Read Saluan MARKUS 10 Bible Online

MARKUS 10 - Saluan bible

MARKUS 10

¹Lapas aijo' i Yesus nompala'imo tampat aijo', ka' aha nokiijo'mo i tano' Yudea ka' i tano' santoa nu Kaunyo Yordan. Mian da'isan tinoka mule' sinihuk montikubi Yesus. Ka' sumo biasanyo i Yesus nongajan aha.

²To pia-piangkuka na mian nu Farisi tinoka mule' da molio-lio kasala'an i Yesus. Aha nompokilawa, “Koonyo nu hukum nu agamanto, pa' timbali na mian mongga'atakon bengkele'nyo?”

³Tinaaman i Yesus, “I Musa nombee'i palentah apaa hi komiu?”

⁴ “I Musa nompoloas mian mongga'atakon bengkele'nyo, asan montulis sulat poga'atan pe'e,” tinaaman nu aha.

⁵“I Musa nontulis palentah aijo' kalana komiu talalo susa' na o ajan,” koo-Nyo i Yesus hi aha.

⁶ “Panyo i momonanyo, tempo'nyo Tumpu nompotimbalimo mian, tinaloakonnyo tukoonyo, ‘Tumpu nompotimbali aha mo'ane ka' boune.

⁷ Aijo' na sababnyo mo'ane mompala'i tina tuumanyo ka' mosa'angu' tiba bengkele'nyo,

⁸sahingga ua-ua'aha timbalimo sa'angu'.’ Jadi aha misa'mo ua'aha, panyo memo sa'angu'.

⁹Aijo' na sababnyo, apaa na anu pinosa'angu'mo nu Tumpu Allah, madi' timbali oga'atakon nu mian!”

¹⁰Salatan aha ninsoop i laigan, anu saja' mombatuki Ia, nompokilawama hi Yesus mongkona han aijo'.

¹¹ I Yesus notatae hi aha, “Ihe na anu mongga'atakon bengkele'nyo lantas mo'osoa tiba boune sangga'at, mian aijo' masala' hi bengkele'nyo anu momona aijo'.

¹²Sumo aitu mule' na boune mongga'atakon langkainyo lantas mo'osoa tiba mo'ane sangga'at, ia mule' masala'!”

¹³Daagi' ko to mia-mian anu nomboa to ana-anak hi Yesus da nu panya ka' nu balakati na aha. Panyo anu saja' mombatuki Yesus nontambuha'imo mian haha aijo.

¹⁴Montoa han aijo', i Yesus pinusa lantas Ia notatae hi anu saja' mombatuki Ia, “Pojohok da to ana-anak aijo' toka hi beleng-Ku! Boli montewa' aha, kalana to mia-mian anu susumo aiya na timbali minsoop mian anu palesayamo hi Tumpu.

¹⁵ Inau'mo na aiya! Ihena madi' mangadap hi Tumpu sumo samian na anak, madi' timbali minsoop mian anu palesayamo hi Tumpu.”

¹⁶Lapas nontaloakon sumo aitu, i Yesus nontangkungmo anak haha aijo', lapas aijo' Ia nompotiikmo lima-Nyo hi aha toto samian ka' nombalakatimo aha.

¹⁷Tempo'nyo i Yesus daagi' molausakon lumambaanannyo, samian tinokamo mae popoopadeka' hi Yesus. Mian aijo' nonsombah i ahop hi Yesus ka' nompokilawa, “Gulu' anu manonong, aku tionyo mombau apaa da mohumpak kantumuu'an talakana' toka sidu-sidutu'?”

¹⁸“Kadaka' beleyum montaloakon Aku talalo ma'ima'?” pinokilawa i Yesus. “Madi' ko anu ma'ima', sambiha'nyo Tumpu Allah.

¹⁹ Beleyum nonsumbu'mo palentah-palentah nu Tumpu, ‘Boli mompatei, boli masala', boli montomang, boli bau sakisi baleko', boli mongakali, adati na tuuma tinaum.’ ”

²⁰“Tuumangku Gulu',” koonyo nu mian aijo', “iwi-iwi' palentah aijo' noko batukankumo daagi' pe'e olitau.”

