Read Saluan MARKUS 15 Bible Online

MARKUS 15 - Saluan bible

MARKUS 15

¹Daagi' subu-subu hondo, iwi-iwi Mian Kopian nu Agama ka' kapala nu to imam-imam, to pola-polaya' nu Yahudi ka' to gulu-gulu' agama nombisalakon lia-lia'. Aha nompungumo i Yesus, lapas aijo' binoa nu aha na Ia ka' binee' hi Pilatus.

²I Pilatus nompokilawa hi Yesus, “Totu'u Beleyum Tomundo' mian nu Yahudi?” “Sumo itina' potataeum,” tinaaman i Yesus.

³Kapala nu to imam-imam nombee'i katalangan mompobau-bau i Yesus manjoo' hondo.

⁴Lantas i Pilatus po'ule' nompokilawa hi Yesus, “Madi'mo Beleyum mongka'oho' montaami? Soba toa pa' piangkuka na konjoo'nyo na pompobau-bau nu aha anu pinoto'i nu aha mongkona Beleyum!”

⁵Panyo i Yesus madi' hondo daagi' nontaami, sahingga i Pilatus binangang.

⁶De tokamo na tempo'nyo molame'akon Paskah, saja' nu bau i Pilatus na monsabatakon samian na anu tinalungku' mombatuki anu nu pile'i nu mian da'isan.

⁷I uno nu talungku' daagi' ko anu tinalungku' kalana nangamu' nompatei tempo'nyo kinahengge'an, samian sanggonyo i Barabas.

⁸Mian da'isan binalagombu ka' mompoita hi Pilatus da monsabatakon samian na anu tinalungku' sumo anu saja' obau.

⁹I Pilatus nompokilawa hi aha, “Mongka'oho' na komiu, aku monsabatakon tomundo mian nu Yahudi aijo' da komiu sanang?”

¹⁰Kalana i Pilatus tinolo inau'mo saba' kapala nu to imam-imam nombee'mo i Yesus hi ia, kalana masakit na kinyonyoa nu aha.

¹¹Panyo kapala nu to imam-imam nonsale'i mian da'isan da mompoita hi Pilatus monsabatakon i Barabas da aha sanang.

¹²Sahingga i Pilatus notatae mule' hi mian da'isan aijo', “Desumo atina', apaa na tionyo kubau hi mian anu osanggohi miu tomundo' mian nu Yahudi aijo'?”

¹³Aha noloboo', “Salibmo na Ia!”

¹⁴“Panyo apaa na anu ma'idek hi Ia?” pinokilawa i Pilatus. Lantas aha noloboo' lebe mahoson mule', “Salibmo na Ia!”

¹⁵I Pilatus mongka'oho' momposanang mian da'isan aijo' sahingga ia nonsabatakon i Barabas da aha sanang. Lapas aijo' ia nonsai mian momboboti i Yesus, lantas nombee' Ia da o salibkan.

¹⁶I Yesus binoa nu to sulu-suludadu nokiijo' i laigan pomputusian, i laigan daka' nu Gubernur. Lapas aijo' iwi-iwi' na gombuan nu suludadu pinalentahkonmo da balagombu.

¹⁷Lantas aha nompo pusokmo jubah mingkamumu' hi Yesus, ka' nombau makota' panga-panga' anu ko hii'nyo na binau, lapas aijo' pinosoku'nyomo i ubak i Yesus.

¹⁸Lapas aijo' aha nontabea'imo Ia. “Soosa' Tomundo Mian nu Yahudi!” na koonyo nu aha.

¹⁹Aha nombongkukmo ubak i Yesus nu tokon, lantas tinupe'an nu aha na Ia ka' nonsoosa' i ahop-Nyo.

²⁰Pinoko kabiangan nu aha na i Yesus, aha nongukatakonmo jubah mingkamumu' aijo' lantas po'ule' pinopusokakon nu aha na posi baju-Nyo. Lapas aijo' sinabatakonmo nu aha na Ia da o salibkanmo.

²¹ I tonga' nu jalan aha nompakisamo samian da monsimbu salib i Yesus. Mian aijo' kakona anu sala'je lengkat mae i kampung mongkahanda'imo minsoop mokiijo' i kota. (Sanggonyo i Simon, — nolengkat mae i Kirene — tuuma i Aleksander ka' i Rufus.)

²²I Yesus binoa i sa'angu' na tampat anu sanggonyo Golgota alati'nyo: “Tampat nu popoke'.”

²³I kiijo' aha nompo'inumimo Ia anggur anu ko galo'nyo damak mano-manohong, panyo i Yesus madi' mongka'oho' monginum anggur aijo'.

²⁴ Lapas aijo' sinalibmo nu aha na Ia, ka' nombagi-bagi baju'-Nyo binauakon undi da montantukan bagi nu toto samian.

²⁵Pinonsalipan Ia aitu kinona i jam osio' daagi' subu.

²⁶Aita' i salib-Nyo pinokona na tulisan mompobau-bau Ia, aijo'mo: “Tomundo' Mian nu Yahudi.”

