Read Saluan MARKUS 14 Bible Online

MARKUS 14 - Saluan bible

MARKUS 14

¹ Daagi' uansinaa Sinaamo nu Paskah ka' Molame'akonmo Roti anu Madi' ko Raginyo. Kapala nu to imam-imam ka' to gulu-gulu' agama hau-haunyo molio jalan da mohakop i Yesus ka' madi' ko hengge-hengge' da o patei na Ia.

²“Panyo boli kita mombau aijo' i tempo' molame'akon,” koonyo nu aha, “kalana dumo timbali na ka'idekan”.

³ Salatan i Yesus daagi'mo i Betania, i laigan hi Simon anu u'utu mae sinansala nu panyakit kilit anu monsilakai, samian na boune tinoka hi Ia. Ia nomboa sa'angu' na boton pualam ko sinyo minya-minya' manohong anu mahan hondo, bakat anu manohong na binau. Tempo'nyo i Yesus hau-haunyo suha-suhang mongkaan, boune aijo' nongukap kolop nu boton aijo' ka' dinudu'akonnyo na minya-minya'nyo i buan nu ubak hi Yesus.

⁴To pia-piangkuka na mian anu i kiijo' notambuha'mo ka' notatae hi samian ka' samian, “Apaa na gunanyo minya-minya' aijo' ola o ide-idei?

⁵Minya-minya' aijo' de opobaluk, olinyo molabih tolu'atu na doi salaka, ka' doinyo obee' hi mian kasiasi!” Sahingga aha notambuha'mo hi boune aijo'.

⁶Panyo i Yesus notatae, “Pojohokmo na ia! Kadaka' komiu monsusa'i ia? Ia mombau apa-apaa anu ma'ima', ka' anu o puji' hi beleng-Ku.

⁷ Mian kasiasi saja' atina hi komiu. Madi' ko tempo'nyo de komiu mongka'oho'mo, komiu timbali montulungi aha. Panyo Aku madi' saja' tiba komiu.

⁸Boune aiya nombaumo apaa na anu timbali nu poko ala o bau. Ia nomposadiakonmo hi beleng-Ku minya-minya' manohong bau pongkubulan Aku mau ma'isa pe'e toka na tempo'nyo.

⁹Palesayamo! I songko-songko na dunia maumo iyayamae na Lele Ma'ima' lengkat hi Tumpu o leleakon, apaa na anu binaumo nu boune aiya saja' o sisik madi' okolilimi na ia.”

¹⁰Lantas i Yudas Iskariot, samian anu ninsoop sampulu' ka' ohua' na anu saja' mombatuki Yesus, namba hi kapala nu to imam-imam ko kahanda' da mongkabisa'i Yesus i ahop nu aha.

¹¹Aha sinanang hondo na nohongo poitaon aijo', ka' binajanji' mombee'ije doi hi Yudas. Sahingga i Yudas nontampu'unimo nolio tempo' mongkabisa'i Yesus.

¹²I sinaa momoonanyo i uno nu Molame'akon Roti anu Madi' ko Raginyo — tempo'nyo aitu mian mongkolot domba Paskah — anu saja' mombatuki Yesus nompokilawa hi Ia, “Iyamae na oka'ima'i nu kita Tuuma, kami momposadiakon kaanon nu Paskah hi Tuumangku?”

¹³Sahingga i Yesus nonsai ua'aha na mian lengkat hi aha, “Lako'mo mokiijo' i kota, kiijo' mae samian na mo'ane anu hau-haunyo momboa sa'angu' na selekan ko isinyo uee, mompaha kabotje tiba komiu. Batukimo na ia

¹⁴mokiijo' i laigan anu nu pinsoopi, ka' taloakon hi tumpu nu laigan aijo', ‘Tuumangku Gulu' nompokilawa, iyamae na tampat anu oposadiakon hi Ia ka' anu saja' mombatuki Ia mongkaan kaanon nu Paskah.’

¹⁵Mian aijo' mompotiju'je hi komiu sa'angu' na tampat i bawonyo anu ewa. Tampat aijo' tina'atunmo, sasadia tiba pakakasnyo. Posadiamo iwi-iwi' kiijo' mae bau kapalaluanto.”

¹⁶Lantas ua'aha na mian anu saja' mombatuki Yesus aijo' nambamo nokiijo' i kota. I kiijo' mae aha nontokai iwi-iwi' madi' sala' sumo anu tinaloakon i Yesus. Lantas aha mule' nomposadiamo kaanon nu Paskah.

