Read Saluan MARKUS 12 Bible Online

MARKUS 12 - Saluan bible

MARKUS 12

¹ Lapas aijo' i Yesus nontampu'unimo notatae nu kantuang hi to kapa-kapala nu imam, to gulu-gulu' agama ka' to pola-polaya' nu Yahudi. I Yesus notatae, “Daagi' ko samian anu nonsu'ani sa'angu' na ale' nu anggur, lantas nompagan titikub. Lapas aijo' ia nongkeke bolo' da bau pompetian anggur, lantas ia nompotinjo sa'angu' na laigan bau pontamongian. Lapas aijo' tinamboakonnyomo na ale' nu anggur aijo' hi to pia-piangkuka na anu mokalaja, lantas nambamo i kampung sangga'at.

²Salatan tinoka i tempo'mo nu pontipuan bua' nu anggur, mian aijo' nonsaimo samian na posaihon mamba hi anu mokalaja ale' aijo', da montalima bahagiannyo.

³Panyo anu mokalaja aijo' nohakop posaihon aijo'. Lapas aijo' dinoke nu aha, lantas nonsai ia ninsusule' tiba madi' ko anu binee'nyo.

⁴Lantas tumpu nu ale' aijo' nonsai mule' samian na posaihonnyo sangga'at. Panyo anu mokalaja aijo' nondoke ubak nu posaihon aijo', lantas nolaa' ia ka' nontange-tanggele.

⁵Tumpu nu ale' aijo' nonsai mule' samian na posaihon anu sangga'at. Panyo pinatean nu aha na posaihon aijo'. Ka' sumo aitumo na aha saja' nombau da'isan na posaihon sangga'at suele: daagi' ko anu dinoke ka' daagi' mule' ko anu pinatean.

⁶Ihe mule' na anu timbali osai nu tumpu nu ale' aijo'? Me ahi' samian, aitumo posi anaknyo anu nunu kalibosi. Jadi ahennyo ia nonsai anaknyo aijo' hi anu mokalaja aijo'. ‘Tantu anaku o angga'i,’ na tinutugannyo.

⁷Panyo anu mokalaja aijo' notatae samian ka' samian, ‘Aiyamo na ia lee' nu tumpuionnyo. Imbo' da opateinto na ia, da pusaka'nyo kita na mohumpak!’

⁸Sahingga anak aijo' i hakop, lantas pinatean. Bangke'nyo ingalin nu aha i sambiha' nu ale' aijo'.”

⁹Lantas i Yesus nompokilawa, “Apaa na anu nubau nu tumpu nu ale' aijo'? Tantu ia toka ka' mompatei anu mokalaja aijo', lantas mombee' ale' aijo' hi anu mokalaja sangga'at.

¹⁰ Komiu tantu nombasa'mo ayat aiya i uno nu Kitab nu Tumpu Allah, ‘Batu anu madi' opake nu anu mombau bangunan tinimbalimo batu anu talalo opalalui.

¹¹Aiyamo na anu nubau nu Tumpu; palias na ko ima'nyo!’ ”

¹²Sahingga to tu'a-tu'anyo nu bansa Yahudi anu nohongo kantuang aijo', mompagala mohakop i Yesus, kalana nusumbu' nu aha na kantuang aijo' nupatuakon i Yesus hi aha. Panyo aha mabuhuk hi mian da'isan. Jadi aha nambamo nompala'i Yesus.

¹³To pia-piangkuka na mian nu Farisi ka' to pia-piangkuka na mian gampa mae i Herodes sinai mompoki-pokilawa kahanda' monsobai Yesus da ohumpak na kasala'annyo.

