Read Saluan MARKUS 8 Bible Online

MARKUS 8 - Saluan bible

MARKUS 8

¹Ma'isa talalo pinin lapas aijo', daagi' mule' ko sanggombu na mian da'isan anu tinoka sinihuk. Kalana aha madi'mo ko anu o kaan, i Yesus nolaga anu saja' mombatuki Ia, ka' notatae,

²“Aku molibos hi mian da'isan aiya. Tolun sinaamo na kopinnyo aha nohingga-hinggat aku, ka' uuka aha madi'mo ko anu o kaan.

³De Aku monsai aha minsusule' tiba kompong madi' ko isinyo, aha todapemo i tonga' nu jalan. Apaa mule' anu aitu hi aha daagi' ko anu tinoka lengkat mae itano' majo'on.”

⁴Anu saja' mombatuki Yesus nontaami, “I tampat anu mosi panintade aiya, iyamae na timbali pohumpakan nu mian kaanon da sampa' hi iwi-iwi' na mian aiya?”

⁵“Daagi' piangkuka na konjoo'nyo nu roti hi komiu?” koonyo i Yesus. “Popitu',” tinaaman nu aha.

⁶Sahingga i Yesus nonsai mian da'isan aijo' sinumuhang i tano', lantas Ia nongala popi-popitu' na roti aijo' ka' nompoita talima kaseh hi Tumpu. Lapas aijo' Ia nombiha-biha' roti aijo' nu lima-Nyo ka' binee'nyo hi anu saja' mombatuki Ia, da obagi-bagiakon hi to mia-mian. Sahingga anu saja' mombatuki Ia, nombau apaa na anu pinalentahkonnyo.

⁷Aha mule' daagi' ko to pia-piangkuka na ikan ise' suele. I Yesus nompoita talima kaseh hi Tumpu da obalakati na ikan haha aijo', lantas nonsai anu saja' mombatuki Ia mombagi-bagiakon ikan aijo'.

⁸Aha nongkaan sampe nobosu — daagi' kila-kila opat na madala na mian anu nongkaan. Lapas aijo' anu saja' mombatuki Yesus nolimu' labi nu kaanon — popitu' na kalanjang nobuke'. Lantas i Yesus nonsai mian haha aijo' da minsusule'mo,

¹⁰ka' Ia tiba anu saja' mombatuki Ia, lau-laus sinumake' i duangan ka' namba i tano' Dalmanuta.

¹¹ To pia-piangkuka na mian nu Farisi tinoka hi Yesus, ka'nontampu'uni pinainggaga tiba Ia da timbali pomposala'an Ia. Aha momoita hi Yesus da mombau anu okabangangi da bau pongoosian kalu Ia tinoka lengkat mae hi Tumpu.

¹² I Yesus nongoa'i sinusa' lantas nontaami, “Apaa na sababnyo mian tempo' uuka momoita Aku da mombau anu okabangangi? Madi'! Aku madi' mombee'i tanda anu sumo aijo' hi aha!”

¹³Lantas i Yesus nompala'i aha, ka' ninsoop i uno nu duangan; lapas aijo' nambamo i santoa nu dowiwi aijo'.

¹⁴Anu saja' mombatuki Yesus tinongkolilim na nomboa molabi na roti. Aha ola ahi' daagi' ko sa'angu' na roti i duangan.

¹⁵ “Obala-bala'ingati na ragi nu to mia-mian Farisi ka' ragi i Herodes,” koo-Nyo i Yesus hi aha.

¹⁶Sahingga anu saja' mombatuki Yesus nontampu'unimo nombisalakon han aijo'. Aha notatae, “Ia notatae sumo aijo', sabab kita madi' ko roti.”

¹⁷Nusumbu' i Yesus apaa na anu nu bisalakon nu aha. Sabab aijo' Ia nompokilawa hi aha, “Kadaka' komiu nombisalakon madi' ko roti? Apaa komiu madi' monsumbu' ka' madi' mule' mangalati'? Te madi'mo ko pikilan na komiu?

¹⁸ Komiu ko mata — kadaka' madi' montoa? Komiu ko bihing — kadaka' madi' mohongo? Madi'mo komiu monginau'

¹⁹i olima' na roti aijo' anu biniha-biha'-Ku da obee' hi olima' na madala na mian? Piangkuka na kalanjang nobuke' na labinyo nu kaanon anu ilimu' nu belemiu?” “Sampulu' ka' ohua',” tinaaman nu aha.