¹⁷Pihi-pihinyo, i Yesus tinoka tiba sampulu' ka' ohua' na anu saja' mombatuki Ia.

¹⁸ Ka' hau-haunyo aha suha-suhang mongkaan, i Yesus notatae, “Hongo: samian anu aiya hi komiu, anu u'uka aiya mongkaan hingga-hinggat ka' Aku, daagi' ko anu mongkabisa'ije Aku.”

¹⁹Nohongo aijo', anu saja' mombatuki Yesus nolibosmo hondo. Lantas samian tiba samian nontampu'unimo nompokilawa hi Yesus, “Tantu misa' aku na anu kokoonto Tuuma?”

²⁰Tinaaman i Yesus, “Ia sala'samian lengkat hi komiu anu sampulu' ka' ohua' aiya, anu nongkaan sa'a-sa'angu' na lean tiba Aku.

²¹Memang Anak nu Mian mate sumo anu tinulis i uno nu Kitab nu Tumpu. Panyo palias na ko ideknyo mian anu mongkabisa'i Anak nu Mian aijo'! Sahanyo mian aijo', ia madi' pinohampe!”

²²Salatan aha hau-haunyo mongkaan, i Yesus nongala roti ka' nompoita talima kaseh hi Tumpu. Lapas aijo pinuge-puge-Nyomo na roti aijo' nu lima-Nyo, lantas binee'mo hi anu saja' mombatuki Ia ka' i hinggatannyo nu potatae, “Alamo ka' kaanmo, aiyamo na butong-Ku.”

²³Lapas aijo' ia nongala sa'angu' na galas nu anggur. Ia nompoita talima kaseh hi Tumpu, lantas nombee' galas aijo' hi anu saja' mombatuki Ia. Lapas aijo' aha iwi-iwi' nonginumo anggur aijo'.

²⁴ Lapas aijo' i Yesus notatae, “Aiyamo na baso'-Ku anu mompohoson palajanjian nu Tumpu, baso' anu binubusakon bau kapentingan nu mian da'isan.

²⁵Palesayamo: Aku madi'mo po'ule' monginum anggur aiya, sampe toka i tempo'nyo Aku monginum anggur anu bu'ou tiba komiu i Dunia Bu'ou nu Tuumang-Ku.”

²⁶Lapas aijo' i nyanyiakon nu aha na sa'angu' na nyanyian pompuji'. Ka' ilapas aijo' aha nambamo nokiijo' i Bungkutnyo nu Zaitun.

²⁷ Lapas aijo' i Yesus notatae hi aha, “Komiu iwi-iwi' malai mompala'i Aku. Kalana i uno nu Kitab nu Tumpu tinulis, ‘Tumpu mompateimo anu molaya' dombanyo, ka' sampahas na dombanyo mosungkehetmo.’

²⁸ Panyo salatan Aku po'ule'mo tumuu', Aku ka' komiu, Aku na mamba i moona mokiijo' i Galilea.”

²⁹“Madi',” tinaaman i Petrus, “Mau mule' aha iwi-iwi' mompala'i kita Tuuma, aku madi' sahondo-hondonyo.”

³⁰“Jaga,” koonyo i Yesus, “Pihimo aiya, ma'isa pe'e manuk mintutuhu' pinduan, beleyum pintolunmo na nombahakon Aku.”

³¹I Petrus nontaami totu-totu'u, “Pojohokmo da aku tionyo mate mohingga-hinggat tiba kita Tuuma, sahondo-hondonyo aku madi' motatae tukoongku aku madi' monsumbu' kita Tuuma!” Ka' anu saja' mombatuki sangga'at notatae sumo aijo' suele.

³²Aha tinoka i sa'angu' na tampat anu osanggohi Getzemani, ka' i Yesus notatae hi anu saja' mombatuki Ia, “Suhangmo aiya hau-haunyo Aku mamba balado'a.”

³³Lantas i Yesus nongendei Petrus, i Yakobus, ka' i Yohanes mamba hingga-hinggat tiba Ia. Ia nontampu'unimo nongoa'i moliibos ka' susa'.

³⁴“Kinyonyoang-Ku moliibos hondo,” koonyo i Yesus hi aha, “ku oa'i sumo anu mompai silakamo. Jojoongmo aiya ka' balajaga-jaga!”

³⁵I Yesus namba sangkiding majo'on lantas natidupumo i tano' ka' binalado'a. I uno nu do'a-Nyo pinoita-Nyo de timbali da Ia madi' mongoa'i kasansalaan aijo'.