¹⁴Aha tinoka hi Yesus ka' notatae', “Tuumangku Gulu', osumbu' mami kita Tuuma madi' tageo', ka' madi' montoa pikilan nu sangga'at. Kita Tuuma mongajan anu sahondo-hondonyo mongkona kahanda' nu Tumpu hi mian, kalana kita Tuuma madi' mompile'i mian. Yoh, soba taloakonmo mae nu kita Tuuma hi kami, ‘De mombatuki atulan nu agamanto, pa' timbali na kita mombayan hasin hi Tomundo, kabai madi'? Tionyo na kita mombayan hasin aijo' kabai madi'?’ ”

¹⁵I Yesus monsumbu' kabaleko'an nu aha. Ia nontaami, “Apaa na sababnyo komiu kahanda' monsobai, molio kasala'an-Ku? Soba potoamae hi beleng-Ku sa'angu' na doi salaka.”

¹⁶Sahingga aha nombee' hi Ia sa'angu' na doi salaka. Lantas i Yesus nompokilawa, “Gambalan ka' sanggo ihena aiya?” “I Tomundo”, tinaaman nu aha.

¹⁷“Yoh, desumo atina',” koonyo i Yesus, “bee'mo hi Tomundo apaa na anu i Tomundo, ka' hi Tumpu apaa na anu nu Tumpu Allah.” Aha binangang na nohongo Ia.

¹⁸ To pia-piangkuka na mian anu lengkat mae gampa nu Saduki tinoka hi Yesus. (Aha gampa anu ko pikilan tukoonyo, saba' mian mate madi'mo po'ule' tumuu'.)

¹⁹ “Tuumangku Gulu',” koonyo nu aha hi Yesus, “I Musa nontulis atulan aiya mongkona kita: ‘De samian na mo'ane silaka ka' ia madi' ko anak, saba' utusnyo tionyo mongosoai balunyo, da ko lee' na mian anu sini-sinilakamo aijo'.’

²⁰Daagi' toho' ko aha popitu' na moto utus. Anu tumpe no'mo'osoa, lantas sinilaka madi' kino anak.

²¹Lapas anu ko ohua'nyo no'osoamo tiba balunyo, panyo ia mule' sinilaka madi' kino anak. Han anu sumo aitu mule' tinimbali hi utusnyo anu ko totolu'nyo,

²²ka' kino toka-tokanyo i ko popitu'nyo. Imihinyo boune aijo' sinilaka suele.

²³I sinaa nu mian silaka po'ule'mo tumuu', bengkele' ihena boune aijo'? Kalana aha popi-popitu' nomongosoaimo ia!”

²⁴Tinaaman i Yesus, “Komiu sala' hondo. Kalana komiu madi' mangalati' i Kitab nu Tumpu, sumo aitu mule' kuasa nu Tumpu Allah.

²⁵Kalana de to mia-mian silaka po'ule'mo tuumu', aha madi'mo po'ule' mo'osoa, panyo aha tumuu'mo sumo malaikat i suluga'.

²⁶ Ka' mongkona mian silaka po'ule' opotumuu', pa' ma'isa toho' nombasa' i uno nu kitab i Musa mongkona kumbung anu i noak aijo'? I uno nu to ayat-ayat aijo' tinulis saba' Tumpu notatae hi Musa, ‘Akumo na Tumpu i Abraham, Tumpu i Ishak, ka' Tumpu i Yakub.’

²⁷Tumpu aijo' misa' Tumpu nu mian mate. Ia Tumpu Allah nu mian anu tumuu'. Komiu sala' hondo!”

²⁸ Lantas tinoka na samian gulu' agama mompotombihing anu obisalaakon i Yesus tiba to mia-mian anu lengkat mae i gampa nu Saduki aijo'. Gulu' agama aijo' nontoa saba' i Yesus nontaamimo mian haha aijo' ma'i-ma'ima'. Sahingga ia nompokilawa hi Yesus, “Palentah iya na anu talalo penting molingkudui iwi-iwi' na palentah?”

²⁹ Tinaaman i Yesus, “Palentah anu momoona, aijo'mo: ‘Hongomo, komiu bansa Israel! Tumpunto, Tumpu aijo' ola sa'a-sa'angu'nyo.

³⁰Kalibosi na Tumpuum totu-totu'u na kinyonyoaum, tiba iwi-iwi' na butongum ka' tiba iwi-iwi' nu kapandeanum.’

