Read Saluan MATIUS 8 Bible Online

MATIUS 8 - Saluan bible

MATIUS 8

¹I Yesus nintatau' mae lengkat i bungkutnyo, ka' da'isan na mian anu nombatuki Ia.

²Tempo'nyo aitu tinoka na samian anu ko panyakit kilit anu o kabuhuk. Ia tinolodupu i ahop i Yesus, lantas notatae, “Kita Tuuma, de kita Tuuma mongka'oho', kita Tuuma timbali mompa'alin aku.”

³I Yesus nongkanyang mian aijo' ka' notatae, “Aku mongka'oho'. Pa'alinmo!” Tempo'nyo aitu panyakitnyo na'alinmo.

⁴ Lantas koonyo i Yesus hi ia, “O inau'! Boli monsisik mau mule' pa' hi he. Panyo lako' hi imam ka' opoita na ia da montantukan beleyum na'alinmo. Lapas aijo' sombahkon na koloban anu pinalentahkon i Musa, bau bukuti' hi to mia-mian saba' beleyum totu-totu'u na'alinmo!”

⁵Tempo'nyo i Yesus ninsoop i Kapernaum, samian na suludadu nu Roma tinokamo nonsingkaboti mae Ia, ka' nomoita tulung hi Ia.

⁶“Kita Tuuma,” koonyo nu suludadu aijo', “Posaihonku masakit kiijo' i laigan. Ia male-male' i lupemo kiijo' male-male' talalo masakit hondo.”

⁷Koonyo i Yesus, “Aku mambaje mompa'alin ia.”

⁸“Boli pilenje Kita Tuuma,” tukoonyo nu suludadu aijo': “Aku madi' pantas montalima Kita Tuuma i laiganku. Ola ahi' o palentah nu Kita Tuuma. Pokauhonku aijo' ma'alin.

⁹Kalana aku mule' tionyo mohongo i palentah nu Kapala, ka' i aluku daagi' mule' ko sulu-suludadu anu ku palentah, anu tionyo mohongo palentangku. De aku mompalentah samian na suludadu i alukku, ‘Lako'!’ ia suele mamba. Aku montaloakon hi anu sangga'at, ‘Imbo' aiya!’ ia mule' toka; ka' de aku mompalentah posaihonku, ‘Obau na aiya!’ ia mule' mombau.”

¹⁰Salatan i Yesus nohongo apaa na anu tinaloakon nu suludadu aijo', Ia binangang hondo. Lantas Ia notatae hi to mia-mian anu hau-haunyo mombatuki Ia, “Palias na mian aiya. Hi mian nu Israel ma'isa pe'e toho' Aku nongkabot kinodaka'nyo nu palesaya aiya!

¹¹ Totu'u! Manjoo' na mian anu tokaje lengkat mae i kabete'an tiba kinsoban da balame-lame' hingga-hinggat tiba i Abraham, i Ishak, ka' i Yakub, i uno nu Dunia Bu'ou nu Tumpu.

¹² Padahan to mia-mian anu sabenannyo timbali mian anu palesayamo hi Tumpu, o alin i kapintungan anu i sambiha'nyo. I kiijo' aha humaang ka' mongoa'i sansala.”

¹³Lantas i Yesus notatae hi suludadu aijo', “Pinsusule'mo, apaa na anu nu palesaya aijo' tionyo timbali.” Ka' tempo'nyo aitu mule' posaihonnyo aijo' na'alinmo.

¹⁴I Yesus namba i laigan i Petrus. I kiijo' Ia nontoa tina nu bengkele' i Petrus hau-haunyo nu sihabi i tampat kahoyotan.

¹⁵I Yesus nongkanyang limanyo, lantas sakit anu nonsihabi na'alinmo. Ia nobula ka' nontoa apaa na anu palalu obee' hi Yesus.

¹⁶Tempo'nyo mamalom, mian nomboa hi Yesus da'isan na mian anu sinoku'onmo nu roh ma'idek. Ka' ola santaa' na potatae, i Yesus nolaa' to roh-roh ma'idek aijo' ka' nompa'alin mule' iwi-iwi' na mian anu masakit.

