Read Saluan MATIUS 7 Bible Online

MATIUS 7 - Saluan bible

MATIUS 7

¹“Boli mompisala'i mian sangga'at, da komiu suele boli nu pisala'i nu Tumpu.

² Kalana sumo komiu mompisala'i mian sangga'at, sumo aitu mule' na Tumpu mompisala'i komiu. Ka' sukat anu o pake miu hi mian sangga'at, tionyo o pake suele nu Tumpu hi komiu.

³Kadaka' komiu montoa sangkunyit na kau' i uno nu mata nu utusum, sadangkan pangkot i uno nu posi mataum madi' o palahatikan miu?

⁴Mosia na komiu timbali montaloakon hi utusum, ‘Imbo' da ku alinakon na kau' sangkunyit atina' hi mataum,’ sadangkan i uno nu posi mataum daagi' ko pangkot?

⁵Ee baleko'! Alinakon pe'e na pangkot i posi mataum, timbalije beleyum montoa totu-totu'u, ka' timbali mongalinakon sangkunyit na kau' i mata nu utusum.

⁶Boli o bee' na han anu susi' hi dedeng, da dedeng aijo' boli mobalik ka' mololo' beleyum. Ka' boli mombee' mutiara i bau', da bau' aijo' boli mompeja-peja' mutiara aijo'.”

⁷“Poita, da komiu montalima. Lio, da komiu mohumpak. Kutetek, da tumban o tuhea'akon bau pinsoopannum.

⁸Kalana mian anu momoita tionyo montalima; mian anu molio tionyo mohumpak; ka' mian anu mongkutetek tionyo o tuhea'akon na pontumban.

⁹Pa' daagi' ko anu hi komiu, Tuuma mombee' batu hi anaknyo, de ia momoita roti?

¹⁰Kabai mombee' ulo, de ia momoita ikan?

¹¹Mau mule' komiu ma'idek, komiu suele mombee' anu ma'ima' hi to ana-anakum. Apaa mule' Tuumaum i suluga'! Ia lebe mule' mombee' anu ma'ima' hi mian anu momoita hi Ia.

¹² O bau na mian sangga'at sumo apaa na anu oka'ima'i nu bau nu aha hi komiu. Aijo'mo na batunyo nu atulan i Musa, ka' pangajalan nu to nabi-nabi.”

¹³“Pinsoopmo montulu sabatan anu soki, kalana sabatan ka' jalan anu mompanjolongi nalaka daka' ka' bolaa, ka' da'isan na mian anu molowo'.

¹⁴Panyo soki ka' susa' na sabatan ka' jalan anu momboa mian i kantumuu'an. Ka' ola sangkiding na mian anu mongkabot.”

¹⁵“Opoko piani na mongahopi to nabi-nabi anu madi' totu'u. Aha toka hi komiu mimbalu-balu' domba, panyo aha sabenannyo sumo pojek anu baani.

¹⁶Komiu monsumbu'je aha i palabuatan nu aha. Kuhat anu ko hii'nyo madi' mimbua' bua' nu anggur, ka' hemput anu ko hii'nyo madi' mohasinakon bua' nu ara.

¹⁷Kau' anu molumba' o humpak na bua'nyo anu ma'ima', ka' kau' anu madi' molumba', bua'nyo ma'idek.

¹⁸Kau' anu molumba', madi' mohasinakon bua' anu ma'idek, ka' kau' anu madi' molumba' madi' mohasinakon bua' anu ma'ima'.

¹⁹ Batu-batu kau' anu madi' mohasinakon bua' anu ma'ima' o taa' ka' o papui.

²⁰ Sumo aitu mule' na to nabi-nabi anu madi' totu'u. Komiu monsumbu' aha i hasin nu palabuatannyo.”

²¹“Madi' iwi-iwi' na mian anu molaga Aku, ‘Tumpu, Tumpu,’ anu moko ala timbali mian anu palesayamo hi Tumpu, panyo ola to mia-mian anu mombau kahanda' nu Tuumang-Ku anu i suluga'.

²²I Sinaa Kakiamatan da'isan na mian motatae hi belengku, ‘Tumpu, Tumpu, te misa' sanggonto na o pake mami mompotoka potuunon nu Tumpu? Ka' te misa' sanggo nu Tumpu suele, kami mule' nola'mo to roh-roh anu ma'idek, ka' nombau manjoo' na anu okabangangi?’

²³ Panyo Ku taamije, ‘Aku madi' toho' nonsumbu' komiu! Lako'mo, na komiu anu mombau ka'idekan!’ ”

²⁴“Yoh, mian anu mohongo potataeng-Ku aiya, ka' montuluti, pokakana sumo mian pande anu mompotinjo laigannyo i bawo nu batu.

²⁵Tempo'nyo ujan tudun, ka' iaba' toka tiba mombun makansang montintip laigan aijo', laigan aijo' madi' motua' kalana pinotinjomo i bawo nu batu.

²⁶Ka' mian anu mohongo potataeng-Ku aiya, panyo madi' montuluti, ia pokakana sumo mian ponga' anu mompotinjo laigannyo i bawo nu bone'.

²⁷Tempo'nyo ujan tudun, ka' iaba' toka tiba mombun makansang montintip laigan aijo', laigan aijo' motua'. Ka' ka'idekannyo talalo hondo!”

²⁸ Ahennyo i Yesus lapasmo na nongajan, ka' to mia-mian i kiijo' binangangmo hondo na nohongo pangajalan-Nyo.

²⁹Kalana Ia mongajan nu kuasa, misa' sumo to gulu-gulu' nu agama nu aha.