³⁶“Tuuma, o Tuuma,” na koo-Nyo, “madi' ko apaa anu kulang hi kita Tuuma. Pojo'onakon na kasansalaan aiya hi beleng-Ku. Panyo boli mombatuki pongka'oho'-Ku, o ala ahi' i pongka'oho' nu kita Tuuma.”

³⁷Lapas aijo' i Yesus ninsusule', ka' nontokai anu saja' mombatuki Ia i hoyotmo. Ia notatae hi Petrus, “Simon, hoyot na beleyum? Ola sa'angu' na jam, beleyum madi' moko ala balajaga-jaga?”

³⁸Lantas i Yesus notatae hi aha, “Balajaga-jagamo, ka' balado'a da komiu madi' mohumpak soba'an. Memang roh miu mongka'oho mombau anu totu'u, panyo komiu madi' moko ala, kalana kalakuan nu mian aijo' madi' mahoson.”

³⁹Daagi' minsan na i Yesus namba binalado'a ka' montaloakon potatae anu pokakana.

⁴⁰Lapas aijo' Ia po'ule' ninsusule' hi anu saja' mombatuki Ia ka' nontokai aha sahoyotnyo, kalana aha talalomo namatatundu'. Sahingga aha madi'mo monsumbu' apaa na anu tionyo otaloakon nu aha hi Yesus.

⁴¹Salatan i Yesus ninsusule' hi aha kinopintolunnyo, Ia notatae, “Pa' daagi' komiu hoyot ka' milawe? Tinokamo na tempo'nyo Anak nu Mian obee'mo hi lima nu to mia-mian baladosa'.

⁴²Bulaamo, imbo' da kita mambamo. Toa! Mian anu mongkabisa' i Aku tinokamo!”

⁴³Hau-haunyo i Yesus daagi' motatae, tinokamo na i Yudas, gampa nu aha anu sampulu' ka' ohua' na anu saja' mombatuki Ia aijo'. Nohingga-hinggat tiba ia tinoka mule' da'isan na mian anu nomboa mae bajak ka' amangkun. Aha sinai mae nu kapala nu to imam-imam, to gulu-gulu' agama, ka' to pola-polaya' nu Yahudi.

⁴⁴Anu mongkabisa'i nontantukanmo sa'angu' na tanda hi aha. “Mian anu ku ooki,” na koonyo hi aha, “Iamo na mian-Nyo. Hakop na Ia ka' boa na Ia, ka' ojagai hondo-hondo.”

⁴⁵Tempo'nyo i Yudas tinoka, ia lau-laus namba hi Yesus ka' notatae, “Tuumangku Gulu'!” lapas aijo' ia nongookimo i Yesus.

⁴⁶Lantas to mia-mian anu tinoka nohingga-hinggat tiba i Yudas aijo' nohakopmo i Yesus ka' nompungu Ia.

⁴⁷Panyo sala'samian anu daagi' i kiijo' nongkeat bajaknyo ka' nontabas posaihon nu imam daka' sampe nosamping na bihingnyo.

⁴⁸Lantas i Yesus notatae hi aha, “Apaa Aku aiya mian ma'idek, sahingga komiu toka momboa mae bajak ka' amangkun bau mohakop Aku?

⁴⁹ Toka sansina sinaa Aku mongajan i Laigan nu Tumpu i ahop nu belemiu, ka' komiu madi' mohakop Aku. Panyo memang totu'umo tionyo sumo aijo', da timbali apaa na anu tinulis i uno Kitab nu Tumpu.”

⁵⁰Iwi-iwi' anu saja' mombatuki Ia nopadeka'mo nompala'i Yesus.

⁵¹Samian na olitau, anu ola nompake sambeak na hude pongkukubi butongnyo, nombatuki Yesus. Mian haha aijo' mongka'oho' mohakop ia,

⁵²panyo tinibahakonnyo na hudenyo aijo', lantas nopadeka'mo langgo-langgo'.

⁵³I Yesus binoa nokiijo' i laigan nu imam daka'. I kiijo' mae iwi-iwi' na kapala nu imam, polaya' nu Yahudi, ka' gulu' agama hau-haunyo balagombu.

⁵⁴I Petrus aijo' mae majo'on nombatuki Yesus sampe ninsoop i kintan laigan nu imam daka'. I kiijo' mae i sinumuhang minjohu ohani apu nohingga-hinggat tiba to sulu-suludadu.

