Read Saluan MARKUS 13 Bible Online

MARKUS 13 - Saluan bible

MARKUS 13

¹Salatan i Yesus nompala'i Laigan nu Tumpu, samian na anu saja' mombatuki Ia notatae, “Tuumangku Gulu', soba toa na bangunan haha aijo'. Palahatikan na batu haha aijo'. Palias hondo na ko ima'nyo!”

²Tinaaman i Yesus, “Temisa' beleyum nontoamo bangunan anu daka' haha aijo'? Madi' ko sa'angu' pe'e na batu i bangunan haha aijo' na tasusun i tampatnyo. Iwi-iwi' o hobo'akon.”

³Lapas aitu i Yesus namba i Bungkut nu Zaitun, ka' sinumuhang i tampat anu mompaha ahop tiba Laigan nu Tumpu. Lantas i Petrus, i Yakobus, i Yohanes, ka' i Andreas tinoka hi Ia da basisik tiba Ia ola posi aha.

⁴“Tuuma, soba kita Tuuma poto'i mae hi kami,” koonyo nu aha hi Ia, “hipian na iwi-iwi' aijo' jadimo? Ka' tanda-tanda apaa na anu mompotingaan saba' tempo'nyo tokamo?”

⁵“Obala'ingati”, tinaaman i Yesus, “boli sampe komiu nu akali.

⁶Da'isan na mian anu tokaje mae mompake sanggong-Ku ka' notatae, ‘Akumo aiya na Ia!’ lantas mongakali da'isan na mian.

⁷De komiu mohongo lontup nu pahampatean ka' lele mahampate, boli mabuhuk. Han haha aijo' tionyo jadimo, panyo aijo' misa' alati'nyo au'aitu tempo'nyomo na kiamat.

⁸Bansa sa'angu' mahampate mongewa bansa sangga'at. Negara sa'angu' mahampate tiba negara sangga'at. Iyayamae timbali na luulu' ka' balaa' nu kapo'ohopan. Iwi-iwi' aijo' sala'je tampu'unannyo, sumo masakit anu o'oa'i nu samian na boune anu kahanda'mo monganak.

⁹ Komiu tionyo mombala'ingati, kalana komiu o hakop ka' o hela' mokiijo' hi anu momputusi hukuman. Komiu o boboti i to lai-laigan pogalejaan. Komiu oboa mangadap hi anu mongkuasai ka' hi to tomu-tomundo', kalana komiu anu saja' mombatuki Aku. Ka' aijo'mo na kasampatan hi komiu mombee'i katalangan mongkona Aku hi aha.

¹⁰Lele Ma'ima' lengkat mae hi Tumpu aijo' tionyo opolele pe'e hi bansa-bansa.

¹¹Ka' de komiu o hakop ka' oboa mokiijo' i pomputusian hukuman, boli bata-bata mongkona apaa na anu tionyo otaloakon miu. De tokamo na tempo'nyo motatae, taloakonmo apaa na anu pinoto'i hi komiu i tempo'nyo aijo' kalana potatae anu otaloakon miu, aijo' misa' posi potataeum, panyo toka lengkat mae i Roh nu Tumpu.

¹²Mian mongkabisa'i posi utusnyo da opatei. Aijo' suele timbali hi tuuma tiba anaknyo. To anak-anak mongewa tina tuumanyo, ka' mombee' aha da opatei.

¹³ Komiu nuka'ideki nu mian iwi-iwi', kalana komiu anu saja' mombatuki Aku. Panyo mian anu balatahan toka i mihinyo, oposalamat.”

¹⁴ “Komiu montoaje' ‘Ka'idekan anu Monsilakai’, tuminjo i tampat anu opoliwa' hi ia. (Pompotuka' hi anu mombasa': Palahatikan apaa na alati'nyo!) Tempo'nyo aitu mian anu jojoong i Yudea, tionyo malai mamba i i bungkutnyo.

¹⁵ Mian anu aita' i atop nu laigan, boli mintau' ka' minsoop i uno nu laigan mongala apa-apaa.

¹⁶Mian anu kiijo'mae i ale', boli minsusule' mongala jubahnyo.