³¹ Palentah ko ohua'nyo aijo'mo: ‘Kalibosi na sangalu miu, sumomo beleyum mongkalibosi posi butongum.’ Madi'mo daagi' ko palentah sangga'at anu talalo penting, panyo olamo ahi' anu ohua' na palentah aijo'.”

³² Lantas Gulu agama aijo' notatae hi Yesus, “Konamo hondo, Tuumangku Gulu'! Memang totu'u apaa na anu tinaloakon nu kita Tuuma: Tumpumo na Tumpu anu sa'a-sa'angu'nyo, ka' madi'mo daagi' ko Tumpu anu sangga'at.

³³ Ka' mian tionyo mongkalibosi Tumpu tiba iwi-iwi' na kinyonyoa, ka' tiba iwi-iwi' na kapandeannyo, tiba iwi-iwi' na kahosonannyo. Ka' ia mule' tionyo mongkalibosi sangalunyo sumomo posi butongnyo. Aijo' lebe ma'ima' de me mule' mompalasombahkon palasombahan anu opapui ka' palasombahan-palasombahan sangga'atannyo hi Tumpu.”

³⁴Tinoa i Yesus saba' gulu' agama aijo' nontaamimo ma'i-ma'ima' hondo. Ka' i Yesus notatae hi ia, “Beleyum malia'mo timbali minsoop mian anu palesayamo hi Tumpu.” Lapas aijo', madi'mo ko samian na baani nomompokilawa apa-apaa hi Yesus.

³⁵Hau-haunyo mongajan i Laigan nu Tumpu, i Yesus nompokilawamo, “Mosia na to gulu-gulu' agama moko ala montaloakon tukoonyo, Tomundo anu Momposalamat aijo' lee' i Daud?

³⁶ Padahan posi i Daud — kalana binee'anmo balakat nu Tumpu Allah — notatae, ‘Tumpu, notatae hi Tumpungku: suhangmo i sasu koanan-Ku sampe Aku mombau to sampo-sampobali'-nu Belento minsuuluk hi Belento’.

³⁷Jadi, de i Daud monsanggo Tomundo' Pomposalamat aijo' ‘Tumpu’, mosiamo na Ia timbali lee' i Daud?” Mian da'isan anu kiijo' i Laigan nu Tumpu, sanaang na mohongo i Yesus mongajan.

³⁸Ia notatae hi aha, “Balajaga-jaga hi to gulu-gulu' agama. Aha mongka'ima'i kolalaajang tiba jubah anu mantan ka' mongka'ima'i otabea'i i to pasan-pasan.

³⁹Aha mongka'ima'i i tampa-tampat anu talalo ma'ima' i laigan pogalejaan, ka' i to lame-lamean.

⁴⁰Aha mongakali to balu-balu ka' mongagoi laigannyo. Ka' de mongkukubi ka'idekan nu aha aijo', aha balado'a manta-mantan. Aha montalimaje hukuman maboat!”

⁴¹Tempo'nyo sinumuhang mompaha ahop tiba peti' palasombahan i Laigan nu Tumpu, i Yesus nompalahatikan to mia-mian momposoop doi nu aha i uno nu peti' aijo'. Da'isan na mian kaya nomposoop manjoo' na doi;

⁴²lantas samian na anu balu tiba kasiasi tinoka suele. Ia nomposoop ohua' na doi tambaga, aitumo doi anu talalo ise' na halaga'nyo.

⁴³Sahingga i Yesus nolaga anu saja' mombatuki Ia ka' notatae, “Palahatikan na aiya: Balu anu kasiasi aijo' nomposoop i uno nu peti' aijo' lebe manjoo' tiba anu pinosoop nu iwi-iwi' na mian sangga'at.

⁴⁴Kalana aha iwi-iwi' mombee' labih nu halata'nyo. Panyo balu aijo' mau pe'e talalo kasiasi nombee'mo iwi-iwi' apaa na anu daagi' hi ia — aijo'mo anu nu palalui i kantumuu'annyo.”