Read Saluan MATIUS 9 Bible Online

MATIUS 9 - Saluan bible

MATIUS 9

¹I Yesus sinumake' i duangan, lantas notaap i dowiwi, ninsusule'mo i kampung kinahampean-Nyo.

²I kiijo' mian nomboa hi Ia samian anu lupe, pinomale' i ampas. Tempo'nyo i Yesus nontoa kinodaka'nyo na palesaya nu to mia-mian haha aijo', Ia notatae hi mian lupe aijo', “Sabaan, anak-Ku! Dosa-dosa'um ingampunanmo.”

³To pia-piangkuka na gulu' agama anu daagi' i kiijo' notataemo i uno nu kinyonyoa, “Mian aiya mompopo'ise' Tumpu Allah!”

⁴Sinumbu' i Yesus na pikilan nu aha, jadi Ia notatae, “Kadaka' na pikilan miu kino ideknyo sumo itina'?

⁵Iya na lebe dengke: montaloakon, ‘Dosa'um ingampunanmo’, kabai montaloakon, ‘Bulaamo ka' lajangmo?’

⁶Panyo uuka Aku mompobukuti'je hi beleyum saba' i bawo nu dunia aiya Anak nu Mian ko kuasa mongampuni dosa'.” Lantas i Yesus notatae hi mian lupe aijo', “Bula, hangkat na ampasum ka' pinsusule'mo!”

⁷Mian lupe aijo' nobula ka' ninsusule' nokiijo' i laigannyo.

⁸Tempo'nyo to mia-mian nontoamo anu tinimbali aijo', aha sinawe'mo nu buhuk ka' nompuji' Tumpu, kalana Tumpu nombee'mo kuasa anu daka' hondo hi mian.

⁹Lapas aijo' i Yesus nompala'imo tampat aijo'. Hau-haunyo i lumajang, Ia nontoa samian topo tagi hasin, sanggonyo i Matius, hau-haunyo suha-suhang i kanton nu anu montage hasin. I Yesus notatae hi ia, “Imbo' batuk mae na Aku!” I Matius tinuminjo ka' nombatuki Yesus.

¹⁰ Tempo'nyo i Yesus hau-haunyo nongkaan i laigan i Matius, da'isan na topo tagi hasin tinoka ka' to mia-mian anu o sanggohi madi' ma'ima' nu mian da'isan, nongkaanmo hingga-hinggat tiba i Yesus ka' anu saja' mombatuki.

¹¹Daagi' ko to mia-mian Farisi anu nontoa han aijo'. Ka' aha nompokilawamo hi anu saja' mombatuki Yesus, “Apaa na sababnyo gulu'um mongkaan hingga-hinggat tiba topo tagi hasin, ka' to mia-mian anu madi' ma'ima'?”

¹²I hongo i Yesus na aha nompokilawa lantas nontaami, “Mian anu mahoson madi' mompalalui dokoten, ola mian anu masakit.

¹³ Soba selidiki' apaa na alati'nyo ayat nu Kitab nu Tumpu Allah: ‘Aku mongkahanda'i pongkalibosi ka' misa' koloban binatang’. Kalana Aku toka misa' da molaga mian anu monsanggo butongnyo ma'ima'mo, panyo mian anu o sangka madi' talakana'.”

¹⁴Ilapas aijo' anu saja' mombatuki Yohanes anu Mompalamandikan tinoka hi Yesus. Lantas aha nompokilawa, “Kadaka' kami tiba to mia-mian nu Farisi bapuasa', yo aitu anu saja' mombatuki Kita Tuuma i madi'?”

¹⁵I Yesus nontaami, “Mosiamo na pongka'oho' miu? Timbali na to mia-mian anu o laga i bau-bauon po'osoan mongoa'i susa' na kinyonyoa de boting mo'ane daagi' hingga-hinggat aha? Tantu i madi'! Panyo tokaje na tempo'nyo boting mo'ane aijo' o alamo hi aha. Tempo'je aitu yo aha bapuasa'mo.

¹⁶Madi' ko mian anu montamban baju' anu mahudemo tiba sambeak na hude anu daagi' bu'ou. Kalana hude pontamban aijo' tionyo mokakas ka' mobeak, sahingga mongahenakon beaknyo anu lebe daka'.

¹⁷Sumo aitu mule', madi' ko mian anu molana' anggur bu'ou i uno nu botutu kilit anu motu'amo. Kalana botutu aijo' tionyo mobeak ka' ma'idek, lantas anggurnyo mobubus. Anggur bu'ou tionyo o lana' i uno nu botutu anu bu'ou suele, da ohu-ohua' tataap ma'ima'.”

