¹²Ampuniakon na kasala'an mami, sumo kami mongampuni mian anu mombau sala' hi kami.

¹³Boli mompojohok kami kakulangan palesaya tempo'nyo kami o sobai panyo lapasakon na kami i kuasanyo Anu Ma'idek. [Kitamo na Tomundo' anu balakuasa ka' opopodaka' toka sidu-sidutu'. Amin.]’

¹⁴ De komiu mongampuni mian anu mombau sala' hi beleyum, Tuumaum i suluga' suele mongampunije kasala'anum.

¹⁵Panyo de komiu madi' mongampuni kasala'an nu mian sangga'at, Tuumaum i suluga' mule' madi' mongampuni kasala'an miu.”

¹⁶“De komiu bapuasa', boli mompotoa ohup susa', sumo mian anu mimpula-pula. Aha mombali'i lupa nu ohupnyo da iwi-iwi' na mian monsumbu' au'aitu aha bapuasa'. O inau' aijo'mo na tamboonyo anu tinalimamo nu aha.

¹⁷Panyo de komiu bapuasa', pi'ohupi na ohupum ka' o subat na ubakum,

¹⁸da madi' ko anu monsumbu' saba' komiu bapuasa', sangadinyo Tuumaum anu madi' kantoan aijo'. Ia montoa palabuatanum anu sulu-suluk aijo', ka' mombee'ije tamboonyo hi komiu.”

¹⁹ “Boli molimu' halata' da bau kapalaluan nu butongum i dunia, iya na ane' ka' atak timbali mongidei, ka' tololang toka montomang.

²⁰Panyo mule' limu' na halata' i suluga', iya na ane' ka' atak madi' mongidei, ka' tololang madi' toka montomang.

²¹Kalana iya na ko halata'um, i kiijo' suele na kinyonyoaum!”

²²“Mata, sulu' nu butong. De mataum tontoa, songko-songko na butongum majingka hondo.

²³Panyo de mataum paha, songko-songko na butongum pikat. Jadi de sulu' i uno nu butongum pintung, ebeh na kopintungnyo aijo'!”

²⁴“Madi' ko samian pe'e timbali mokalaja hi ohua' na tuan. Kalana ia lebe mongkalibosi samian molingkudui anu sangga'at. Kabai ia lebe mohongo-hongo hi tuan samian molingkudui sangga'at. Sumo aitu suele na komiu. Komiu madi' timbali mokalaja bau kapentingan nu Tumpu ka' bau kapentingan suele i halata'.

²⁵Kalana aijo' o inau'; boli bata-bata i kantumuu'anum apaa na anu o kaan miu ka' o inum, kabai apaa na anu o pake miu. Te misa' kantumuu'an molingkudui anu o kaan, ka' butong molingkudui pakean?

²⁶Toa na tomonsi' i langa. Aha madi' mosu'an, madi' mompadak, ka' madi' mule' mompolimu' hasin anu sinu'annyo i uno nu alang. Mau mule' sumo aitu Tuumaum anu i suluga' mompotuu' aha! Te misa' komiu lebe ko angga'nyo molingkudui tomonsi'?

²⁷Ihe na hi komiu anu kalana bata-bata timbali mompomantan umunnyo mau mule' sangkiding?

²⁸Kadaka' komiu bata-bata mongkona pakean miu? Palahatikan na to bunga-bunga bakung anu tumuu' i padang. Bunga-bunga aijo' madi' mokalaja ka' madi' montonun;

²⁹ panyo i Tomundo' Salomo sumo aijo'na ko kayanyo madi' mompake pakean anu ko ima'nyo sumo bunga-bunga aijo'!

³⁰Hemput i padang tumuu' sinaa aiya, ka' dodop o papui mingkotmo. Panyo Tumpu mompakei hemput aijo' kino ima'nyo. Apaa mule' komiu! Panyo komiu madi' talalo palesaya!

³¹Boli bata-bata ka' motatae, ‘Apaa na anu o kaanto’, kabai ‘apaa na anu o inumto’, kabai ‘apaa na anu o pakento’?

³²Hahan aijo' saja' pagala o lio nu to mia-mian anu madi' monsumbu' Tumpu. Padahan Tuumaum anu i suluga' monsumbu', saba' komiu mompalalui iwi-iwi' aijo'.

³³Jadi, o usahakon pe'e da Tumpu mompalentah i kantumuu'anum, ka' o bau na kahanda'-Nyo. Sahingga iwi-iwi' anu sangga'at nubee'je nu Tumpu suele hi beleyum.

³⁴Kalana aijo', boli bata-bata mongkona sinaa dodop. Kalana dodop koposi bata-batanyo. Sinaa uuka sukupmo na kasusa'annyo bolimo daagi o tuangi mule'.”