Read Saluan MARKUS 5 Bible Online

MARKUS 5 - Saluan bible

MARKUS 5

¹Lapas aitu i Yesus ka' anu saja' mombatuki Ia tinoka i santoa nu Dowiwi Galilea, i tano' nu Gerasa.

²Salatan i Yesus ilumobos lengkat i duangan, Ia i lambanan mae nu samian na mo'ane anu nosabat mae lengkat i liang nu kubulan.

³Mian aijo' kinuasanmo nu roh ma'idek ka' jojoong i anu saja' pongkubulan. Ia madi'mo daagi' opoko segoti; mau mule' tiba lante'.

⁴Toho'mo tengke ka' limanyo pinungu, panyo lante' haha aijo' saja' nu botu'i, ka' besak i tengkenyo nu pato'i. Ia talalo mahoson ka' madi' ko samian pe'e na moko tahani.

⁵Sinaa ka' pihi ia mahalajangan i kubulan ka' i to bungku bungkutnyo, maha-maha poloboo'an ka' mombelai butongnyo nu batu.

⁶Daagi' jo'o-jo'on ia nontoa i Yesus tinoka, ia nopadeka', lantas nonsombah i ahop hi Yesus.

⁷Tiba potatae anu daka' ia noloboo', “Yesus, Anak nu Tumpu Allah anu Talalo Matangkas na Kuasa-Nyo! Nu posiamo na aku aiya? Tiba sanggo nu Tumpu ku poita, bolimo monsakisa aku!” (

⁸Mian aijo' motatae sumo aitu, kalana i Yesus notatae hi ia, “Roh ma'idek posabatmo lengkat hi mian aiya!”)

⁹Lantas i Yesus nompokilawa hi ia, “Ihe na sanggoum?” Mian aijo' nontaami, “Sanggongku ‘Legiun’ — kalana kami aiya da'isan hondo!”

¹⁰Saja' ia nompoita sabole-bole da i Yesus boli monsai to roh-roh anu ma'idek aijo' mosabat lengkat i tano' aijo'.

¹¹Madi' majo'on lengkat i tampat aijo' manjoo' hondo na bau' anu hau-haunyo molio mongkaan i tengke nu bungkutnyo.

¹²To roh-roh anu ma'idek aijo' nompoita hi Yesus, “Saimo na kami minsoop i uno nu to bau-bau' haha aijo'.”

¹³Ka' i Yesus sinetujumo. Jadi, to roh-roh anu ma'idek aijo' nosabat lengkat hi mian aijo' ka' ninsoop i uno nu bau' haha aijo'. Sampahas na bau' aijo' iwi-iwi' nopadeka' ka' nalaloa i biwi nu keles nu dowiwi ka' nolomos — iwi-iwi'mo kila-kila ohua' na madala na bau'.

¹⁴Anu saja' monjagai bau' aijo' nopadeka', ka' nompolele lele aijo' i kota ka' i kampung anu mompaha ohani. Lantas to mia-mian nosabat da montoa apaa na anu jinadi.

¹⁵Aha tinoka hi Yesus, lantas nontoa mian anu u'uka pininsoopan nu roh ma'idek aijo', hau-haunyo suha-suhang i kiijo'. Ia nompusokmo baju' ka' pikilannyo mule' na'ima'mo. Lantas aha iwi-iwi' tinimbali nabuhuk.

¹⁶To mia-mian anu toamo kajadian mongkona mian aijo' ka' bau' haha aijo' nonsisik apaa na anu jinadi.

¹⁷Lantas to mia-mian anu i tano' aijo' nompoita da i Yesus mompala'i tano' aijo'.

¹⁸Tempo'nyo i Yesus sinumake' i uno nu duangan, mian anu u'uka mae kinuasanmo nu roh ma'idek aijo' nompoita hi Yesus, da timbali mombatuki.

¹⁹Panyo i Yesus madi' nontalima, ola ahi' koo-Nyo, “Pinsusule'mo, ka' poto'i hi to utu-utusum apaa na anu binaumo nu Tumpu hi beleyum, ka' kino ima'nyo hondo na Ia hi beleyum!”

²⁰Mian aijo' mule' namba ka' nontampu'unimo saja' nonsisikakon i tano' Sampulu' na Kota apaa na anu binaumo i Yesus hi ia. Iwi-iwi' na mian binangang na nohongo.

²¹I Yesus ninsusule' mule' nokiijo' i santoa nu dowiwi. I biwi nu dowiwi aijo', da'isan na mian anu toka mogombu ka' montikubi i Yesus.