²⁰“Ka' tempo'nyo Aku nombiha-biha' popitu' na roti bau bagi nu opat na madala na mian,” pinokilawa i Yesus mule', “Piangkuka na kalanjang na labinyo nu kaanon anu pinolimu'?” “Popitu',” tinaaman nu aha.

²¹“Jadi, ma'isa mule' komiu mangalati'?” koo-Nyo i Yesus mule'.

²²Aha tinoka i Betsaida. I kiijo' mian nomboa mae samian na mian anu mapisok hi Yesus, ka' mompoita da Ia mompanya mian mapisok aijo' da nompa'alinakon.

²³Sahingga i Yesus nontoongi lima nu mian mapisok aijo' ka' nontaka' ia i sambiha' nu kota aijo'. Lapas aijo' i Yesus nontupe'i mata nu mian aijo'. Ia nompanya nu lima-Nyo mata nu mian aijo', lantas nompokilawa hi ia, “Moko toamo apa-apaa na beleyum uuka aiya?”

²⁴Mian aijo' nontoa nokiita' i sasu ahopnyo, lantas notatae, “Ii'. Aku montoa mian kolalajang; panyo aha otoa sumo pu'un nu kau'.”

²⁵I Yesus nompotiik lima-Nyo mule' i mata nu mian aijo'. Po'ule' mule' mian aijo' nompagala nontoa totu-totu'u. Matanyo na'alinmo, ka' ia nontoamo iwi-iwi' na nasamo hondo.

²⁶Lantas i Yesus notatae hi ia, “Pinsusule'mo, ka' bolimo minsusule' i kota aijo'.”

²⁷I Yesus ka' anu saja' mombatuki Ia, namba nokiijo' i kampu-kampung anu mompaha ohani i Kaisarea Filipi. I tonga' nu jalan i Yesus nompokilawa hi aha, “Koonyo nu potatae nu mian, ihe na Aku aiya?”

²⁸ Aha nontaami, “Daagi' ko anu notatae: I Yohanes anu saja' Mompalamandikan; daagi' mule' ko anu notatae i Elia, ka' sangga'at mule' notatae: sala'samian na nabi.”

²⁹ “Panyo de posi komiu, Aku aiya ihe?” pinokilawa i Yesus. Tinaaman i Petrus, “Kita Tuuma te Tomundo anu Momposalamat!”

³⁰Lantas i Yesus nompo'inau' aha, da madi' mompolele mau mule' hi he mongkona butong-Nyo.

³¹Lapas aijo', i Yesus nontampu'unimo nongajan anu saja' mombatuki Ia tukoonyo, Anak nu Mian tionyo mongoa'i manjoo' na kasansala'an, ka' ogagakon nu to pola-polaya', kapala nu to ima-imam, ka' to gulu-gulu' agama. Ia opatei, panyo i sinaa kototolu'nyo Ia po'ule' opotumuu'.

³²Pinonasa hondo i Yesus na nompoto'i han aijo' hi anu saja' mombatuki Ia. Sahingga i Petrus nohambet i Yesus i sohipi'nyo, ka' nontewa' Ia.

³³Panyo i Yesus nosiloi ka' nontoa anu saja' mombatuki Ia, lantas nontewa' i Petrus, “Lamba lengkat i aiya, Anu Monggoda! Pikilanum atina' pikilan nu mian; misa' pikilan nu Tumpu Allah!”

³⁴ Lapas aijo' i Yesus nolaga mian da'isan anu daagi' i kiijo' tiba anu saja' mombatuki Ia. Lantas Ia notatae hi aha, “Mian anu mongka'oho' mombatuki Aku, tionyo mongkolilimi posi kapalaluannyo, lapas aijo' monsimbuje salibnyo, ka' lau-laus mombatuki Aku.

³⁵ Kalana mian anu mongka'oho' balatahan i kantumuu'annyo, madi' matantu na kantumuu'annyo. Panyo mian anu mongkolobanakon kantumuu'annyo hi belengku ka' bau kapalaluan nu Lele Ma'ima' anu lengkat mae hi Tumpu, momposalamat ia.

³⁶Apaa na untungnyo hi toto samian, de songko-songko na dunia aiya timbalimo anunyo, panyo ia madi' matantu na kantumuu'annyo?

³⁷Te timbali na kantumuu'an aijo' obolosi nu anu sambu-sambumo?

³⁸De toto samian ma'ambang na mongakui Aku ka' pangajalan-Ku, i tempo' nu duluhaka ka' ka'idekan aiya, Anak nu Mian suele ma'ambang na mongakui mian aijo', tempo'nyo Ia po'ule' toka tiba kuasa nu Tuuma-Nyo, tiba to mala-malaikat anu susi'.”