Read Saluan MARKUS 2 Bible Online

MARKUS 2 - Saluan bible

MARKUS 2

¹Ilapas tino pia-pianasinaa i Yesus ninsusule'mo i Kapernaum. Sahingga tinogilelemo na lele, taalu' Ia daagi' hau-haunyo i laigan.

²Lantas da'isan na mian tinoka. Aha sinihuk kiijo' mae sampe madi'mo kino tampat. I sabatan pe'e nobuke'mo nogogensotanmo na mian. Lantas i Yesus nompotoka hi aha lele lengkat mae hi Tumpu Allah.

³Hau-haunyo Ia notatae, aha opat na mian nolemban mae samian anu lupe binoanyo hi Yesus.

⁴Panyo kalana mian talalo da'isan, aha madi' noko ala nati ohani hi Ia. Jadi, aha nombukai atop i buannyo, pataknyo kiijo' na i Yesus. Lapas aijo', aha nonguluakon mian lupe aijo' tiba ampasnyo.

⁵Salatan i Yesus nontoa kinodaka' na palesaya nu aha, Ia notatae hi mian lupe aijo', “Anak-Ku, dosa'um ingampunanmo.”

⁶To pia-piangkuka na gulu' agama hau-haunyo suha-suhang i kiijo' nontampu'unimo nompotutugakon i uno nu kinyonyoanyo,

⁷“Baani hondo na mian aiya motatae sumo aijo'! Ia nompopo'ambangmo Tumpu. Ihe na timbali mongampuni dosa', de misa' Tumpu?”

⁸Tempo' aitu mule' sinumbu' i Yesus na pikilan nu aha. Lantas Ia notatae, “Kadaka' komiu mompotutugakon sumo aitu i uno nu kinyonyoaum?

⁹Iya na lebe dengke: montaloakon, ‘Dosa'um ingampunanmo,’ kabai montaloakon ‘Bulamo, hangkat na ampasum ka' lajangmo’?

¹⁰Panyo tempo' uuka, Aku momponyata'mo hi komiu saba' i dunia aiya Anak nu Mian ko kuasa mongampuni dosa'.” Lantas i Yesus notatae hi mian lupe aijo',

¹¹“Pobulamo, hangkat na ampasum ka' pinsusule'mo!”

¹²Ia tinuminjo ka' nalia-lia' nongala ampasnyo, lantas nosabat sinakisian nu aha iwi-iwi'. To mia-mian haha aijo' binangang ka' nompuji' Tumpu. Koonyo nu aha, “Ma'isa toho' kita nontoa anu jinadi sumo aiya!”

¹³I Yesus ninsusule' mule' i biwi nu Dowiwi Galilea. Da'isan na mian tinoka hi Ia, ka' Ia nongajan aha.

¹⁴Hau-haunyo i Yesus i lumajang nokiijo', Ia nontoa samian na anu saja' montage hasin, sanggonyo i Lewi, anak i Alfeus, hau-haunyo suha-suhang i Kanton nu Hasin “Batukimo na aku”, koonyo i Yesus hi ia. Sahingga i Lewi tinuminjo ka' nombatuki Yesus.

¹⁵Tempo'nyo i Yesus hau-haunyo mongkaan i laigan i Lewi, tinokamo da'isan na anu saja' montage hasin, ka' to mia-mian anu o anggap madi' ma'ima' nu mian da'isan, mongkaan hingga-hinggat tiba i Yesus ka' anu saja' mombatuki Ia. Sabab da'isan na aha anu nombatukimo i Yesus.

¹⁶To pia-piangkuka na gulu' agama gampa nu aha mian nu Farisi nontoa i Yesus mongkaan hingga-hinggat tiba anu saja' montage hasin ka' to mia-mian anu osangka madi' ma'ima' aijo'. Jadi aha nompokilawa hi anu saja' mombatuki Yesus, “Kadaka' gulu'um mongkaan hingga-hinggat tiba anu saja' montage hasin ka' to mia-mian anu madi' ma'ima' aijo'?”

¹⁷I Yesus nohongo pompokilawa nu aha aijo', lantas nontaami, “Mian anu sehat, madi' palalu Dokoten; panyo la ahi' mian anu masakit. Aku toka misa' da molaga mian anu monsangka butongnyo na'ima'mo, panyo mian anu monsangka butongnyo madi' talakana'.”

¹⁸Daagi' ko sa'angu' na tempo' anu saja' mombatuki Yohanes anu Mompalamandikan ka' to mia-mian nu Farisi hau-haunyo puasa'. Lantas daagi' ko mian tinoka hi Yesus ka' nompokilawa, “Kadaka' anu saja' mombatuki Yohanes anu Mompalamandikan ka' anu mombatuki mian nu Farisi bapuasa', panyo anu mombatuki Kita Tuuma i madi'?”

¹⁹I Yesus nontaami, “Tempo' nu bau-bauon po'osoan, apaa to mia-mian anu ilaga madi' mongkaan? De boting mo'ane daagi' hingga-hinggat ka' aha, tantu aha mongkaan.

²⁰Panyo tokaje na tempo'nyo boting mo'ane aijo' o'alamo lengkat kiijo' hi aha. Tempo'je aijo', atina'je ka' aha madi' mongkaan.

²¹Madi' ko mian anu montamban baju' anu manau'mo tiba dedelian nu anu bu'ou. Sabab hude pontamban aijo' timbali mombeak baju' aijo', sahingga beaknyo timbali lebe daka'.

²²Sumo aitu mule', madi' ko anu molambe' anggur bu'ou i uno nu polambe'an anu pininmo. Kalana anggur bu'ou aijo' na monsaduakon sahingga polambe'an aijo' mobiha'. Imihinyo mae ohu-ohua' na anggur aijo' mobubus. Anggur anu bu'ou tionyo olambe'akon i polambe'an anu bu'ou suele!”

²³ Daagi' ko sansinaan i sinaa nu Sabat, tempo'nyo i Yesus notulu i sa'angu' na ale' nu gandum, anu saja' mombatuki Ia nontampu'unimo nompadak gandum.

²⁴Lantas to mia-mian nu Farisi notatae hi Yesus, “Kadaka' anu saja' mombatuki Komiu molanggai hukum nu agamanto, nombaumo anu nupoliwa' nu sinaa nu Sabat?”

²⁵ I Yesus nontaami, “Ma'isa toho' komiu nombasa', apaa na anu binau i Daud, tempo'nyo i Abyatar hau-haunyo nokalaja tinimbali imam daka'. Tempo'nyo i Daud ka' to mia-miannyo no'ohop, ka' madi' ko anu okaan, ia ninsoop i Laigan nu Tumpu Allah, ka' nongkaan roti anu sinombahkonmo hi Tumpu. Ka' roti aijo' binee'nyo hi to mia-miannyo. Padahan de koonyo nu agamanto, ola to ima-imam na timbali mongkaan roti aijo'.”

²⁷Lantas i Yesus notatae mule', “Sinaa nu Sabat binau bau kapentingan nu mian; misa' mian bau sinaa nu Sabat.

²⁸Jadi, Anak nu Mian mongkuasai sinaa nu Sabat.”