¹⁷ I Yesus nombaumo iwi-iwi' aijo', ka' tiba jalan aijo' tinimbalimo apaa na anu tinaloakon i Nabi Yesaya, aijo'mo, “Ia montanggung kasala'anto ka' mompa'alin panyakito.”

¹⁸Manjoo' hondo na mian anu montikubi Yesus. Salatan i Yesus nontoamo aha iwi-iwi', Ia nompokaumo anu saja' mombatuki motaapmo i dowiwi.

¹⁹Lantas samian na gulu' agama tinoka hi Ia ka' notatae, “Kita Tuumangku Gulu', aku kahanda' mombatuki Kita Tuuma mau mule' pa'moya!”

²⁰I Yesus nontaami, “Pojek ko liangnyo, ka' tomonsi' ko petaanyo, panyo Anak nu Mian madi' ko kamale'an.”

²¹Lantas samian na anu saja' mombatuki sangga'at notatae, “Kita Tuuma, poloas pe'e na aku minsusule' molamun Tuumangku.”

²²Panyo i Yesus nontaami, “Batuki na Aku, ka' pojohokmo na mian anu sinilakamo molamun miannyo anu sinilakamo.”

²³I Yesus sinumake' i duangan tiba anu saja' mombatuki hingga-hinggat tiba Ia.

²⁴Monti-montiik baleba' makansang anu talalo hondo nontintipmo dowiwi, sahingga duangan aijo' sinambuanganmo nu bokon. Tempo'nyo aitu i Yesus hau-haunyo hoyot.

²⁵Lantas anu saja' mombatuki nambamo hi Ia ka' nombulakon Ia. “Kita Tuuma! Tulungi! Silakamo na kita!” Loboo' nu aha.

²⁶“Kadaka' komiu mabuhuk?” Tukoonyo i Yesus. “Komiu madi' talalo palesaya hi belengku!” Lapas aijo' i Yesus tinuminjo ka' nonsegai mombun tiba dowiwi aijo'. Lantas dowiwi aijo' nolinomo hondo.

²⁷Anu saja' mombatuki Yesus binangang. Aha notatae, “Mian apaa na Ia aiya, sampe mombun ka' bokon mohongo palentah-Nyo!”

²⁸I Yesus tinoka i santoa nu dowiwi i tano' nu Gadara. I kiijo' mae ua'aha na mian anu pininsoopan nu roh ma'idek tinokamo hi Ia. Ua-ua'aha aijo' baani hondo, sahingga madi' ko samian pe'e baani motulu i kiijo'.

²⁹Aha nosabat lengkat mae i bolo' nu kubulan, ka' ko kihi-kihis, “Anak nu Tumpu, nu posiamo na kami? Te Belento kahanda'mo monsakisa kami mau mule' ma'isa pe'e tempo'nyo?”

³⁰Madi' majo'on lengkat i kiijo', daagi' ko bau' manjoo' hondo hau-haunyo molio mongkaan.

³¹To roh-roh ma'idek aijo' nongkakasemo hi Yesus, “De Belento monsai kami mosabat, saimo na kami minsoop i uno nu bau-bau' haha aijo'.”

³²“Lako'mo!” Koonyo i Yesus. To roh-roh ma'idek aijo' namba nompala'i mian ua'aha aijo', lantas ninsoop i uno nu to bau-bau' aijo'. Ka' bau' haha aijo' mule' nalaimo, ka' ningkanabu' i biwi nu tungebe nokaiyong i uno nu dowiwi, lantas nolomosmo.

³³Anu monjagai bau' aijo' nopadeka'mo namba i kota, ka' nonsisik iwi-iwi' anu tinimbalimo aijo', sumo aitu mule' apaa na anu tinimbali tiba mian ua'aha anu sinoku'on nu roh ma'idek aijo'.

³⁴Lantas iwi-iwi' na mian nu kota aijo' namba nolabotakon i Yesus. Tempo'nyo aha nontoamo i Yesus, pinoitamo nu aha da sabole-boleh Ia mompala'i tano' nu aha.