²²Tinokamo na samian anu sanggonyo i Yairus. Ia atina'mo samian anu monjagai laigan pogalejaan i kota aijo'. Salatan ia nontoa i Yesus, ia nonsombah i ahop-Nyo,

²³ka' nompoita totu-totu'u, “Kita Tuuma, anakku boune masakit hondo. De timbali toka pe'e mae da mompanyaakon, da ia ma'alin ka' boli silaka!”

²⁴Sahingga i Yesus namba nohingga-hinggat i Yairus. Da'isan na mian mombatuki Ia ka' mompakisa da ohani hi ia.

²⁵I totonga' nu aha daagi' mule' ko samian na boune anu noko sampulu'mo ka' ohua' na taun masakit binuntulan nu home ola kalana tinokamo na adat nu boune.

²⁶Iwi-iwi' halata'nyo ningkotmo pinake bau pombayan to doko-dokoten, panyo madi' ko kapa'alinannyo, ola ahi' panyakitnyo mintuang maboat.

²⁷Boune aijo' nohongomo manjoo' na anu nubau i Yesus. Sahingga itotonga' nu mian da'isan aijo' ia nongohani i Yesus lengkat i hiku,

²⁸kalana ia binapikin, “Mau ola aku montoongi juba'-Nyo, aku timbalimo ma'alin!”

²⁹Ia nontoongi juba' i Yesus, ka' madi' pinin aijo' binelentimo na ia binuntulan nu home. Ingoa'annyo ia na'alinmo.

³⁰Tempo'nyo aijo' mule' i Yesus nongoa'i saba' daagi' ko kahosonan anu nosabat lengkat i butong-Nyo. Sahingga Ia nosiloi hi mian da'isan aijo' ka' nompokilawa, “Ihe na nontoongi juba'-Ku?”

³¹Anu saja' mombatuki Ia notatae, “Tuuma posi toamo mian da'isan aitu nogogensotanmo. Ka' Kita Tuuma daagi' mompokilawa, ihe na anu nontiik Kita Tuuma?”

³²Panyo i Yesus ola ahi' saja' montoa anu montikubi Ia molio mian anu nontiikmo Ia.

³³Boune aijo' anu monsumbu' apaa na anu tinimbalimo i butongnyo, i lakatnyo ka' nabuhuk ka' nonsombah i ahop i Yesus ka' ingakuannyo iwi-iwi'.

³⁴Lantas i Yesus notatae hi boune aijo', “Anak-Ku, kalana beleyum palesaya hi beleng-Ku, beleyum ma'alin! Lako'mo ima-ima' beleyum sinehatmo totu-totu'u!”

³⁵Hau-haunyo i Yesus daagi' motatae, to pia-piangkuka na posaihon tinoka lengkat mae i laigan hi Yairus. “Langkoyang nu kita Tuan sinilakamo,” koonyo nu aha hi Yairus. “Bolimo kita Tuan monsusa'i mule' Tuumanto i Gulu'.”

³⁶Madi' montapali apaa na anu tinaeakon nu to mia-mian aijo', i Yesus notatae hi Yairus, “Boli mabuhuk, palesayamo!”

³⁷Lantas i Yesus i lumajang lau-laus, panyo Ia madi' mompobee' mau samian pe'e na anu mombatuki Ia, ola sambiha'nyo i Petrus tiba i Yakobus ka' i Yohanes moto utus.

³⁸Salatan aha tinoka i laigan i Yairus, i Yesus nontoa ka'ada'an i hengge'mo ka' nohongo haang ka' tando' talalo daka'.

³⁹Lantas i Yesus ninsoop ka' notatae hi aha, “Kadaka' talalo hengge' ka' humaang? Anak aijo' madi' sinilaka; ia ola i hoyot!”

⁴⁰Aha nongkokojoi i Yesus. Sahingga Ia nonsai aha iwi-iwi' mosabat. Lantas Ia nomboa tina tuumanyo nu anak aijo' ka' aha totolu' na anu saja' mombatuki Ia, ninsoop i uno nu salipi' nu anak aijo'.

⁴¹I Yesus nontoongi lima nu anak aijo' ka' notatae hi ia, “Talita kum,” alati'nyo; “Anak boune, Aku motatae hi beleyum: pobula!”

⁴²Anak langkoyang aijo' nalia' nobula ka' i lumajang. (Umunnyo sampulu'mo ka' ohua' na taun.) Iwi-iwi' anu nonsakisi apaa na anu tinimbali aijo' binangang hondo!

⁴³I Yesus nompoliwa' hondo mompoto'i han aijo' mau mule' pa' hi he. Lantas koo-Nyo, “Bee'i mongkaan na anak aijo'.”