¹⁸Hau-haunyo i Yesus notatae hi anu saja' mombatuki Yohanes anu Mompalamandikan, tinokamo na samian anu monjagai laigan pogalejaan. Ia tinolodadupu i ahop hi Yesus ka' notatae, “Anakku boune sala'je sinilaka. Panyo de timbali toka mae kanyangakon, da ia po'ule' tumuu'.”

¹⁹I Yesus tinuminjo ka' nojajalan anu saja' mombatuki namba tiba mian aijo'.

²⁰I totonga' nu jalan samian na boune anu sampulu'mo ohua' na taun na kopinnyo masakit binuntulanmo nu home, ola nimpu'u tinokamo na bagi nu to bou-boune, tinoka nongohani Yesus lengkat i hiku. Ia binapikin, “Mau ola ku tiik na juba'-Nyo, aku tionyo ma'alin.” Lantas tiniiknyo na puus nu juba' i Yesus.

²²Tempo' aitu i Yesus nosiloi ka' nontoa boune aijo' balo notatae hi ia, “Posabaan anak-Ku! Kalana beleyum palesaya hi beleng-Ku, beleyum ma'alinmo!” Tempo'nyo aitu mule' i na'alinmo na boune aijo'.

²³Lapas aijo' i Yesus tinoka i laigan nu anu monjagai laigan pogalejaan aijo'. Salatan Ia nontoa anak mahaik musiik, pomusiiki de ko anu silaka, ka' da'isan na mian hengge',

²⁴Ia notatae hi aha, “Posabat na komiu iwi-iwi'! Anak aiya madi' sinilaka; ia ola ahi' hoyot.” Aha iwi-iwi' nongkokojoi Yesus.

²⁵Salatan mian haha aijo' nosabatmo, i Yesus ninsoop i uno nu salipi' nu anak aijo' ka' nontoongi limanyo. Lantas nobulamo na anak boune aijo'.

²⁶Lele aitu tinolelemo i songko-songko na tano' aijo'.

²⁷I Yesus namba lengkat i kiijo', ka' i totonga' nu jalan ua'aha na mian mapisok nombatukimo Ia. Aha noloboo', “O Anak i Daud, kalibosi mae na kami!”

²⁸Tempo'nyo i Yesus ninsoopmo i uno nu laigan, ua'aha na mian mapisok aijo' tinoka hi Ia. I Yesus nompokilawa hi aha, “Opalesaya miu saba' Aku timbali mompa'alin komiu?” “Palesaya hi Kita Tuuma!” tukoonyo nu aha.

²⁹Lantas i Yesus nongkanyang mata nu aha ka' notatae, “Kalana komiu palesaya, anu otaha'imani miu timbalimo.”

³⁰Sahingga aha timbali nontoa. Pinoto'i Yesus hi aha totu-totu'u, da boli mompoto'i han aijo' mau pe'e pa' hi he.

³¹Panyo aha i namba ka' nompolele, lele mongkona i Yesus, i songko-songko na tano' aijo'.

³²Tempo'nyo ua-ua'aha na mian aijo' namba, samian na anu momo' anu kinuasanmo nu roh ma'idek, binoa hi Yesus.

³³I Yesus nolaa' roh ma'idek aijo', ka' tempo' aitu mule' mian aijo' binangangmo ka' notatae, “Ma'isa toho' kami nontoa anu tinimbali sumo aiya i Israel!”

³⁴ Panyo to mia-mian Farisi notatae, “Kapala nu roh ma'idek aijo' na nombee'i Ia kuasa da molaa' to roh-roh ma'idek aijo'.”

³⁵ Sumo aijo' na i Yesus namba nonsongkohi sa'angu' na kota, namba i kota sangga'at, ka' lengkat mae i sa'angu' na kampung namba i kampung sangga'at. Ia nongajan i to lai-laigan pogalejaan, ka' noleleakon Lele Ma'ima' mongkona mosia na Tumpu Allah mompalentah sumo Tomundo'. Ia nompa'alin to mia-mian anu mongepe iwi-iwi' na ngahan nu panyakit, ka' anu madi' sampa' na butongnyo.

³⁶ Tempo'nyo i Yesus nontoa mian da'isan aijo', ia nolibosmo hi aha, kalana aha ilingumo ka' madi'mo moko ala sumo domba anu madi'mo ko polaya'nyo.

³⁷ Lantas i Yesus notatae hi anu saja' mombatuki Ia, “Anu o padak manjoo', panyo anu mompadak ola sangkiding.

³⁸Kalana aijo' poita hi tumpu nu ale' aijo', da ia monsai mae anu mompadak padakonnyo.”