²⁷Nohingga-hinggat tiba i Yesus aha nonsalibkan mule' ua'aha na anu lewa' batololang; samian i sasu koanan ka' samian mule' i sasu kowi-Nyo. [

²⁸ Kalana sinumo aitumo sahingga jinadimo na anu tinulis i uno nu Kitab nu Tumpu aijo'mo: “Ia sinangkamo to mia-mian anu ma'idek”.]

²⁹ To mia-mian anu motulu i kiijo' ko lilo-lilokmo na ubak ka' montaloakon potatae mompopo'ambang i Yesus. Aha notatae, “Ee, Beleyum na anu mongka'oho' mongidei Laigan nu Tumpu, ka' po'ule' mompotinjo ola i uno nu tolun sinaa.

³⁰Soba pintau'mae lengkat i salib atina' ka' posalamat na butong-Um!”

³¹Sumo aitu mule' na kapala nu to imam-imam ka' to gulu-gulu' agama mompopo'ambang i Yesus. Aha notatae samian ka' sangga'at, “Ia momposalamat mian sangga'at, panyo posi butong-Nyo madi' nu poko posalamat!

³²De Ia Tomundo' nu Israel, Tomundo' anu Momposalamat, soba uuka aiya Ia mintau' mae lengkat i salib aijo' da kami montoa ka' palesaya hi Ia!” To mia-mian anu sinalib hingga-hinggat ka' i Yesus suele nompopo'ambangmo i Yesus.

³³Sonsu-sonsu'un na sinaa, totolu' na jam na kinopinnyo, songko-songko na lipu' aijo' pinikatmo.

³⁴ Ka' i jam totolu'mo mamalom, i Yesus noloboo'mo hoso-hoson nu potatae, “Eloi, Eloi, lama sabakhtani?” anu alati'nyo, “O Tumpungku, Tumpungku, kadaka' Belento mompala'imo aku?”

³⁵To pia-piangkuka na mian i kiijo' anu nohongo Ia tinolo sape aijo', aha notatae, “Hongo, Ia molaga i Elia!”

³⁶ Samian anu aijo' hi aha nalia-lia' namba nongala bunga gahanggan, lantas pinolobongnyo i uno nu anggur malosing. Lapas aijo' bunga gahanggan aijo' pinosusuknyo i tuu' nu sa'angu' na kau', lantas pinotepesnyomo i biwi Yesus, ka' notatae, “Popea' pe'e, imbo' da otoanto pa' i Elia na toka mae montau'akon Ia i salib aijo'.”

³⁷Lantas i Yesus noloboo'mo, ka' sinilakamo.

³⁸ Lalanse' anu kala-kalayo' i Laigan nu Tumpu nobeak tinimbali ohua' lengkat aita' i bawonyo tinoka akaong i aluknyo.

³⁹Suludadu anu tinuminjo i ahop nu salib aijo', nontoa mosia na i Yesus sinilaka. Suludadu aijo' notatae, “Memang totu'u mian aiya Anak nu Tumpu!”

⁴⁰I kiijo' daagi' suele ko to pia-piangkuka na boune anu hau-haunyo montanggalakon iwi-iwi' aijo' mae. Anu kiijo' hi aha ko i Salome, i Maria Magdalena, ka' i Maria tina i Yakobus, anu daagi olitau ka' i Yoses.

⁴¹Ahamo na to boboune anu mombatuki ka' montulungi Yesus salatan Ia tinoka i Galilea. Ka' daagi' da'isan suele na to boboune sangga'at i kiijo' anu tinokamo i Yerusalem nohingga-hinggat mae tiba i Yesus.

⁴²Sinaa ohanimo malom tempo'nyo i Yusuf tinoka mae lengkat i Arimatea. Ia minsoop, Mian Kopian Daka' nu Agama anu o angga'i. Ia suele hau-haunyo montanda'i tempo'nyo Tumpu montampu'uni mompalentah susumo Tomundo'. Sinaa aitu Sinaa nu Momposadia (aijo'mo: sinaa nu Sabat anu ota-otanda'i, malia'mo toka.) Kalana aijo' binaanimo na i Yusuf nangadap hi Pilatus ka' nompoita bangke' i Yesus.

⁴³

⁴⁴I Pilatus binangang taalu' i Yesus sinilakamo. Jadi, ia nolaga kapala nu tompuk nu suludadu ka' nompokilawa hi ia, pa' i Yesus pininmo na sinilaka.

⁴⁵Salatan nohongo anu pinotoka nu suludadu aijo', i Pilatus nompoloasmo i Yusuf mongala bangke' i Yesus.

⁴⁶Lantas i Yusuf nongolimo hude bau ponsaput, aitumo lenan anu ma'ima' ka' lapas aijo' nontau' akonmo bangke' i Yesus, sinaputnyo nu hude aijo'. Lapas aitu pino'una'nyomo na bangke' aijo' i uno nu sa'angu' na kubulan anu binau i uno nu bungkutnyo nu batu. Lapas aijo' i lingginakonnyo na sa'angu' na batu daka' pongkulubi kubulan aijo'.

⁴⁷Hau-haunyo aijo' i Maria Magdalena, ka' i Maria tina i Yoses nompotomatakonmo pa' iyamae na pompo'una'an i Yesus.