²¹I Yesus noliibosmo na nontoa mian aijo' lantas notatae, “Me sa'angu' na han mule' anu daagi' opalalui nu beleyum. Lako'mo pobaluk iwi-iwi' na halata'um; bee' na doinyo hi mian anu kasiasi, ka' beleyum mohumpakje halata' i suluga'. Lapas aijo' tokaje mae mombatuki Aku.”

²²Nohongo i Yesus notatae sumo aijo', mian aijo' ingise'-ise'mo, lantas nompala'imo tampat aijo' ka' sinusa'mo na kinyonyoa, kalana ia talalo kaya.

²³Sahingga i Yesus nontoa hi anu saja' mombatuki Ia, ka' notatae hi aha, “Susa' hondo na mian kaya timbali minsoop mian anu palesayamo hi Tumpu!”

²⁴Anu saja' mombatuki Ia, binangang na nohongo potatae i Yesus aijo'. Panyo i Yesus notatae mule', “To ana-anaku, memang susa' na timbali minsoop mian anu palesayamo hi Tumpu!

²⁵Lebe dengke sa'angu' na unta minsoop i lulu nu paka'ut de mule' samian na anu kaya minsoop i Dunia Bu'ou nu Tumpu.”

²⁶Potatae i Yesus aijo' mombau anu saja' mombatuki Ia da binangang, sahingga aha mompaha poki-pokilawamo samian ka' sangga'at, “Desumo aijo', ihena moko ala timbali salamat?”

²⁷I Yesus nontoa aha ka' nontaami, “De hi mian aijo' madi' opoko ala, panyo de hi Tumpu; iwi-iwi' opoko ala nubau nu Tumpu.”

²⁸Lantas i Petrus notatae, “Toamo, kami nompala'imo apa-apaa da mombatuki kita Tuuma.”

²⁹Koonyo i Yesus, “Palesayamo: Mian anu nompala'imo auwannyo, kabai utusnyo mo'ane, kabai boune, kabai tinanyo, kabai tuumanyo, kabai to ana-anaknyo, kabai pe'e sawah ale'nyo kalana Aku ka' kalana Lele Ma'ima' lengkat mae hi Tumpu,

³⁰mian aijo' montalimaje lebe manjoo' i tempo' u'uka aiya. Ia mohumpakje pinsa'atu lebe manjoo', utus mo'ane, utus boune, tina, to ana-anak, sawah ale'nyo, — ka' osakisa mule'. Ka' tempo' saidi'mae, mian aijo' montalimaje kantumuu'an ma'ima' toka sidu-sidutu'.

³¹ Panyo da'isan na mian u'uka aiya anu tongkoimoona timbali tongkoimihi, ka' manjoo' na tempo' aiya anu tongkoimihi timbali tongkoimoona.”

³²I Yesus ka' anu saja' mombatuki Ia, hau-haunyo i uno nu lumambaanan mokiijo' i Yerusalem. I Yesus lumajang namba i moona, ka' anu saja' mombatuki Ia iwi-iwi' i hentemo. Ka' to mia-mian anu mombatuki aha aitu mae i mihi mongoa'i nabuhukmo. Lapas aijo' i Yesus nolaga mule' anu saja' mombatuki Ia, ola posi aha ka' nompoto'i hi aha na anu timbali i butong-Nyo saidi'mae.

³³“Hongomo”, na koo-Nyo, “kita u'uka hau-haunyo mokiijo'mo i Yerusalem. Kiijo' mae Anak nu Mian obee'mo hi to kapa-kapala nu imam ka' to gulu-gulu' agama. Ia o hukumo mate; lapas aijo' obee'mo hi to mia-mian anu misa' Yahudi.

³⁴Aha mompopo'ambang Ia, montupe'i Ia, monsakisa Ia, ka' nonsalib Ia. Panyo i sinaa ko totolu'nyo, Ia po'ule'mo tumuu'.”

³⁵Lantas i Yakobus ka' i Yohanes, aijo'mo to ana-anak i Zebedeus, tinokamo hi Yesus. “Tuumangku Gulu',” koonyo nu aha, “daagi' ko sa'angu' na han anu okahanda'i mami obauakon nu kita Tuuma hi kami”.

