Read Saluan MARKUS 7 Bible Online

MARKUS 7 - Saluan bible

MARKUS 7

¹Sanggombu na mian nu Farisi ka' to pia-piangkuka na gulu' agama lengkat mae i Yerusalem tinoka hi Yesus.

²Aha nontoa to pia-piangkuka na anu saja' mombatuki Yesus mongkaan nu lima anu madi' belesi' susumo koonyo nu agama, aijo'mo de ma'isa pe'e obaso'i na lima susumo koonyo nu atulan nu agama.

³To mia-mian nu Farisi, sumo aitu mule' iwi-iwi' na mian nu Yahudi, mohongo-hongo hondo mombatuki to ada-adat nu mompolee' nu aha. Aha madi' mongkaan de ma'isa pe'e obaso'i na lima mombatuki apaa na anu tinantukanmo.

⁴Apaa na anu ingoli i pasan madi' timbali okaan de ma'isa obaso'i pe'e imoona. Ka' manjoo' na atulan sangga'at nolengkat mae i mompolee' nu aha anu nunutoongi nu aha totu-totu'u; susumo mombaso'i galas, mangko', ka' to paka-pakakas tambaga.

⁵Kalana aijo' to mia-mian nu Farisi ka' to gulu-gulu' agama aijo' nompokilawa hi Yesus, “Kadaka' anu saja' mombatuki Beleyum aijo' mongkaan nu lima anu madi' obaso'i? Apaa na sababnyo aha madi' mombatuki adat nu mompolee'to?”

⁶ I Yesus nontaami, “Komiu to mia-mian baleko'! Totu'u hondo apaa na anu tinaeakon i Yesaya mongkona komiu, aijo'mo, ‘Sumo aiya na koonyo nu Tumpu. To mia-mian aijo' ola ahi' monsombah Aku nu potatae, panyo kinyonyoa nu aha majo'on lengkat hi beleng-Ku.

⁷Palasuma na aha monsombah Aku, kalana atulan nu mian nu ajanakon nu aha au'aitu aijo'mo na atulan-Ku!’

⁸To pale-palentah nu Tumpu madi'mo otoongi nu belemiu, ka' to atu-atulanmo nu mian na otoongi nu belemiu totu-totu'u.”

⁹Lantas i Yesus notatae mule', “Komiu pande hondo mombahakon palentah nu Tumpu da timbali montoongi posi pangajalan.

¹⁰ I Musa nombee'imo palentah aiya, ‘O adati na tuuma tinaum,’ ka' ‘Ihe na monguda-udahi tuuma tinanyo, o hukum mate.’

¹¹Panyo komiu nongajanakon: De mian motatae hi tu'anyonyo, ‘Apaa na anu tionyo kubee' hi tuuma tina, noko sombahkonkumo hi Tumpu,’

¹²sahingga komiu mompobebas mian aijo' i pakalaja'annyo, montulungi tuuma tinanyo.

¹³Jadi, tiba posi ajalanum anu binee' nu belemiu hi to mia-mian, komiu madi'mo nontalima potatae nu Tumpu. Daagi' manjoo' na han sumo aiya anu binau nu belemiu.”

¹⁴Lantas i Yesus po'ule' minsan na nolaga mian da'isan aijo' ka' notatae hi aha, “Hongo da mangalati'!

¹⁵Madi' ko anu lengkat mae i sambiha'nyo na minsoop i uno nu mian sahingga mombau mian aijo' pahengas. Sumo aitu mule', anu mosabat lengkat hi toto samian, aijo'mo na anu mombau ia pahengas. [

¹⁶Jadi, de ko bihing, hongomo.]”

¹⁷Salatan i Yesus nompala'imo mian da'isan aijo' ka' ninsoop i laigan, anu saja' mombatuki Ia nompokilawa hi Ia mongkona makisut nu kantuang aijo'.

¹⁸Sahingga i Yesus notatae hi aha, “Apaa komiu ma'isa mule' mangalati'? Apaa komiu madi' moko ala mangalati' kalana anu minsoop hi toto samian madi' mombau mian aijo' pahengas?