⁵⁵Kapala nu to imam-imam, ka' iwi-iwi' na Mian Kopian Daka' nu Agama, mompagala molio to buku-bukuti' anu momposala' i Yesus da opokonai hukuman mate na Ia. Panyo aha madi' nohumpak sa'angu' pe'e na bukuti'.

⁵⁶Da'isan na sakisi anu ilaga da mombee' i katalangan anu madi' totu'u hi Yesus, panyo katalangan nu aha madi' pokakana hi samian ka' sangga'at.

⁵⁷Lantas to pia-piangkuka na sakisi tinuminjo ka' nombee'i katalangan anu madi' totu'u aiya mongkona i Yesus.

⁵⁸ “Kami nohongo mian aiya notatae, ‘Ku hobo'akon na Laigan nu Tumpu aiya anu binau nu mian, ka' lapas ko tolun sinaanyo, po'ule' Ku potinjo na sangga'at anu misa' mian na nombau.’ ”

⁵⁹Panyo katalangan nu mian haha aijo' mule' madi' pokakana samian ka' hi sangga'at.

⁶⁰Sahingga imam daka' tinuminjo i ahop nu aha iwi-iwi' ka' nompokilawa hi Yesus, “Apaa Beleyum madi' montaami anu pinobau-bau nu aha hi Beleyum?”

⁶¹Panyo i Yesus ola nomohokot. Ia madi' nontaami mau pe'e pa' apaa. Lantas imam daka' aijo' po'ule' nompokilawa minsan hi Ia, “Te Beleyum Tomundo' anu Momposalamat, Anak nu Tumpu anu talalo Susi'?”

⁶² “Akumo na Ia,” tinaaman i Yesus, “ka' komiu iwi-iwi' montoaje Anak nu Mian sumuhang i sasu koanan nu Tumpu Anu Talalo Susi' ka' toka mae i uno nu sehu' lengkat i langit!”

⁶³Sahingga imam daka' nombea-beak baju'nyo ka' notatae, “Madi' palalu ko sakisi!

⁶⁴ Komiu nosi hongomo potatae-Nyo anu momposala' Tumpu. Uuka apaa na kaputusan nu belemiu?” Aha iwi-iwi' nompotusimo i Yesus sala', ka' tionyo o hukum mate.

⁶⁵Lantas to pia-piangkuka na mian nontampu'unimo nontupe'i Yesus, ka' aha nongkukubi mata-Nyo ka' nondoke Ia, lantas notatae, “Soba tili'i, ihena nondoke Beleyum?” To sulu-suludadu suele nohapa'mo i Yesus.

⁶⁶Hau-haunyo i Petrus daagi aijo' i natan, sala'samian posaihon boune lengkat hi imam daka' tinoka i kiijo'.

⁶⁷Salatan nontoa i Petrus minjohu ohani i apu, lewa'mo tinonto'annyo ima-ima' na ohup i Petrus ka' notatae, “Te misa' beleyum suele mosangalu i Yesus mian nu Nazaret aijo'?”

⁶⁸Panyo i Petrus madi' mompototu'u. “Aku madi' monsumbu' ka' madi' mangalati' pa' apaa na koyum,” na koonyo hi posaihon aijo'. Lantas i Petrus namba nokiijo' i sabatan daka' nu laigan i imam daka' aijo'. [Tempo'nyo aitu manuk nintutuhu'mo.]

⁶⁹Posaihon boune aijo' nontoa i Petrus mule', ka' po'ule' notatae hi to mia-mian i kiijo', “Ia memang sala'samian gampa nu aha!”

⁷⁰Panyo i Petrus po'ule' madi' nompototu'u. Madi' pinin mule', to mia-mian i kiijo' po'ule' notatae hi Petrus, “Madi'mo daagi' opoko posuluk, beleyum memang sala' samian anu aijo' hi aha, kalana beleyum nolengkat mae i Galilea!”

⁷¹Lantas i Petrus nontampu'unimo binasumpa-sumpa' ka' notatae, “Aku madi' monsumbu' mian anu okahanda'i nu belemiu aijo'!”

⁷²Tempo'nyo aitu mule' manuk nintutuhu'mo ko pinduannyomo. Ka' i Petrus sininsumbu'mo kalana i Yesus notataemo hi ia, “Ma'isa pe'e manuk mintutuhu' ko pinduannyo, beleyum pintolunmo mombahakon Aku.” Sahingga i Petrus i humaangmo, kalana nolibosmo.