³⁶“Apaa na okahanda'i miu da Kubauakon hi komiu?” pinokilawa i Yesus.

³⁷Tinaaman nu aha, “Kami mongka'oho' sumuhang i koanan ka' i kowi nu kita Tuuma, de kita Tuuma sumuhangmo i kasuhangan anu talalo opopodaka'.”

³⁸ “Komiu madi' monsumbu' apaa na anu pinoita miu”, koonyo i Yesus hi aha, “Opoko ala miu na monginum i galas kasansalaan anu Ku inum saidi'mae, ka' minsoop i uno nu kasansalaan anu Ku pinsoopi?”

³⁹“Opoko ala”, tinaaman nu aha. Sahingga i Yesus notatae mule' hi aha, “Memang komiu monginumje i galas kasansalaan anu saidi'mae Ku inum, ka' minsoop i uno nu kasansalaan anu Ku pinsoopi.

⁴⁰Panyo mongkona ihena anu sumuhang i koanan kabai i kowing-Ku, aijo' misa' Aku na ko hak montantukan. Tumpu na montantukan ihehemo na anu sumuhang i tampa-tampat aijo'.”

⁴¹Tempo'nyo sampulu' na anu saja' mombatuki Yesus anu sangga'atannyo aijo' nohongo han aijo', aha pinusamo hi Yakobus ka' hi Yohanes.

⁴² Jadi i Yesus nolaga aha iwi-iwi' lantas notatae, “Komiu monsumbu' saba' to pola-polaya' bansa anu madi' monsumbu' Tumpu Allah monsansalai miannyo. Ka' to mia-mian daka' nu aha mongkabisa'i aha.

⁴³ Panyo komiu madi' timbali sumo aijo'! Sumo aitu mule', mian anu mongka'oho' timbali daka' atina' hi komiu, ia tionyo timbali posaihonnu belemiu.

⁴⁴Ka' mian anu mongka' oho' tongkoimoona atina' hi komiu, tionyo timbali posaihon hi aha iwi-iwi'.

⁴⁵Kalana Anak nu Mian mule' madi' toka da obee'i apa-apaa na kapalaluan-Nyo. Ia toka da mombee'i apa-apaa ka' da mombee' nyawa-Nyo pompobebas mian da'isan.”

⁴⁶Aha tinoka i Yerikho. Ka' tempo'nyo i Yesus tiba anu saja' mombatuki Ia tiba mian da'isan nompala'imo kota aijo', samian na anu mapisok hau-haunyo suha-suhang lewa' momoita i sambiha' nu jalan. Sanggonyo i Bartimeus, anak i Timeus.

⁴⁷Salatan ia nohongo saba' anu hau-haunyo notulu aijo' i Yesus, mian nu Nazaret, ia noloboo'mo, “Yesus, Anak i Daud! Kalibosi mae na aku!”

⁴⁸Ia tinambuha'an nu mian da'isan, ka' tinewa'nyo momohokot. Panyo ia noloboo' daka-daka', “Anak i Daud, kalibosi mae na aku!”

⁴⁹Sahingga i Yesus tinolotinjo lantas notatae, “Lagamo mae na ia.” Jadi aha nolaga mian mapisok aijo'. Aha notatae hi ia, “Boli hengge'! Beleyum ilagamo i Yesus, tinjomo!”

⁵⁰Mian mapisok aijo' mule' nongalin jubahnyo, lantas nalia-lia' ia tinuminjo ka' namba hi Yesus.

⁵¹“Apaa na nuka'ima'i Kubau hi beleyum?” koonyo i Yesus hi ia. Mian mapisok aijo' nontaami, “Tuumangku Gulu', aku mongkahanda'i montoa.”

⁵²“Lako'mo”, koonyo i Yesus, “kalana beleyum palesaya hi beleng-Ku, beleyum ma'alinmo.” Tempo'nyo aitu, mian aijo' tinimbalimo nontoa. Lantas ia nombatukimo Yesus i jalan.