¹⁹Kalana anu minsoop aijo' madi' montulu i kinyonyoa, panyo montulu i kompong, ka' lapas po'ule' mosabat.” Tiba potatae haha aijo' i Yesus nontaloakon saba' iwi-iwi' na kaanon aijo' halan.

²⁰Lantas i Yesus notatae mule', “Anu mosabat lengkat hi mian, aijo'mo na montawasi ia.

²¹Kalana lengkat i unonyo, aitumo lengkat i uno nu kinyonyoa, lubat na pikilan-pikilan ma'idek anu monsabapi mian mombau anu masala', montomang, mompatei,

²²mahenyu, baleko', mongalu, tiba mombau sangga'at anu to ide-idek, timbali matongot, madi' ko atulan, minsihip, mohang hangka-hangkat butong, ka' madi' opoko ajan.

²³Iwi-iwi' anu ma'idek aijo' lubat lengkat i unonyo, ka' aijo' mo na mompotimbali mian pahengas.”

²⁴Lapas aijo' i Yesus nompala'i tampat aijo', ka' namba i tano' ohani kota nu Tirus. Ia ninsoop i uno nu sa'angu' na laigan ka' madi' mongka'oho' mian monsumbu' Ia, daagi' i kiijo'. Panyo Ia madi' moko ala momposuluk butongnyo.

²⁵Samian na tina ko anaknyo boune pininsoopan nu roh ma'idek, nohongo apa-apaa mongkona i Yesus. Ia tinoka hi Yesus ka' nonsombah i ahop-Nyo,

²⁶ka' mompoita da i Yesus molaa'akon roh ma'idek lengkat hi anak aijo'. Boune aijo' misa' mian nu Yahudi, i hampe i tano' Fenisia i Siria.

²⁷I Yesus notatae hi ia, “To ana-anak tionyo obee'i mongkaan momona. Madi' ma'ima' mongala kaanon nu to ana-anak ka' olumbu'akon i dedeng.”

²⁸“Kita Tuuma”, tinaaman nu boune aijo', “To dede-dedeng pe'e i aluk nu meja', mongkaan laaya' anu manabu' lengkat hi to ana-anak!”

²⁹Lantas i Yesus notatae hi ia, “Kalana pinontaamium sumo aijo', pinsusule'mo; roh ma'idek nosabatmo lengkat hi anakum!”

³⁰Tinanyo aijo' ninsusule'. I laigan, tinokannyo na anaknyo daagi' male-male' i kamale'an, ka' roh ma'idek totu-totu'u nosabatmo lengkat hi anak aijo'.

³¹Lapas aijo' i Yesus nompala'i tano' nu Tirus, ka' nolausakon lumambanan-Nyo motulu Sidon mokiijo' i Dowiwi Galilea. Ia nongala jalan motulu tano' Sampulu' na Kota.

³²I kiijo' mian nomboa hi Ia samian na anu momo' ka' mabongon. Aha mompoita hi Yesus da mompotiik lima-Nyo i butong nu mian aijo'.

³³I Yesus nomboa mian aijo' nanintade lengkat hi mian da'isan, lantas pinotiik-Nyo na bua' nu limanyo i uno nu ohua' na bihing nu anak aijo'. Lantas i Yesus nintupe' ka' nontiik jila' nu anak aijo'.

³⁴Lapas aijo' i Yesus nontihanga langit, lantas tinolo usa hoso-hoson ka' notatae hi mian aijo', “Efata”, anu alati'nyo, “Tinabuka'mo!”

³⁵Bihing nu mian aijo' tinabuka' ka' jila'nyo madi'mo i hojok sumo imoonanyo, ka' ia dinengkemo na nontampu'uni notatae.

³⁶Lantas i Yesus nontewa' aha iwi-iwi' da boli monsisik han aijo' mau mule' pa' hi he. Panyo mau mosiamo na i Yesus montewa', ola mule' ahi' nu paka leleakon nu aha.

³⁷Ka' iwi-iwi' na mian anu nohongo aijo' binangang hondo. Aha notatae, “Iwi-iwi' binaunyo ima-ima'! Ka' mule' ia nombau mian ma bongon mohongo, ka' mian momo' timbali motatae!”