Read Saluan MARKUS 11 Bible Online

MARKUS 11 - Saluan bible

MARKUS 11

¹Tempo'nyo mongohanimo Yerusalem, aha tinokamo i kota' Betfage ka' i Betania, i tengke nu Bungkutnyo nu Zaitun. I kiijo' ua'aha na mian anu saja' mombatuki Ia sinaimo i Yesus namba imoona.

²“Lako'mo mokiijo' i kampung anu o ahopintomo aijo',” koonyo i Yesus hi aha. “Salatan komiu minsoopmo i kampung aijo', komiu montoa sa'angu' na anak nu keledai hau-haunyo pinosegot, anu ma'isa toho' sinake'an nu mian. Bukai mae na keledai aijo' ka' boamae.

³Ka' de ko mian anu mompokilawa hi komiu, apaa na sababnyo komiu mombukai keledai aijo', taloakon, ‘Tumpu mompalaluimo, ka Ia malia-lia'je po'ule' monsule'akon mae.’ ”

⁴Ua-ua'aha anu saja' mombatuki Yesus aijo' namba, ka' nontokai sa'angu' na anak nu keledai hau-haunyo sinegot i tumban nu laigan i sambiha' nu jalan. Sahingga aha nombukaimo keledai aijo'.

⁵To mia-mian anu tinjo-tinjo kiijo' nompokilawa hi aha, “Hee, momposiamo na komiu? Kadaka' mombukai anak nu keledai aijo'?”

⁶Tinaaman nu aha, sumo apaa na anu tinaloakonmo i Yesus hi aha. Sahingga mian haha aijo' nompojohokmo aha momboa keledai aijo'.

⁷Salatan tinokamo hi Yesus, tonga' nu keledai aijo' i latasan nu aha nu jubah nu aha, lantas i Yesus sinumake'mo i tonga'nyo.

⁸Da'isan na mian nompolatas jubah nu aha i jalan, daagi' mule' ko anu monsagakon i totonga' nu jalan to panga-panga' ise' anu ingala mae nu aha i ale'.

⁹ To mia-mian anu lumajang mamba imoona ka' to mia-mian anu mombatuki lengkat i hiku iwi-iwi' molo-moloboo', “Puji'mo na Tumpu! Obalakatiakon na ia anu tinoka tiba sanggo nu Tumpu!

¹⁰Higahiyakon na kapalentahan-Nyo anu tokaje mae — pamalentahan i Daud mompolee'to! Puji'mo na Tumpu Anu Matangkas na Kuasa-Nyo!”

¹¹Ahennyo i Yesus tinoka i Yerusalem, lantas ninsoop i Laigan nu Tumpu. I kiijo' Ia nompalahatikan titikub-Nyo. Panyo kalana ohanimo pikat, Ia nambamo nokiijo' i Betania nohingga-hinggat tiba aha sampulu' ka' ohua' na anu saja' mombatuki Ia.

¹²Dodododopnyo, salatan aha hau-haunyo lumajang nosabatmo lengkat i Betania, i Yesus no'ohopmo.

¹³Daagi' majo'on Ia nontoamo sampu'un na kau' ara, hoonnyo talalo booko'. Jadi Ia namba i pu'unnyo aijo' da montoa pa' ko bua'nyo. Panyo salatan Ia tinoka i pu'unnyo aijo', Ia madi' nontoa apa-apaa, sambiha'nyo to ho-hoonnyo, sabab tempo'nyo aitu ma'isa pe'e tempo'nyo mimbua' na kau' ara.

¹⁴Lantas i Yesus notatae i pu'unnyo aijo', “Mulai tempo' u'uka madi'mo daagi' ko samian na anu mongkaan bua'um!” Anu saja' mombatuki Yesus nohongomo potatae aijo'.

¹⁵Salatan aha tinokamo i Yerusalem, ka' i Yesus namba mule' i Laigan nu Tumpu. I kiijo' Ia nontampu'uni nolaa' iwi-iwi' na mian anu mobaluk ka' mongoli i tampat aijo'. Ia nombali-balikakon to meja-meja' nu anu montolosi doi, ka' to kasu-kasuhangan nu anu mompobaluk tomonsi' malapati.