¹⁷Palias na ko ideknyo sinaa tempo' aitu hi to boboune anu poboa ka' tina anu daagi' momposusu anaknyo.

¹⁸Balado'a da han haha aijo' boli timbali i tempo' nu ujan.

¹⁹ I sinaa ma'idek tempo' aitu daagi' ko kasusa'an anu ma'isa toho' tinimbali, salatanmo pe'e Tumpu nompotimbali dunia sampe tempo' u'uka, ka' madi'mo daagi' po'ule' timbali.

²⁰De Tumpu madi' mongkodo'i tempo' aitu, saba' madi' ko samian pe'e na anu salamat. Panyo kalana mian-Nyo anu palesayamo, Tumpu nomongkodo'imo tempo' aijo'.

²¹Tempo'nyo aitu de toto samian motatae hi komiu, ‘Toa, Tomundo' anu Momposalamat aijo' daagi' i aiya!’ kabai ‘Toa, Ia daagi' i kiijo'!’ — boli palesaya hi mian aijo'.

²²Kalana anu momposalamat bale-baleko' ka' to nabi-nabi baleko' tokamo saidi' mae. Aha mombau palabuatan-palabuatan anu talalo hondo daka', ka' hahan anu okabangangi bau pongakali de timbali, mian nu Tumpu suele.

²³Jadi, obala'ingati! Iwi-iwi' aijo' noko Poto'ingkumo hi beleyum ma'isa pe'e han aijo' timbali.”

²⁴ “Salatan tempo'mo nu kasusa'an aijo', batu nu sinaa timbalimo pikat, ka' bitu'on madi'mo daagi' minsahaya.

²⁵ To manda-mandala' manabu'mo lengkat i langit, ka' anu mongkuasai aita' i langa timbalimo kalangkabut.

²⁶ Tempo'nyo aijo' Anak nu Mian otoantoje na toka i uno nu sehu' tiba kuasanyo anu daka' ka' kamulia'annyo.

²⁷Ia monsaije to mala-malaikat molimu' mian anu pinile'an-Nyomo lengkat i opat na pasu'nyo nu dunia aiya, lengkat i puus nu dunia toka-toka i puus nu langit.”

²⁸“Alamo na pangajalan mongkona kau' ara. De to sumpe-sumpenyo mobilu'mo ka' monguha', ka' montampu'unimo minsumpe, komiu monsumbu'mo saba' tempo' nu posinaa ohanimo.

²⁹Sumo aitumo de komiu montoa han haha aijo' timbalimo, osumbu'mo miu saba' tempo'nyo ohanimo hondo.

³⁰Osumbu'mo! Iwi-iwi' na kajadian aiya saidi' mae timbali, ma'isa pe'e to mia-mian anu tumuu' tempo' u'uka aiya silaka iwi-iwi'.

³¹Langit ka' dunia lanyap, panyo potataeng-Ku tataap sidu-sidutu'.”

³² “Maumo sumo aitu, madi' ko samian pe'e na monsumbu' hipian na sinaanyo kabai hipian na jamnyo. To mala-malaikat i suluga' madi', ka' Anak pe'e madi' monsumbu', ola ahi' Tuuma na monsumbu'.

³³Jadi komiu tionyo balajaga-jaga ka' obala'ingati kalana komiu madi' monsumbu' hipian na tempo'nyo.

³⁴ Ka'ada'annyo sumomo anu mompala'i laigannyo, lantas mamba i tampat anu majo'on. Ia nonsai to posa-posaihonnyo montamongi laigannyo, ka' nombee'imo palentah hi aha toto samian. Hi aha anu montamongi pontumban, ia nompoto'i da balajaga ma'i-ma'ima'.

³⁵Kalana aijo' komiu tionyo balajaga-jaga, kalana komiu madi' monsumbu' hipian nu tumpu nu laigan aijo' po'ule' mae minsusule' — ugaat ohanimo malom, tonga' pahu, ugaat daagi' subuh, kabai ugaat bete'mo na sinaa.

³⁶De ia toka madi' osumbu-sumbu', boli sampe ia montokai mae komiu hau-haunyo hoyot.

³⁷Apaa na anu Ku taloakon aiya hi komiu, Ku taloakon suele hi iwi-iwi' na mian: balajaga-jagamo!”