¹⁶Ka' madi' ko samian pe'e na pinoloas-Nyo momboa apa-apaa motulu natan nu Laigan nu Tumpu aijo'.

¹⁷ Lapas aijo' i Yesus nongajanmo to mia-mian i kiijo'. Ia notatae, “I uno nu Kitab nu Tumpu tinulis sumo u'uka: Tumpu notatae, ‘Laiganku osanggohi laigan tampat balado'aan nu iwi-iwi' bansa'.’ Panyo komiu mompotimbali petaa nu tololang!”

¹⁸To Kapa-kapala nu imam ka' to gulu-gulu' agama nohongo potatae aijo'. Sahingga aha nontampu'unimo nolio jalan da mompatei Yesus. Aha nabuhuk hi Ia, kalana iwi-iwi' na mian bangang na mohongo ajalan-Nyo.

¹⁹Ohanimo pihi, i Yesus ka' anu saja' mombatuki Ia nambamo nompala'i kota' aijo'.

²⁰Dodododopnyo daagi' subu-subu, tempo'nyo aha notulu i kau' aijo', aha nontoa kau' ara aijo' inanggasmo toka i baka-bakatnyo.

²¹Lantas i Petrus tinolo inau' i kajadian sansinaan anu ma'isa pe'e han aijo' jinadi. Sahingga i Petrus notatae hi Yesus, “Tuumangku Gulu', soba toa! Kau' ara anu kinutukan nu kita Tuuma, i nanggasmo!”

²²Tinaaman i Yesus, “Palesayamo hi Tumpu.

²³ Totu'u komiu moko potatae i bungkutnyo aiya, ‘Polalin ka' pokaiyong i ambai!’ Jadi han aijo' timbali obau miu; asan komiu madi' bata-bata, ka' komiu palesaya saba' apaa na anu otaloakon miu aijo' totu-totu'u timbali.

²⁴Kalana aijo' inau' na aiya: De komiu balado'a ka' mompoita apa-apaa, palesayamo saba' Tumpu nombee'imo hi komiu apaa na anu opoita miu, sahingga komiu montalimamo.

²⁵ Ka' de komiu balado'a, panyo kinyonyoaum madi' sanang hi samian ka' samian, ampuni pe'e na mian aijo', da Tuumaum i suluga' mule' mongampuni dosa-dosa'um. [

²⁶De komiu madi' mongampuni mian sangga'at, Tuumaum anu i suluga' madi' mongampuni dosa-dosa'um.]”

²⁷Aha ninsusule' mule' i Yerusalem. Ka' tempo'nyo i Yesus ilumajang monsongkohi uno nu Laigan nu Tumpu, kapala nu to imam-imam, gulu-gulu' agama, ka' to pola-polaya' nu Yahudi tinoka hi Ia.

²⁸Aha nompokilawa, “Apaa na bau pintoongan nu Beleyum mombau anu iwi-iwi' aiya? Ihee na nombee' hak aijo' hi Beleyum?”

²⁹Tinaaman i Yesus, “Aku mule' kahanda' mompokilawa hi komiu. Taami ka' Aku montaloakonje hi beleyum tiba hak ihena Aku mombau hahan aiya.

³⁰I Yohanes mompalamandikan tiba hak ihe, Tumpu kabai mian?”

³¹Lantas to kapa-kapala nu imam, ka' to pola-polaya' nu Yahudi nontampu'unimo mombisalaakon i totonga' nu aha. Aha notatae, “De kita montaloakon, ‘Tiba hak nu Tumpu,’ Ia tantu montaloakon, ‘Kadaka' komiu madi' palesaya hi Yohanes?’

³²Panyo susa' hondo na motatae, ‘Tiba hak nu mian.’ ” Kalana aha mabuhuk hi mian da'isan, kalana iwi-iwi' na mian monsangka i Yohanes samian na nabi.

³³Jadi, tinaaman nu aha, “Kami madi' monsumbu'.” Lantas i Yesus notatae hi aha, “Desumo itina', Aku suele madi' mompoto'i hi komiu, tiba hak ihe na Aku mombau iwi-iwi' aiya.”